ਚੰਡੀਗੜ੍ਹ :- ਰਾਸ਼ਟਰੀ ਜਾਂਚ ਏਜੰਸੀ (NIA) ਨੇ ਪੰਜਾਬ ਦੇ ਸਾਬਕਾ ਮੰਤਰੀ ਮਨੋਰੰਜਨ ਕਾਲੀਆ ਦੇ ਜਲੰਧਰ ਸਥਿਤ ਘਰ ‘ਤੇ ਹੋਏ ਗ੍ਰਨੇਡ ਹਮਲੇ ਦੀ ਜਾਂਚ ਦੌਰਾਨ ਖਾਲਿਸਤਾਨ ਸਮਰਥਕਾਂ ਸਮੇਤ ਚਾਰ ਲੋਕਾਂ ਵਿਰੁੱਧ ਚਾਰਜਸ਼ੀਟ ਦਾਇਰ ਕੀਤੀ ਹੈ। ਚਾਰਜਸ਼ੀਟ ਸ਼ਨੀਵਾਰ ਨੂੰ ਚੰਡੀਗੜ੍ਹ ਦੀ ਵਿਸ਼ੇਸ਼ ਅਦਾਲਤ ਵਿੱਚ ਦਰਜ ਕੀਤੀ ਗਈ, ਜਿਸ ਵਿੱਚ ਦੋ ਗ੍ਰਿਫ਼ਤਾਰ ਅਤੇ ਦੋ ਭਗੌੜੇ ਮੁਲਜ਼ਮਾਂ ਦੇ ਨਾਮ ਸ਼ਾਮਿਲ ਹਨ।
ਗ੍ਰਿਫ਼ਤਾਰ ਮੁਲਜ਼ਮ:
ਸੈਦੁਲ ਅਮੀਨ, ਅਮਰੋਹਾ, ਉੱਤਰ ਪ੍ਰਦੇਸ਼
ਅਭਿਜੋਤ ਜਾਂਗਰਾ, ਕੁਰੂਕਸ਼ੇਤਰ, ਹਰਿਆਣਾ
ਭਗੌੜੇ ਮੁਲਜ਼ਮ:
ਕੁਲਬੀਰ ਸਿੰਘ ਸਿੱਧੂ, ਯਮੁਨਾਨਗਰ, ਹਰਿਆਣਾ
ਮਨੀਸ਼ ਉਰਫ਼ ਕਾਕਾ ਰਾਣਾ, ਕਰਨਾਲ, ਹਰਿਆਣਾ
ਹਮਲੇ ਦਾ ਮਕਸਦ: ਖਾਲਿਸਤਾਨ ਪੱਖੀ ਅੱਤਵਾਦੀ ਗਿਰੋਹ
NIA ਦੇ ਬਿਆਨ ਅਨੁਸਾਰ, ਇਹ ਹਮਲਾ ਬੱਬਰ ਖਾਲਸਾ ਇੰਟਰਨੈਸ਼ਨਲ (BKI) ਲਈ ਫੰਡ ਇਕੱਠਾ ਕਰਨ ਅਤੇ ਪੰਜਾਬ ਵਿੱਚ ਪ੍ਰਮੁੱਖ ਨੇਤਾਵਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਇੱਕ ਸਾਜ਼ਿਸ਼ ਦਾ ਹਿੱਸਾ ਸੀ। ਗ੍ਰਿਫ਼ਤਾਰ ਦੋਸ਼ੀਆਂ ਨੇ ਇਸ ਨੈੱਟਵਰਕ ਦੇ ਨਿਰਦੇਸ਼ਾਂ ‘ਤੇ ਕੰਮ ਕੀਤਾ, ਜਦਕਿ ਭਗੌੜੇ ਸਿੱਧੂ ਅਤੇ ਮਨੀਸ਼ ਹਮਲੇ ਦੀ ਯੋਜਨਾ ਬਣਾਉਣ ਅਤੇ ਅਮੀਨ ਨੂੰ ਭਰਤੀ ਕਰਨ ਲਈ ਜ਼ਿੰਮੇਵਾਰ ਸਨ।
ਘਟਨਾ ਦਾ ਵੇਰਵਾ: ਮਨੋਰੰਜਨ ਕਾਲੀਆ ਦੇ ਘਰ ‘ਤੇ ਹਮਲਾ
7 ਅਪ੍ਰੈਲ, 2025 ਦੀ ਰਾਤ ਨੂੰ ਮਨੋਰੰਜਨ ਕਾਲੀਆ ਦੇ ਜਲੰਧਰ ਸਥਿਤ ਘਰ ‘ਤੇ ਗ੍ਰਨੇਡ ਸੁੱਟਿਆ ਗਿਆ। ਬਿਆਨ ਦੇ ਅਨੁਸਾਰ, ਮਨੀਸ਼ ਨੇ ਅਮੀਨ ਨੂੰ ਗ੍ਰਨੇਡ ਪ੍ਰਦਾਨ ਕੀਤਾ ਅਤੇ ਅਭਿਜੋਤ ਜਾਂਗਰਾ ਨੇ ਫੰਡ ਮੁਹੱਈਆ ਕਰਵਾਈ। ਹਮਲੇ ਤੋਂ ਬਾਅਦ ਸਿੱਧੂ ਵੱਲੋਂ ਇੱਕ ਪੋਸਟਰ ਜਾਰੀ ਕੀਤਾ ਗਿਆ, ਜਿਸ ਵਿੱਚ ਉਸਨੇ ਮਨੀਸ਼ ਨਾਲ ਸਾਜ਼ਿਸ਼ ਕਰਨ ਦੀ ਜ਼ਿੰਮੇਵਾਰੀ ਮੰਨੀ।
ਸਿੱਧੂ ਵਿਰੁੱਧ ‘ਰੈੱਡ ਕਾਰਨਰ’ ਨੋਟਿਸ ਜਾਰੀ ਕੀਤਾ ਗਿਆ ਹੈ ਅਤੇ ਉਸ ਦੀ ਗ੍ਰਿਫਤਾਰੀ ਲਈ 10 ਲੱਖ ਰੁਪਏ ਇਨਾਮ ਦਾ ਐਲਾਨ ਕੀਤਾ ਗਿਆ।
ਪਹਿਲਾਂ ਵੀ ਸੀ ਜ਼ੁੜੇ ਹੋਏ ਮਾਮਲੇ
NIA ਨੇ ਪਹਿਲਾਂ ਅਪ੍ਰੈਲ 2024 ਵਿੱਚ BKI ਦੇ ਸਬੰਧਤ ਮਾਮਲੇ ਵਿੱਚ ਸਿੱਧੂ ਦੇ ਖ਼ਿਲਾਫ਼ ਚਾਰਜਸ਼ੀਟ ਦਾਇਰ ਕੀਤੀ ਸੀ, ਜਿਸ ਵਿੱਚ ਭਾਰਤ ਵਿੱਚ ਵਿਸ਼ਵ ਹਿੰਦੂ ਪ੍ਰੀਸ਼ਦ (VHP) ਦੇ ਨੇਤਾ ਵਿਕਾਸ ਪ੍ਰਭਾਕਰ ਨੂੰ ਨਿਸ਼ਾਨਾ ਬਣਾਉਣ ਦੀ ਕੋਸ਼ਿਸ਼ ਸ਼ਾਮਿਲ ਸੀ। ਏਜੰਸੀ ਨੇ ਭਗੌੜਿਆਂ ਦੀ ਪਛਾਣ ਅਤੇ ਗ੍ਰਿਫਤਾਰੀ ਲਈ ਆਪਣੀਆਂ ਕੋਸ਼ਿਸ਼ਾਂ ਤੇਜ਼ ਕਰ ਦਿੱਤੀਆਂ ਹਨ।
