ਚੰਡੀਗੜ੍ਹ :- ਪੰਜਾਬ ‘ਚ ਪਰਾਲੀ ਸਾੜਨ ‘ਤੇ ਸਰਕਾਰ ਦੀ ਸਖ਼ਤ ਕਾਰਵਾਈ ਦੇ ਚੰਗੇ ਨਤੀਜੇ ਨਜ਼ਰ ਆਉਣ ਲੱਗੇ ਹਨ। ਪਹਿਲੀ ਵਾਰ ਦੁਸਹਿਰੇ ਦੇ ਦਿਨ ਸ਼ਾਮ 5 ਵਜੇ ਤੱਕ ਸੂਬੇ ਵਿੱਚ ਪਰਾਲੀ ਸਾੜਨ ਦਾ ਇੱਕ ਵੀ ਮਾਮਲਾ ਦਰਜ ਨਹੀਂ ਹੋਇਆ। ਪਿਛਲੇ ਸਾਲਾਂ ਵਿੱਚ ਦੁਸਹਿਰਾ ਪਰਾਲੀ ਸਾੜਨ ਦੇ ਸਭ ਤੋਂ ਵੱਧ ਮਾਮਲਿਆਂ ਲਈ ਜਾਣਿਆ ਜਾਂਦਾ ਸੀ।
ਪਿਛਲੇ ਸਾਲਾਂ ਦੇ ਮੁਕਾਬਲੇ ਵੱਡੀ ਕਮੀ
ਅਧਿਕਾਰਕ ਅੰਕੜਿਆਂ ਮੁਤਾਬਕ ਇਸ ਸਾਲ 3 ਅਕਤੂਬਰ ਤੱਕ ਪਰਾਲੀ ਸਾੜਨ ਦੇ ਕੇਵਲ 95 ਮਾਮਲੇ ਹੀ ਸਾਹਮਣੇ ਆਏ ਹਨ, ਜਦੋਂ ਕਿ ਪਿਛਲੇ ਸਾਲ ਇਸੇ ਦਿਨ ਤੱਕ ਇਹ ਗਿਣਤੀ 171 ਸੀ। ਇਸ ਤਰ੍ਹਾਂ ਇਸ ਵਾਰ ਘਟਨਾਵਾਂ ਵਿੱਚ 50% ਕਮੀ ਦਰਜ ਕੀਤੀ ਗਈ ਹੈ।
ਜਿਲ੍ਹਾ-ਵਾਰ ਮਾਮਲੇ ਘਟੇ
ਹੁਣ ਤੱਕ ਦਰਜ ਮਾਮਲਿਆਂ ਵਿੱਚ ਹੁਸ਼ਿਆਰਪੁਰ ‘ਚ 2, ਸੰਗਰੂਰ ‘ਚ 2, ਬਠਿੰਡਾ ‘ਚ 1, ਜਲੰਧਰ ‘ਚ 1 ਅਤੇ ਮੋਹਾਲੀ ‘ਚ ਵੀ ਕੇਵਲ ਇੱਕ ਮਾਮਲਾ ਸਾਹਮਣੇ ਆਇਆ ਹੈ। ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਸਰਕਾਰ ਦੀ ਨਿਗਰਾਨੀ ਅਤੇ ਕਾਰਵਾਈ ਕਾਰਗਰ ਸਾਬਤ ਹੋ ਰਹੀ ਹੈ।
ਪਿਛਲੇ ਸਾਲਾਂ ਦੇ ਅੰਕੜੇ ਚਿੰਤਾਜਨਕ ਰਹੇ
ਪਿਛਲੇ ਸਾਲ 2023 ਵਿੱਚ 24 ਅਕਤੂਬਰ ਨੂੰ ਦੁਸਹਿਰੇ ਦੇ ਦਿਨ 360 ਮਾਮਲੇ ਦਰਜ ਹੋਏ ਸਨ। ਇਸ ਤੋਂ ਪਹਿਲਾਂ 2022 ਵਿੱਚ 5 ਅਕਤੂਬਰ ਨੂੰ 130 ਮਾਮਲੇ ਤੇ 2021 ਵਿੱਚ 15 ਅਕਤੂਬਰ ਨੂੰ 660 ਮਾਮਲੇ ਸਾਹਮਣੇ ਆਏ ਸਨ। ਇਸ ਦੇ ਮੁਕਾਬਲੇ 2025 ਵਿੱਚ ਇਹ ਗਿਣਤੀ ਸ਼ੂਨ੍ਹੇ ‘ਤੇ ਆ ਗਈ ਹੈ।
ਸਖ਼ਤ ਕਾਰਵਾਈ ਦਾ ਸਿੱਧਾ ਅਸਰ
ਇਸ ਸਾਲ ਸਰਕਾਰ ਵੱਲੋਂ 15 ਸਤੰਬਰ ਤੋਂ ਹੀ ਖਰੀਫ਼ ਫਸਲ ਦੀ ਖਰੀਦ ਸ਼ੁਰੂ ਕੀਤੀ ਗਈ ਸੀ ਤਾਂ ਜੋ ਕਿਸਾਨਾਂ ਨੂੰ ਆਸਾਨੀ ਰਹੇ ਅਤੇ ਉਹ ਪਰਾਲੀ ਸਾੜਨ ਤੋਂ ਬਚ ਸਕਣ। ਪ੍ਰਸ਼ਾਸਨ ਦੀ ਸਖ਼ਤ ਨਿਗਰਾਨੀ ਕਾਰਨ ਕਿਸਾਨਾਂ ਨੇ ਪਰਾਲੀ ਨਾ ਸਾੜਨ ਦਾ ਫੈਸਲਾ ਕੀਤਾ, ਜਿਸ ਨਾਲ ਪਰਦੂਸ਼ਣ ‘ਤੇ ਕੰਟਰੋਲ ਮਿਲਿਆ।
