ਚੰਡੀਗੜ੍ਹ :- ਪੰਜਾਬ ਦੇ ਸਾਰੇ 23 ਜ਼ਿਲ੍ਹੇ ਇਸ ਵੇਲੇ ਹੜ੍ਹ ਦੀ ਚਪੇਟ ਵਿੱਚ ਹਨ। ਮੀਂਹ ਰੁਕਣ ਤੋਂ ਬਾਅਦ ਕਈ ਇਲਾਕਿਆਂ ਵਿੱਚ ਪਾਣੀ ਘਟਣਾ ਸ਼ੁਰੂ ਹੋਇਆ ਹੈ, ਪਰ ਸਤਲੁਜ ਅਤੇ ਘੱਗਰ ਦਰਿਆ ਹਾਲੇ ਵੀ ਉਫਾਨ ‘ਤੇ ਹਨ। ਮਾਧੋਪੁਰ ਹੈਡਵਰਕ ਤੋਂ ਛੱਡਿਆ ਪਾਣੀ ਰਾਵੀ ਦੇ ਪਾਣੀ ਪੱਧਰ ਨੂੰ ਫਿਰ ਵਧਾ ਰਿਹਾ ਹੈ।
ਕੇਂਦਰੀ ਤੇ ਰਾਜਨੀਤਿਕ ਦੌਰੇ
ਅੱਜ ਕੇਂਦਰੀ ਖੇਤੀਬਾੜੀ ਮੰਤਰੀ ਸ਼ਿਵਰਾਜ ਸਿੰਘ ਚੌਹਾਨ, ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਅਤੇ ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਪੰਜਾਬ ਦੇ ਹਾਲਾਤਾਂ ਦਾ ਜਾਇਜ਼ਾ ਲੈਣ ਲਈ ਦੌਰੇ ‘ਤੇ ਆ ਰਹੇ ਹਨ।
ਸਭ ਤੋਂ ਵੱਧ ਨੁਕਸਾਨ ਰਾਵੀ ਨੇ ਕੀਤਾ
ਇਸ ਸਾਲ ਰਾਵੀ ਦਰਿਆ ਨੇ ਸਭ ਤੋਂ ਵੱਧ ਤਬਾਹੀ ਮਚਾਈ। ਕਈ ਪਿੰਡਾਂ ਵਿੱਚ ਪਾਣੀ ਹੌਲੀ-ਹੌਲੀ ਉਤਰ ਗਿਆ ਹੈ, ਪਰ ਘਰਾਂ ਵਿੱਚ ਰੇਤ ਜੰਮ ਗਈ ਹੈ ਅਤੇ ਖੇਤਾਂ ਵਿੱਚ ਫ਼ਸਲਾਂ ਤਬਾਹ ਹੋ ਚੁੱਕੀਆਂ ਹਨ। ਕੰਧਾਂ ‘ਚ ਦਰਾਰਾਂ, ਛੱਤਾਂ ਢਹਿ ਜਾਣ ਅਤੇ ਕੱਚੇ ਘਰ ਬਸਣ-ਜੋਗੇ ਨਾ ਰਹਿਣ ਕਾਰਨ ਲੋਕ ਮੁਆਵਜ਼ੇ ਦੀ ਉਮੀਦ ਨਾਲ ਕੇਂਦਰ ਅਤੇ ਰਾਜ ਸਰਕਾਰ ਵੱਲ ਤੱਕ ਰਹੇ ਹਨ।
ਅੰਮ੍ਰਿਤਸਰ ਵਿੱਚ ਮੁੜ ਚੜ੍ਹਦਾ ਪਾਣੀ
ਅੰਮ੍ਰਿਤਸਰ ਦੇ ਰਮਦਾਸ ਇਲਾਕੇ ‘ਚ ਰਾਤ ਤੋਂ ਰਾਵੀ ਦਾ ਪਾਣੀ ਚੜ੍ਹਣਾ ਸ਼ੁਰੂ ਹੋ ਗਿਆ ਹੈ। ਲਗਭਗ 140 ਪਿੰਡ ਪ੍ਰਭਾਵਿਤ ਹਨ। ਗੁਰਦਾਸਪੁਰ ਦੇ ਡੇਰਾ ਬਾਬਾ ਨਾਨਕ ਇਲਾਕੇ ਨੂੰ ਵੀ ਖ਼ਤਰਾ ਬਣਿਆ ਹੋਇਆ ਹੈ।
ਫਲੈਸ਼ ਅਲਰਟ ਜਾਰੀ
ਮੌਸਮ ਵਿਭਾਗ ਨੇ ਮਾਨਸਾ, ਸੰਗਰੂਰ ਅਤੇ ਬਰਨਾਲਾ ਜ਼ਿਲ੍ਹਿਆਂ ਲਈ ਤੇਜ਼ ਮੀਂਹ ਦਾ ਫਲੈਸ਼ ਅਲਰਟ ਜਾਰੀ ਕੀਤਾ ਹੈ। ਸਵੇਰੇ 9 ਵਜੇ ਤੱਕ ਇੱਥੇ ਭਾਰੀ ਮੀਂਹ ਪੈ ਸਕਦਾ ਹੈ ਅਤੇ ਨੇੜਲੇ ਇਲਾਕਿਆਂ ਵਿੱਚ ਹਲਕਾ ਮੀਂਹ ਪੈਣ ਦੀ ਸੰਭਾਵਨਾ ਹੈ।
