ਚੰਡੀਗੜ੍ਹ :- ਪੰਜਾਬੀ ਸਿਨੇਮਾ ਅਤੇ ਕਾਮੇਡੀ ਦੀ ਦੁਨੀਆ ਵਿੱਚ ਆਪਣਾ ਅਲੱਗ ਅਸਥਾਨ ਬਣਾਉਣ ਵਾਲੇ ਜਸਵਿੰਦਰ ਸਿੰਘ ਭੱਲਾ ਹੁਣ ਇਸ ਦੁਨੀਆ ਵਿੱਚ ਨਹੀਂ ਰਹੇ। ਉਨ੍ਹਾਂ ਨੇ ਸ਼ੁੱਕਰਵਾਰ ਸਵੇਰੇ ਫੋਰਟਿਸ ਹਸਪਤਾਲ, ਸੈਕਟਰ-62, ਮੁਹਾਲੀ ਵਿੱਚ ਆਖਰੀ ਸਾਹ ਲਿਆ। ਲੰਬੇ ਸਮੇਂ ਤੋਂ ਬਿਮਾਰ ਰਹਿ ਚੁੱਕੇ ਭੱਲਾ ਦਾ ਅੰਤਿਮ ਸੰਸਕਾਰ ਅੱਜ ਦੁਪਹਿਰ ਬਲੌਂਗੀ ਸ਼ਮਸ਼ਾਨਘਾਟ, ਮੁਹਾਲੀ ਵਿੱਚ ਕੀਤਾ ਜਾਵੇਗਾ।
ਸਿੱਖਿਆ ਅਤੇ ਸ਼ੁਰੂਆਤੀ ਜੀਵਨ
ਜਸਵਿੰਦਰ ਭੱਲਾ ਦਾ ਜਨਮ ਦੋਰਾਹਾ, ਲੁਧਿਆਣਾ ਵਿੱਚ ਹੋਇਆ। ਉਨ੍ਹਾਂ ਨੇ ਪੀਏਯੂ ਤੋਂ ਬੀਐਸਸੀ ਅਤੇ ਐਮਐਸਸੀ ਕੀਤੀ ਅਤੇ ਬਾਅਦ ਵਿੱਚ ਮੇਰਠ ਯੂਨੀਵਰਸਿਟੀ ਤੋਂ ਪੀਐਚਡੀ ਪ੍ਰਾਪਤ ਕੀਤੀ। 1989 ਵਿੱਚ ਭੱਲਾ ਪੀਏਯੂ ਦੇ ਐਕਸਟੈਂਸ਼ਨ ਐਜੂਕੇਸ਼ਨ ਵਿਭਾਗ ਵਿੱਚ ਅਧਿਆਪਕ ਵਜੋਂ ਸ਼ਾਮਲ ਹੋਏ ਅਤੇ 2020 ਵਿੱਚ ਪ੍ਰੋਫੈਸਰ ਵਜੋਂ ਸੇਵਾਮੁਕਤ ਹੋਏ।
ਕਾਮੇਡੀ ਅਤੇ ਫਿਲਮੀ ਯਾਤਰਾ
ਸਿੱਖਿਆ ਦੇ ਨਾਲ-ਨਾਲ ਭੱਲਾ ਕਲਾ ਅਤੇ ਹਾਸੇ ਦੇ ਮਾਹਿਰ ਵੀ ਸਨ। 1988 ਵਿੱਚ ਉਨ੍ਹਾਂ ਦੀ ਆਡੀਓ ਲੜੀ ‘ਛਣਕਟਾ 88’ ਨੇ ਪੰਜਾਬ ਦੇ ਹਰ ਘਰ ਵਿੱਚ ਹਾਸਾ ਪਹੁੰਚਾਇਆ। ਚਾਚਾ ਚਤਰ ਸਿੰਘ ਅਤੇ ਐਡਵੋਕੇਟ ਢਿੱਲੋਂ ਵਰਗੇ ਕਿਰਦਾਰ ਲੋਕਾਂ ਨੂੰ ਹਸਾਉਂਦੇ ਅਤੇ ਇਹਨਾਂ ਕਿਰਦਾਰਾਂ ਨਾਲ ਭੱਲਾ ਦੀ ਪਛਾਣ ਬਣੀ। ਫਿਲਮਾਂ ‘ਦੁੱਲਾ ਭੱਟੀ’, ‘ਮਾਲੂਲ ਠੀਕ ਹੈ’, ‘ਜੀਜਾਜੀ’, ‘ਪਾਵਰ ਕੱਟ’, ‘ਕੈਰੀ ਆਨ ਜੱਟਾ’, ‘ਜੱਟ ਐਂਡ ਜੂਲੀਅਟ’ ਅਤੇ ‘ਜਿਨੇ ਮੇਰਾ ਦਿਲ ਲੁਟਾਇਆ’ ਵਿਚ ਉਨ੍ਹਾਂ ਦੇ ਵਿਲੱਖਣ ਅੰਦਾਜ਼ ਨੇ ਦਰਸ਼ਕਾਂ ਨੂੰ ਹੱਸਣ ਤੋਂ ਰੋਕਿਆ ਨਹੀਂ।
ਕਲਾਕਾਰਾਂ ਅਤੇ ਆਮ ਲੋਕਾਂ ਦਾ ਦੁੱਖ
ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੇ ਜਸਵਿੰਦਰ ਭੱਲਾ ਦੀ ਕਾਮੇਡੀ ਅਤੇ ਹਾਸੇ ਨੂੰ ਪੰਜਾਬੀ ਸੱਭਿਆਚਾਰ ਦਾ ਅਟੂਟ ਹਿੱਸਾ ਕਹਿੰਦੇ ਹੋਏ ਦੁੱਖ ਪ੍ਰਗਟ ਕੀਤਾ। ਗਾਇਕ-ਅਦਾਕਾਰ ਗਿੱਪੀ ਗਰੇਵਾਲ ਨੇ ਕਿਹਾ ਕਿ ਉਨ੍ਹਾਂ ਦੇ ਵਿਚਾਰ ਹੁਣ ਅਧੂਰੇ ਰਹਿ ਗਏ। ਜੱਸੀ ਗਿੱਲ ਨੇ ਜ਼ਿਕਰ ਕੀਤਾ ਕਿ ਭੱਲਾ ਨਵੇਂ ਕਲਾਕਾਰਾਂ ਦਾ ਸਮਰਥਨ ਹਮੇਸ਼ਾ ਕਰਦੇ ਸਨ ਅਤੇ ਆਪਣੇ ਸੰਵਾਦਾਂ ਰਾਹੀਂ ਉਹਨਾਂ ਦੀ ਮਦਦ ਕਰਦੇ ਰਹਿੰਦੇ।
