ਪਟਿਆਲਾ :- ਪਟਿਆਲਾ ਪੁਲਿਸ ਅਧਿਕਾਰੀਆਂ ਨਾਲ ਜੋੜੀ ਕਥਿਤ ਵਾਇਰਲ ਕਾਨਫ਼ਰੰਸ ਕਾਲ ਨੇ ਪ੍ਰਸ਼ਾਸਨ ਤੋਂ ਲੈ ਕੇ ਸਿਆਸੀ ਧਿਰਾਂ ਤੱਕ ਵੱਡੀ ਚਰਚਾ ਛੇੜ ਦਿੱਤੀ ਹੈ। ਮਾਮਲਾ ਗੰਭੀਰ ਹੁੰਦਾ ਦੇਖਦਿਆਂ ਪੰਜਾਬ ਸਰਕਾਰ ਨੇ ਇੱਕ ਵਿਸ਼ੇਸ਼ ਜਾਂਚ ਟੀਮ (SIT) ਤਾਇਨਾਤ ਕਰ ਦਿੱਤੀ ਹੈ, ਜੋ ਇਸ ਗੁੱਥੀ ਦੀ ਜਾਂਚ ਕਰੇਗੀ ਕਿ ਕਾਲ ਅਸਲ ਸੀ ਜਾਂ ਤਕਨਾਲੋਜੀ ਦੀ ਵਰਤੋਂ ਨਾਲ ਬਣਾਈ ਗਈ।
SIT ਨੂੰ ਸ਼ਿਕਾਇਤ ਅਤੇ FIR ਦੋਵੇਂ ਦੀ ਜਾਂਚ ਦਾ ਹੁਕਮ
ਤਾਇਨਾਤ ਕੀਤੀ ਗਈ SIT ਨੂੰ ਸ਼੍ਰੋਮਣੀ ਅਕਾਲੀ ਦਲ (SAD) ਵੱਲੋਂ ਦਾਇਰ ਕੀਤੀ ਸ਼ਿਕਾਇਤ ਅਤੇ ਸਾਈਬਰ ਸੈੱਲ ਪਟਿਆਲਾ ਵੱਲੋਂ ਦਰਜ ਕੀਤੀ FIR—ਦੋਵੇਂ ਦੀ ਵਿਸਥਾਰਿਤ ਜਾਂਚ ਕਰਨ ਦਾ ਅਧਿਕਾਰ ਦਿੱਤਾ ਗਿਆ ਹੈ।
ਹਾਲਾਂਕਿ ਟੀਮ ਦੇ ਇੰਚਾਰਜ ਦਾ ਨਾਮ ਅਜੇ ਤੱਕ ਸਾਹਮਣੇ ਨਹੀਂ ਆਇਆ, ਪਰ ਸਰਕਾਰੀ ਅਧਿਕਾਰੀਆਂ ਅਨੁਸਾਰ SIT ਆਪਣੇ ਇੰਚਾਰਜ ਦੀ ਤੈਨਾਤੀ ਆਪ ਕਰੇਗੀ।
ਛੇ ਵਿਅਕਤੀ ਤਲਬ, ਚੰਡੀਗੜ੍ਹ ‘ਚ ਅੱਜ ਪੁੱਛਗਿੱਛ
ਜਾਂਚ ਦੇ ਪਹਿਲੇ ਪੜਾਅ ‘ਚ SIT ਨੇ ਛੇ ਜਣਿਆਂ ਨੂੰ ਹਾਜ਼ਰ ਹੋਣ ਲਈ ਕਿਹਾ ਹੈ। ਇਨ੍ਹਾਂ ‘ਚ ਸ਼ਾਮਲ ਹਨ—
-
ਸ਼ਿਕਾਇਤਕਰਤਾ ਅਰਸ਼ਦੀਪ ਸਿੰਘ ਕਲੇਰ
-
SAD ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ
-
ਯੂਥ ਅਕਾਲੀ ਦਲ ਨੇਤਾ ਸਰਬਜੀਤ ਸਿੰਘ ਝਿੰਜਰ
-
ਕਾਲ ਵਾਇਰਲ ਕਰਨ ਦੇ ਦੋਸ਼ਾਂ ਹੇਠ ਤਰਨਦੀਪ ਸਿੰਘ ਧਾਲੀਵਾਲ
ਅਤੇ ਹੋਰ ਦੋ ਵਿਅਕਤੀ।
ਇਹ ਸਭ ਅੱਜ, 7 ਦਸੰਬਰ ਨੂੰ, ਚੰਡੀਗੜ੍ਹ ਦੇ ਸੈਕਟਰ-9 ਸਥਿਤ ਪੁਲਿਸ ਹੈੱਡਕੁਆਰਟਰ ਵਿੱਚ ਪੁੱਛਗਿੱਛ ਲਈ ਪੇਸ਼ ਹੋ ਰਹੇ ਹਨ।
FIR ਵਿੱਚ ਏਆਈ ਦੀ ਵਰਤੋਂ ਦਾ ਦਾਅਵਾ
ਮਾਮਲੇ ਨਾਲ ਜੁੜੀ FIR ਦੀ ਕਾਪੀ ਵੀ ਸਾਹਮਣੇ ਆ ਗਈ ਹੈ। ਇਹ ਐਫਆਈਆਰ ਸਾਈਬਰ ਸੈੱਲ ਪਟਿਆਲਾ ਵਿਖੇ ਸੀਆਈਏ ਸਟਾਫ ਦੇ ਇੰਚਾਰਜ ਇੰਸਪੈਕਟਰ ਪ੍ਰਦੀਪ ਸਿੰਘ ਬਾਜਵਾ ਦੇ ਬਿਆਨਾਂ ਦੇ ਆਧਾਰ ‘ਤੇ ਦਰਜ ਕੀਤੀ ਗਈ। FIR ਵਿੱਚ ਦਾਅਵਾ ਹੈ ਕਿ ਵਾਇਰਲ ਹੋਈ ਕਾਲ “ਆਰਟੀਫੀਸ਼ਲ ਇੰਟੈਲੀਜੈਂਸ (AI)” ਦੀ ਮਦਦ ਨਾਲ ਤਿਆਰ ਕੀਤੀ ਗਈ ਅਤੇ ਬਾਅਦ ਵਿੱਚ ਜ਼ਾਣ ਬੁੱਝ ਕੇ ਸੋਸ਼ਲ ਮੀਡੀਆ ‘ਤੇ ਫੈਲਾਈ ਗਈ।
SAD ਦੀ ਪਟੀਸ਼ਨ ਤੋਂ ਬਾਅਦ SIT ਦਾ ਗਠਨ
ਵੀਰਵਾਰ ਨੂੰ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਮਾਮਲੇ ਦੀ ਨਿਆਂਇਕ ਨਿਗਰਾਨੀ ਹੇਠ ਜਾਂਚ ਦੀ ਮੰਗ ਕਰਦੇ ਹੋਏ ਇੱਕ ਜਨਹਿਤ ਪਟੀਸ਼ਨ ਹਾਈ ਕੋਰਟ ਵਿੱਚ ਦਾਇਰ ਕੀਤੀ ਗਈ ਸੀ। ਇਸ ਪਟੀਸ਼ਨ ਦੇ ਬਾਅਦ ਹੀ ਸਰਕਾਰ ਵੱਲੋਂ SIT ਦਾ ਗਠਨ ਕੀਤਾ ਗਿਆ।
ਅਕਾਲੀ ਦਲ ਇਸ ਕੇਸ ਵਿੱਚ ਪਟਿਆਲਾ ਦੇ SSP ਵਿਰੁੱਧ ਵੀ FIR ਦਰਜ ਕਰਨ ਦੀ ਮੰਗ ਕਰ ਰਿਹਾ ਹੈ।
ਅਗਲੇ ਦਿਨਾਂ ‘ਚ ਮਾਮਲਾ ਹੋ ਸਕਦਾ ਹੈ ਹੋਰ ਗੰਭੀਰ
ਇਹ ਕੇਸ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਕਮੇਟੀ ਚੋਣਾਂ ਦੇ ਮੌਕੇ ‘ਤੇ ਸਿਆਸੀ ਤਣਾਅ ਨੂੰ ਹੋਰ ਵੀ ਵਧਾ ਰਿਹਾ ਹੈ। ਹੁਣ ਸਾਰੀਆਂ ਨਜ਼ਰਾਂ ਇਸ ਗੱਲ ‘ਤੇ ਟਿਕੀਆਂ ਹਨ ਕਿ SIT ਆਪਣੀ ਜਾਂਚ ਦੇ ਨਤੀਜਿਆਂ ‘ਚ ਕੀ ਖੁਲਾਸੇ ਕਰਦੀ ਹੈ ਅਤੇ ਏਆਈ ਵਾਲੇ ਦਾਅਵਿਆਂ ਦੀ ਸੱਚਾਈ ਕਿੱਥੇ ਤੱਕ ਸਾਬਤ ਹੁੰਦੀ ਹੈ।
