ਚੰਡੀਗੜ੍ਹ :- ਪੰਜਾਬ ਸਰਕਾਰ ਵੱਲੋਂ ਪ੍ਰਾਪਰਟੀ ਟੈਕਸ ਡਿਫਾਲਟਰਾਂ ਲਈ ਜਾਰੀ ਕੀਤੀ ਗਈ ਵਨ ਟਾਈਮ ਸੈਟਲਮੈਂਟ (ਓਟੀਐਸ) ਸਕੀਮ ਅਧੀਨ 31 ਅਗਸਤ ਤੱਕ ਅੰਮ੍ਰਿਤਸਰ ਨਗਰ ਨਿਗਮ ਨੇ ਕੁੱਲ 15.09 ਕਰੋੜ ਰੁਪਏ ਟੈਕਸ ਇਕੱਠਾ ਕੀਤਾ ਹੈ। ਸਹਾਇਕ ਕਮਿਸ਼ਨਰ ਦਲਜੀਤ ਸਿੰਘ ਨੇ ਦੱਸਿਆ ਕਿ ਕੇਵਲ ਅਖੀਰਲੇ ਦਿਨ 34.80 ਲੱਖ ਰੁਪਏ ਦੀ ਵਸੂਲੀ ਹੋਈ।
ਪਿਛਲੇ ਸਾਲ ਨਾਲੋਂ 8.23 ਕਰੋੜ ਵੱਧ ਟੈਕਸ ਇਕੱਠਾ
ਅਧਿਕਾਰੀਆਂ ਮੁਤਾਬਕ, ਪਿਛਲੇ ਵਿੱਤੀ ਸਾਲ ਵਿੱਚ 31 ਅਗਸਤ ਤੱਕ ਸਿਰਫ਼ 6.86 ਕਰੋੜ ਰੁਪਏ ਪ੍ਰਾਪਰਟੀ ਟੈਕਸ ਇਕੱਠਾ ਕੀਤਾ ਗਿਆ ਸੀ। ਇਸ ਵਾਰ ਉਸਦੀ ਤੁਲਨਾ ਵਿੱਚ 8.23 ਕਰੋੜ ਰੁਪਏ ਵੱਧ ਇਕੱਠਾ ਹੋਇਆ ਹੈ। ਓਟੀਐਸ ਸਕੀਮ ਰਾਹੀਂ ਨਿਗਮ ਨੂੰ ਕੁੱਲ 13.75 ਕਰੋੜ ਰੁਪਏ ਮਿਲੇ।
ਸਤੰਬਰ ਤੱਕ ਭੁਗਤਾਨ ‘ਤੇ 10% ਛੂਟ ਦਾ ਲਾਭ
ਹੁਣ ਵਿੱਤੀ ਸਾਲ 2025-26 ਦਾ ਪ੍ਰਾਪਰਟੀ ਟੈਕਸ 30 ਸਤੰਬਰ ਤੱਕ ਜਮ੍ਹਾਂ ਕਰਨ ਵਾਲਿਆਂ ਨੂੰ 10 ਪ੍ਰਤੀਸ਼ਤ ਰਿਬੇਟ (ਛੂਟ) ਦਿੱਤੀ ਜਾਵੇਗੀ। ਇਹ ਸੁਵਿਧਾ ਹਰ ਸਾਲ ਸਤੰਬਰ ਦੇ ਅਖੀਰ ਤੱਕ ਟੈਕਸ ਭਰਨ ਵਾਲਿਆਂ ਲਈ ਹੁੰਦੀ ਹੈ।
ਵੱਡੀਆਂ ਪਾਰਟੀਆਂ ਤੋਂ ਸਤੰਬਰ ਮਹੀਨੇ ‘ਚ ਵੱਡੀ ਉਮੀਦ
ਪ੍ਰਾਪਰਟੀ ਟੈਕਸ ਵਿਭਾਗ ਹੁਣ ਵੱਡੀਆਂ ਪਾਰਟੀਆਂ ਤੋਂ ਵਸੂਲੀ ਲਈ ਜ਼ੋਰ ਲਗਾਏਗਾ। ਆਮ ਤੌਰ ‘ਤੇ ਸਤੰਬਰ ਮਹੀਨੇ ਵਿੱਚ ਹੀ ਨਗਰ ਨਿਗਮ ਅੰਮ੍ਰਿਤਸਰ ਨੂੰ 20 ਕਰੋੜ ਰੁਪਏ ਤੋਂ ਵੱਧ ਟੈਕਸ ਪ੍ਰਾਪਤ ਹੁੰਦਾ ਹੈ।
