ਸ਼ੀਤ ਲਹਿਰ ਦੀ ਚਪੇਟ ‘ਚ ਪੰਜਾਬ, ਜਾਣੋ ਕਿੱਥੇ ਜਾਰੀ ਹੈ ਅਲਰਟ ਤੇ ਕਿੱਥੇ ਪਏਗਾ ਮੀਂਹ!

ਚੰਡੀਗੜ੍ਹ :- ਪੰਜਾਬ ਅਤੇ ਚੰਡੀਗੜ੍ਹ ਵਿੱਚ ਸਰਦੀਆਂ ਨੇ ਆਪਣਾ ਰੁੱਦਰ ਰੂਪ ਵਿਖਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਸਵੇਰੇ ਤੋਂ ਸ਼ਾਮ ਤੱਕ ਹਵਾ ਵਿੱਚ ਪੈਣ ਵਾਲੀ ਤੀਖ਼ੀ ਠੰਢ ਨੇ ਲੋਕਾਂ ਦਾ ਬਾਹਰ ਨਿਕਲਣਾ ਮੁਸ਼ਕਲ ਕਰ ਦਿੱਤਾ ਹੈ। ਮੌਸਮ ਵਿਭਾਗ ਨੇ ਅੱਜ ਸੂਬੇ ਦੇ ਅੱਠ ਜ਼ਿਲ੍ਹਿਆਂ ਲਈ ਸ਼ੀਤ ਲਹਿਰ ਦੀਆਂ ਸਥਿਤੀਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਪੀਲਾ ਅਲਰਟ ਜਾਰੀ ਕੀਤਾ ਹੈ। ਪਿਛਲੇ 24 ਘੰਟਿਆਂ ਦੌਰਾਨ ਰਾਜ ਦਾ ਪਾਰਾ 0.6 ਡਿਗਰੀ ਹੋਰ ਲੁੜਕ ਗਿਆ ਹੈ, ਜੋ ਕਿ ਮੌਸਮੀ ਮਾਪਦੰਡਾਂ ਨਾਲੋਂ ਲਗਭਗ 1.6 ਡਿਗਰੀ ਘੱਟ ਹੈ। ਧੁੰਦ ਦਾ ਪ੍ਰਕੋਪ ਵੀ ਕਦਮ-ਬ-ਕਦਮ ਵਧ ਰਿਹਾ ਹੈ, ਜੋ ਅਗਲੇ ਦਿਨਾਂ ਵਿੱਚ ਹੋਰ ਗਾਢਾ ਹੋਣ ਦੀ ਸੰਭਾਵਨਾ ਦੱਸੀ ਜਾ ਰਹੀ ਹੈ।

ਅਗਲੇ ਹਫ਼ਤੇ ਮੀਂਹ ਨਹੀਂ, ਪਰ ਧੁੰਦ ਤੇ ਠੰਢ ਹੋਰ ਵਧੇਗੀ

ਮੌਸਮ ਵਿਭਾਗ ਦੇ ਮੁਤਾਬਕ, ਆਉਣ ਵਾਲੇ ਸੱਤ ਦਿਨਾਂ ਵਿੱਚ ਬਾਰਿਸ਼ ਦੇ ਕੋਈ ਅਸਾਰ ਨਹੀਂ ਹਨ। ਆਕਾਸ਼ ਖੁਸ਼ਕ ਰਹੇਗਾ, ਪਰ ਸਵੇਰ-ਸ਼ਾਮ ਦੀ ਧੁੰਦ ਨਾਲ਼ ਦ੍ਰਿਸ਼ਟਤਾ ਪ੍ਰਭਾਵਿਤ ਹੋ ਸਕਦੀ ਹੈ।

• ਰਾਤ ਦੇ ਤਾਪਮਾਨ ਵਿੱਚ ਬਹੁਤ ਵੱਡਾ ਉਤਾਰ-ਚੜ੍ਹਾਅ ਤਾਂ ਨਹੀਂ ਆਵੇਗਾ,

• ਪਰ ਕੁਝ ਇਲਾਕਿਆਂ ਵਿੱਚ ਸਰਦੀ ਇੱਕ ਹੋਰ ਪੱਧਰ ਤੱਕ ਵਧ ਸਕਦੀ ਹੈ।

ਕਿਹੜੇ ਜ਼ਿਲ੍ਹਿਆਂ ਵਿੱਚ ਜਾਰੀ ਹੈ ਅਲਰਟ?

ਉੱਤਰੀ ਪੰਜਾਬ ਦੀ ਹਵਾਮਾਨੀ ਸਥਿਤੀ ‘ਤੇ ਵੈਸਟਰਨ ਡਿਸਟਰਬੈਂਸ ਦਾ ਅਸਰ ਨਜ਼ਰ ਆ ਰਿਹਾ ਹੈ। ਹਿਮਾਚਲ ਤੇ ਜੰਮੂ-ਕਸ਼ਮੀਰ ਤੋਂ ਆਉਣ ਵਾਲੀਆਂ ਟੰਡੀ ਹਵਾਵਾਂ ਰਾਜ ਦੀ ਠੰਢ ਹੋਰ ਵਧਾ ਰਹੀਆਂ ਹਨ।
ਇਸ ਮੌਸਮੀ ਰੁਝਾਨ ਕਾਰਨ ਅੱਜ ਜਿਨ੍ਹਾਂ ਜ਼ਿਲ੍ਹਿਆਂ ਵਿੱਚ ਸ਼ੀਤ ਲਹਿਰ ਦੀ ਸੰਭਾਵਨਾ ਦੱਸੀ ਗਈ ਹੈ, ਉਹ ਹਨ, ਫਿਰੋਜ਼ਪੁਰ, ਫਰੀਦਕੋਟ, ਮੁਕਤਸਰ, ਫਾਜ਼ਿਲਕਾ, ਬਠਿੰਡਾ, ਮੋਗਾ, ਜਲੰਧਰ ਅਤੇ ਮੋਗਾ।

ਇਨ੍ਹਾਂ ਜ਼ਿਲ੍ਹਿਆਂ ਵਿੱਚ ਘੱਟੋਂ-ਘੱਟ ਤਾਪਮਾਨ 3.2 ਡਿਗਰੀ ਤੋਂ 8.6 ਡਿਗਰੀ ਸੈਲਸੀਅਸ ਦੇ ਵਿਚਕਾਰ ਦਰਜ ਕੀਤਾ ਗਿਆ ਹੈ।

ਫਰੀਦਕੋਟ ਸਭ ਤੋਂ ਠੰਢਾ – ਸਿਹਤ ਵਿਭਾਗ ਨੇ ਦਿੱਤੀਆਂ ਖ਼ਾਸ ਹਦਾਇਤਾਂ

ਫਰੀਦਕੋਟ ਇਸ ਵੇਲੇ ਪੰਜਾਬ ਦਾ ਸਭ ਤੋਂ ਠੰਢਾ ਸਥਾਨ ਬਣ ਕੇ ਸਾਹਮਣੇ ਆਇਆ ਹੈ, ਜਿੱਥੇ ਪਾਰਾ ਸਿਰਫ਼ 3.2 ਡਿਗਰੀ ਸੈਲਸੀਅਸ ਤੱਕ ਲੁੜਕ ਗਿਆ। ਭਾਰੀ ਠੰਢ ਨੂੰ ਵੇਖਦੇ ਹੋਏ ਚੰਡੀਗੜ੍ਹ ਸਿਹਤ ਵਿਭਾਗ ਨੇ ਵਸਨੀਕਾਂ ਲਈ ਅਡਵਾਈਜ਼ਰੀ ਜਾਰੀ ਕੀਤੀ ਹੈ, ਜਿਸ ਵਿੱਚ ਖ਼ਾਸ ਤੌਰ ‘ਤੇ ਇਹ ਅਪੀਲ ਕੀਤੀ ਗਈ ਹੈ ਕਿ:

• ਜਰੂਰੀ ਕੰਮ ਤੋਂ ਇਲਾਵਾ ਲੋਕ ਘਰੋਂ ਬਾਹਰ ਨਾ ਨਿਕਲਣ,

• ਬੁਜ਼ੁਰਗ ਅਤੇ ਬੱਚਿਆਂ ਨੂੰ ਖ਼ਾਸ ਸੁਰੱਖਿਆ ਦਿੱਤੀ ਜਾਵੇ,

• ਰਾਤ ਦੇ ਸਮੇਂ ਸਰੀਰ ਨੂੰ ਗਰਮ ਰੱਖਣ ਲਈ ਪੂਰੀ ਸਾਵਧਾਨੀ ਵਰਤੀ ਜਾਵੇ।