ਮੁਹਾਲੀ :- ਅੱਜਕੱਲ੍ਹ ਕਿਤੇ ਵੀ ਜਾਣ ਲਈ ਆਨਲਾਈਨ ਬਾਈਕ ਜਾਂ ਕੈਬ ਬੁੱਕ ਕਰਨਾ ਬਹੁਤ ਆਸਾਨ ਹੋ ਗਿਆ ਹੈ। ਮੋਬਾਈਲ ਐਪ ਰਾਹੀਂ ਮਨਪਸੰਦ ਸਥਾਨ ‘ਤੇ ਪਹੁੰਚਣਾ ਹੁਣ ਕੋਈ ਮੁਸ਼ਕਲ ਨਹੀਂ ਰਿਹਾ। ਪਰੰਤੂ, ਇਸ ਸਹੂਲਤ ਦੇ ਨਾਲ ਕਈ ਵਾਰ ਖਤਰੇ ਵੀ ਵਧ ਰਹੇ ਹਨ। ਮੋਹਾਲੀ ਦੇ ਸੈਕਟਰ-67 ਵਿੱਚ ਇੱਕ ਅਜਿਹਾ ਹੀ ਚੌਕਾਉਂਦਾ ਮਾਮਲਾ ਸਾਹਮਣੇ ਆਇਆ ਹੈ।
ਬਾਈਕ ਰਾਈਡ ਬੁੱਕ ਕੀਤੀ, ਡਰਾਈਵਰ ਕਾਰ ਲੈ ਕੇ ਪਹੁੰਚਿਆ
ਲੜਕੀ ਵੱਲੋਂ ਮੋਬਾਈਲ ਐਪ ਰਾਹੀਂ ਬਾਈਕ ਰਾਈਡ ਬੁੱਕ ਕੀਤੀ ਗਈ ਸੀ, ਪਰ ਡਰਾਈਵਰ ਮੋਟਰਸਾਈਕਲ ਦੀ ਬਜਾਏ ਕਾਰ ਲੈ ਕੇ ਮੌਕੇ ਤੇ ਪਹੁੰਚਿਆ। ਉਸਨੇ ਲੜਕੀ ਨੂੰ ਕਿਹਾ ਕਿ ਉਹ ਕਾਰ ਵਿੱਚ ਹੀ ਚੱਲੇ ਅਤੇ ਪੈਸੇ ਬਾਈਕ ਦੇ ਹੀ ਹਿਸਾਬ ਨਾਲ ਦੇ ਦੇਵੇ। ਲੜਕੀ ਰਾਜ਼ੀ ਹੋ ਗਈ ਅਤੇ ਕਾਰ ਵਿੱਚ ਬੈਠ ਗਈ।
ਸੁੰਨਸਾਨ ਇਲਾਕੇ ਵਿੱਚ ਛੇੜਖਾਨੀ ਦੀ ਕੋਸ਼ਿਸ਼
ਰਸਤੇ ਵਿੱਚ ਡਰਾਈਵਰ ਨੇ ਕਾਰ ਨੂੰ ਗਲਤ ਦਿਸ਼ਾ ਵਿੱਚ ਲਿਜਾ ਕੇ ਸੁੰਨਸਾਨ ਥਾਂ ਤੇ ਰੋਕ ਲਿਆ ਅਤੇ ਲੜਕੀ ਨਾਲ ਛੇੜਖਾਨੀ ਕਰਨ ਦੀ ਕੋਸ਼ਿਸ਼ ਕੀਤੀ। ਲੜਕੀ ਨੇ ਸ਼ੋਰ ਮਚਾ ਕੇ ਵਿਰੋਧ ਕੀਤਾ ਜਿਸ ਦੌਰਾਨ ਉਸਨੂੰ ਹਲਕੀਆਂ ਚੋਟਾਂ ਵੀ ਲੱਗੀਆਂ।
ਪੁਲਿਸ ਦੀ ਤੁਰੰਤ ਕਾਰਵਾਈ
ਲੜਕੀ ਵੱਲੋਂ ਤੁਰੰਤ ਮੋਹਾਲੀ ਪੁਲਿਸ ਕੰਟਰੋਲ ਰੂਮ ‘ਤੇ ਕਾਲ ਕੀਤੀ ਗਈ। ਸੂਚਨਾ ਦੇ ਆਧਾਰ ‘ਤੇ ਪੁਲਿਸ ਨੇ ਕਾਰਵਾਈ ਕਰਦਿਆਂ ਥਾਣਾ ਸੋਹਾਣਾ ਵਿੱਚ ਮੁਕਦਮਾ ਦਰਜ ਕਰਕੇ ਆਰੋਪੀ ਨੂੰ ਗ੍ਰਿਫ਼ਤਾਰ ਕਰ ਲਿਆ।
ਇਸ ਤੋਂ ਪਹਿਲਾਂ ਉਦੈਪੁਰ ਵਿੱਚ ਵੀ ਸਮਾਨ ਘਟਨਾ
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਉਦੈਪੁਰ ਵਿੱਚ ਵੀ ਅਜਿਹਾ ਹੀ ਮਾਮਲਾ ਸਾਹਮਣੇ ਆਇਆ ਸੀ। ਉੱਥੇ ਇੱਕ ਵਿਅਕਤੀ ਨਾਲ ਰੈਪਿਡੋ ਰਾਈਡਰ ਬਣ ਕੇ ਹਮਲਾ ਕਰਕੇ ਲੁੱਟ ਕੀਤੀ ਗਈ ਸੀ। ਸ਼ਿਕਾਇਤਕਰਤਾ ਅਸ਼ੋਕ ਕੁਮਾਰ ਮਾਲੀ ਨੇ 6 ਜੂਨ ਦੀ ਰਾਤ ਵਾਲੀ ਇਸ ਘਟਨਾ ਸਬੰਧੀ ਸੂਰਜਪੋਲ ਪੁਲਿਸ ਸਟੇਸ਼ਨ ਵਿੱਚ ਐਫਆਈਆਰ ਦਰਜ ਕਰਵਾਈ ਸੀ। ਪੁਲਿਸ ਨੇ ਇਸ ਮਾਮਲੇ ਵਿੱਚ ਪੰਜ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ।
