ਹਾਈਕੋਰਟ ਤੋਂ ਨਾ ਮਿਲੀ ਰਾਹਤ, ਬਿਕਰਮ ਸਿੰਘ ਮਜੀਠੀਆ ਦੀ ਪਟੀਸ਼ਨ ਖਾਰਜ!

ਚੰਡੀਗੜ੍ਹ :- ਪੰਜਾਬ ਦੇ ਸਾਬਕਾ ਕੈਬਨਿਟ ਮੰਤਰੀ ਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਮੁੱਖ ਚਿਹਰੇ ਬਿਕਰਮ ਸਿੰਘ ਮਜੀਠੀਆ ਨੂੰ ਅੱਜ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਤੋਂ ਵੱਡਾ ਝਟਕਾ ਲੱਗਾ ਹੈ। ਹਾਈਕੋਰਟ ਵੱਲੋਂ ਉਨ੍ਹਾਂ ਨੂੰ ਜ਼ਮਾਨਤ ਨਹੀਂ ਮਿਲੀ, ਜਿਸ ਕਾਰਨ ਹੁਣ ਉਨ੍ਹਾਂ ਦੀ ਕਾਨੂੰਨੀ ਟੀਮ ਨੂੰ ਸੁਪਰੀਮ ਕੋਰਟ ਦਾ ਦਰਵਾਜ਼ਾ ਖੜਕਾਉਣਾ ਪਵੇਗਾ। ਫਿਲਹਾਲ ਇਸ ਮਾਮਲੇ ਵਿੱਚ ਵਿਸਥਾਰਪੂਰਵਕ ਆਰਡਰ ਜਾਰੀ ਨਹੀਂ ਹੋਇਆ।

ਪੰਜ ਮਹੀਨੇ ਤੋਂ ਜੇਲ੍ਹ ਵਿੱਚ ਬੰਦ, 25 ਜੂਨ ਨੂੰ ਹੋਈ ਸੀ ਗ੍ਰਿਫਤਾਰੀ
ਮਜੀਠੀਆ ਨੂੰ 25 ਜੂਨ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ ਅਤੇ ਉਹ ਤਕਰੀਬਨ ਪੰਜ ਮਹੀਨੇ ਤੋਂ ਨਿਆਂਇਕ ਹਿਰਾਸਤ ਵਿੱਚ ਹਨ। ਉਨ੍ਹਾਂ ਦੇ ਮਾਮਲੇ ਵਿੱਚ ਕਈ ਤਹਾਂ ਦੀ ਜਾਂਚ ਚੱਲ ਰਹੀ ਹੈ, ਜਿਸ ਕਰਕੇ ਕਾਰਵਾਈ ਵਿਚ ਰੋਜ਼ਾਨਾ ਨਵੇਂ ਮੋੜ ਆ ਰਹੇ ਹਨ।

ਮਜੀਠੀਆ ਦੇ ਸਾਲ਼ੇ ਗਜਪਤ ਗਰੇਵਾਲ ਖ਼ਿਲਾਫ਼ ਵੀ ਕਾਰਵਾਈ ਤੇਜ਼
ਉੱਧਰ ਮੋਹਾਲੀ ਦੀ ਅਦਾਲਤ ਵਿੱਚ ਅੱਜ ਗਜਪਤ ਸਿੰਘ ਗ੍ਰੇਵਾਲ—ਜੋ ਮਜੀਠੀਆ ਦੇ ਸਾਲ਼ੇ ਹਨ—ਨੂੰ ਭਗੌੜਾ ਘੋਸ਼ਿਤ ਕਰਨ ਸਬੰਧੀ ਵਿਜ਼ੀਲੈਂਸ ਦੀ ਅਰਜ਼ੀ ’ਤੇ ਸੁਣਵਾਈ ਹੋ ਰਹੀ ਹੈ। ਗ੍ਰੇਵਾਲ ਪਹਿਲਾਂ ਹੀ ਇਸ ਕੇਸ ਵਿੱਚ ਨਾਮਜ਼ਦ ਕੀਤਾ ਜਾ ਚੁੱਕਾ ਹੈ। ਉਨ੍ਹਾਂ ਦੀ ਪੱਖੋਂ ਅੱਜ ਵਕੀਲ ਆਪਣਾ ਜਵਾਬ ਪੇਸ਼ ਕਰਨਗੇ।

ਵਿਜ਼ੀਲੈਂਸ ਦੀ ਚਾਰਜਸ਼ੀਟ—400 ਬੈਂਕ ਅਕਾਊਂਟਾਂ ਦੀ ਜਾਂਚ, 200 ਗਵਾਹ ਤਿਆਰ
ਵਿਜ਼ੀਲੈਂਸ ਬਿਊਰੋ ਮਜੀਠੀਆ ਖ਼ਿਲਾਫ਼ ਚਾਲਾਨ ਅਦਾਲਤ ਵਿੱਚ ਪੇਸ਼ ਕਰ ਚੁੱਕਾ ਹੈ। ਚਾਰਜਸ਼ੀਟ ਅਨੁਸਾਰ:

• ਦੱਸ ਸਾਲਾਂ ਦੇ 400 ਬੈਂਕ ਅਕਾਊਂਟਾਂ ਦਾ ਰਿਕਾਰਡ ਖੰਗਾਲਿਆ ਗਿਆ

• 200 ਗਵਾਹ ਕੇਸ ਵਿੱਚ ਸ਼ਾਮਲ ਕੀਤੇ ਗਏ

• ਕਈ ਅਕਾਲੀ ਅਤੇ ਬੀਜੇਪੀ ਨੇਤਾਵਾਂ ਦੇ ਬਿਆਨ ਵੀ ਦਰਜ

ਵਿਜ਼ੀਲੈਂਸ ਦਾ ਦਾਅਵਾ ਹੈ ਕਿ ਚਾਰਜਸ਼ੀਟ ਤੈਅ ਸਮੇਂ ਅਨੁਸਾਰ ਦਾਖਲ ਕੀਤੀ ਗਈ ਹੈ ਅਤੇ ਜਾਂਚ ਸਮੱਗਰੀ ਮਜਬੂਤ ਹੈ।

ਸਰਕਾਰੀ ਗਵਾਹ ਤੋਂ ਬਣਿਆ ਆਰੋਪੀ—ਹਰਪ੍ਰੀਤ ਗੁਲਾਟੀ ਦੀ ਗ੍ਰਿਫਤਾਰੀ ਨੇ ਮਾਮਲਾ ਗੰਭੀਰ ਕੀਤਾ
ਚਾਰ ਦਿਨ ਪਹਿਲਾਂ ਵਿਜ਼ੀਲੈਂਸ ਨੇ ਮਜੀਠੀਆ ਦੇ ਨਜ਼ਦੀਕੀ ਹਰਪ੍ਰੀਤ ਸਿੰਘ ਗੁਲਾਟੀ ਨੂੰ ਗ੍ਰਿਫਤਾਰ ਕੀਤਾ। ਵਿਜ਼ੀਲੈਂਸ ਅਨੁਸਾਰ ਗੁਲਾਟੀ ਪਹਿਲਾਂ ਸਰਕਾਰੀ ਗਵਾਹ ਸੀ, ਪਰ ਉਹ ਜਾਂਚ ਵਿੱਚ ਸਹਿਯੋਗ ਨਹੀਂ ਕਰ ਰਿਹਾ ਸੀ, ਜਿਸ ਕਾਰਨ ਹੁਣ ਉਸ ਨੂੰ ਮੁਲਜ਼ਮ ਬਣਾਇਆ ਗਿਆ ਹੈ।

ਗੁਲਾਟੀ ’ਤੇ ਇਹ ਦਾਅਵਾ ਵੀ ਹੈ ਕਿ ਉਸਦੇ ਜ਼ਰੀਏ ਮਜੀਠੀਆ ਨੇ ਸ਼ਿਮਲਾ ਅਤੇ ਦਿੱਲੀ ਵਿੱਚ ਸੰਪਤੀਆਂ ਖਰੀਦੀਆਂ। ਗੁਲਾਟੀ ਨੂੰ ਮੋਹਾਲੀ ਅਦਾਲਤ ਵਿੱਚ ਪੇਸ਼ ਕਰਕੇ ਵਿਜ਼ੀਲੈਂਸ ਨੇ ਛੇ ਦਿਨ ਦਾ ਰਿਮਾਂਡ ਪ੍ਰਾਪਤ ਕੀਤਾ ਹੈ।

ਗਰੇਵਾਲ ਨੂੰ ਭਗੌੜਾ ਘੋਸ਼ਿਤ ਕਰਨ ਦੀ ਕਾਰਵਾਈ ਜਾਰੀ
ਵਿਜ਼ੀਲੈਂਸ ਨੇ ਮਜੀਠੀਆ ਦੇ ਸਾਲ਼ੇ ਗਜਪਤ ਸਿੰਘ ਗਰੇਵਾਲ ਨੂੰ ਭਗੌੜਾ ਘੋਸ਼ਿਤ ਕਰਨ ਲਈ ਮੋਹਾਲੀ ਜ਼ਿਲ੍ਹਾ ਅਦਾਲਤ ਵਿੱਚ ਅਰਜ਼ੀ ਦਿੱਤੀ ਹੈ। ਇਸ ਅਰਜ਼ੀ ’ਤੇ ਅਗਲੇ ਕਦਮ 1 ਦਸੰਬਰ ਨੂੰ ਹੋਣ ਵਾਲੀ ਸੁਣਵਾਈ ਤੋਂ ਬਾਅਦ ਸਪੱਸ਼ਟ ਹੋਣਗੇ।