ਚੰਡੀਗੜ੍ਹ :- ਪਾਕਿਸਤਾਨੀ ਡੌਨ ਸ਼ਹਿਜ਼ਾਦ ਭੱਟੀ ਹੁਣ ਪੰਜਾਬ ਦੇ ਤਰਨਤਾਰਨ ਵਿੱਚ ਗੈਂਗਾਂ ਅਤੇ ਸੋਸ਼ਲ ਮੀਡੀਆ ਇਨਫਲੂਐਂਸਰਾਂ ਵਿਚਕਾਰ ਚੱਲ ਰਹੀ ਲੜਾਈ ਵਿੱਚ ਉਤਰ ਆਇਆ ਹੈ। ਉਸਨੇ ਜੱਸ ਧਾਲੀਵਾਲ ਅਤੇ ਉਸਦੇ ਸਾਥੀ ਰੈਪਰ ਸੁਲਤਾਨ ਨੂੰ ਖੁੱਲ੍ਹੇ ਤੌਰ ‘ਤੇ ਧਮਕੀਆਂ ਦਿੱਤੀਆਂ ਹਨ। ਭੱਟੀ ਵੱਲੋਂ ਜਾਰੀ ਆਡੀਓ ਸੰਦੇਸ਼ ਵਿੱਚ ਕਿਹਾ ਗਿਆ ਕਿ ਤਰਨਤਾਰਨ ਦੋਹਰਾ ਕਤਲ ਸਿਰਫ਼ ਇੱਕ ਟ੍ਰੇਲਰ ਸੀ, ਜਿਹੜੇ ਲੋਕ ਪੱਗ ਅਤੇ ਵਾਲਾਂ ਦੀ ਬੇਅਦਬੀ ਕਰਦੇ ਹਨ, ਉਨ੍ਹਾਂ ਨੂੰ ਹੁਣ ਨਤੀਜੇ ਭੁਗਤਣੇ ਪੈਣਗੇ।
ਆਡੀਓ ਵਿੱਚ ਕੀ ਕਿਹਾ ਭੱਟੀ ਨੇ?
ਪਹਿਲੇ ਆਡੀਓ ਵਿੱਚ ਸ਼ਹਿਜ਼ਾਦ ਭੱਟੀ ਨੇ ਮਹਿਕ ਪੰਡੋਰੀ ‘ਤੇ ਹਮਲੇ ਨੂੰ ਕਾਇਰਤਾ ਕਰਾਰ ਦਿੰਦੇ ਹੋਏ ਕਿਹਾ ਕਿ ਜੇਕਰ ਹਮਲਾ ਕਿਸੇ ਆਮ ਵਿਅਕਤੀ ‘ਤੇ ਹੁੰਦਾ, ਤਾਂ ਗੱਲ ਸਮਝ ਵਿੱਚ ਆਉਂਦੀ, ਪਰ ਇੱਕ ਅਜਿਹੇ ਮੁੰਡੇ ‘ਤੇ ਹਮਲਾ ਕਰਨਾ ਜੋ ਤੁਰਨ-ਫਿਰਨ ਤੋਂ ਵੀ ਅਸਮਰੱਥ ਹੈ, ਇਹ ਸਭ ਤੋਂ ਵੱਡੀ ਗਲਤੀ ਹੈ। ਉਸਨੇ ਚੇਤਾਵਨੀ ਦਿੱਤੀ ਕਿ ਜੱਸ ਧਾਲੀਵਾਲ ਤੇ ਸੁਲਤਾਨ ਵਰਗੇ ਲੋਕ ਹੁਣ ਜਿੰਨਾ ਮਰਜ਼ੀ ਭੱਜਣ, ਬਚ ਨਹੀਂ ਸਕਣਗੇ।
ਦੂਜੇ ਆਡੀਓ ਵਿੱਚ ਭੱਟੀ ਨੇ ਖੁਲਾਸਾ ਕੀਤਾ ਕਿ ਖਾਲਿਸਤਾਨ ਪੱਖੀ ਗੈਂਗਸਟਰ ਗੋਪੀ ਘਣਸ਼ਿਆਮਪੁਰੀਆ ਉਸਦਾ ਦੋਸਤ ਹੈ ਅਤੇ ਉਸਨੂੰ ਡੋਨੀ ਬਲ ਨਾਲ ਕੋਈ ਵਿਅਕਤੀਗਤ ਰੰਜਿਸ਼ ਨਹੀਂ। ਉਸਨੇ ਕਿਹਾ ਕਿ ਪੰਡੋਰੀ ਨਾਲ ਬਦਸਲੂਕੀ ਕਰਨ ਵਾਲਿਆਂ ਲਈ ਤਰਨਤਾਰਨ ਦਾ ਦੋਹਰਾ ਕਤਲ ਇੱਕ ਡੈਮੋ ਸੀ ਅਤੇ ਇਹਨਾਂ ਲੋਕਾਂ ਨੂੰ ਅਗਲੇ ਨਤੀਜਿਆਂ ਲਈ ਤਿਆਰ ਰਹਿਣਾ ਚਾਹੀਦਾ ਹੈ।
ਤਰਨਤਾਰਨ ਵਿੱਚ ਦੋ ਜਾਨਾਂ ਗਈਆਂ
ਸੋਮਵਾਰ ਸ਼ਾਮ ਤਰਨਤਾਰਨ ਦੇ ਕੈਰੋਂ ਪਿੰਡ ਵਿੱਚ ਦੋ ਗੁੱਟਾਂ ਵਿਚਕਾਰ ਹੋਈ ਗੋਲੀਬਾਰੀ ‘ਚ ਕਰਮੂਵਾਲਾ ਪਿੰਡ ਦਾ 19 ਸਾਲਾ ਸਮਰਪ੍ਰੀਤ ਸਿੰਘ ਮੌਕੇ ‘ਤੇ ਹੀ ਮਾਰੇਆ ਗਿਆ, ਜਦੋਂਕਿ ਮਰਹਾਣਾ ਪਿੰਡ ਦਾ ਸੌਰਵ ਸਿੰਘ ਇਲਾਜ ਦੌਰਾਨ ਦਮ ਤੋੜ ਗਿਆ। ਘਟਨਾ ਤੋਂ ਬਾਅਦ, ਗੋਪੀ ਘਣਸ਼ਿਆਮਪੁਰੀਆ ਗੈਂਗ ਨੇ ਸੋਸ਼ਲ ਮੀਡੀਆ ਰਾਹੀਂ ਇਸ ਹਮਲੇ ਦੀ ਜ਼ਿੰਮੇਵਾਰੀ ਲਈ ਤੇ ਵਿਰੋਧੀਆਂ ਨੂੰ ਹੋਰ ਹਿੰਸਾ ਦੀ ਧਮਕੀ ਦਿੱਤੀ।
(ਅਸੀ ਕਥਿਤ ਆਡੀਓ ਦੀ ਪੁਸ਼ਟੀ ਨਹੀਂ ਕਰਦੇ)
