ਜਲੰਧਰ :- ਜਲੰਧਰ ਦੇ ਮਾਡਲ ਟਾਊਨ ‘ਚ ਸ਼ਨੀਵਾਰ ਰਾਤ ਵਾਪਰੇ ਸੜਕ ਹਾਦਸੇ ਵਿਚ ਸਾਬਕਾ ਸੰਸਦ ਮੈਂਬਰ ਮਹਿੰਦਰ ਸਿੰਘ ਕੇਪੀ ਦੇ ਪੁੱਤਰ ਰਿਚੀ ਕੇਪੀ ਦੀ ਮੌਤ ਤੋਂ ਬਾਅਦ ਮਾਮਲਾ ਹੁਣ ਪੂਰੀ ਤਰ੍ਹਾਂ ਨਵੀਂ ਦਿਸ਼ਾ ਵੱਲ ਵਧਦਾ ਦਿਖ ਰਿਹਾ ਹੈ। ਪੁਲਸ ਵੱਲੋਂ ਕ੍ਰੇਟਾ ਤੇ ਵਿਟਾਰਾ ਗੱਡੀਆਂ ਦੇ ਚਾਲਕਾਂ ਖ਼ਿਲਾਫ਼ ਕਾਰਵਾਈ ਹੋ ਰਹੀ ਹੈ ਪਰ ਵਿਟਾਰਾ ਚਾਲਕ ਦਾ ਪਰਿਵਾਰ ਸਾਹਮਣੇ ਆ ਕੇ ਪੁਲਸ ਦੀ ਕਾਰਗੁਜ਼ਾਰੀ ‘ਤੇ ਸਵਾਲ ਖੜ੍ਹੇ ਕਰ ਰਿਹਾ ਹੈ।
ਸੁਧਾ ਕਪੂਰ ਦਾ ਬਿਆਨ
ਵਿਟਾਰਾ ਚਾਲਕ ਦੀ ਮਾਂ ਸੁਧਾ ਕਪੂਰ ਨੇ ਕਿਹਾ ਕਿ ਅਸਲ ਹਾਦਸਾ ਮਾਤਾ ਰਾਣੀ ਚੌਂਕ ‘ਚ ਹੋਇਆ ਸੀ। ਸਭ ਤੋਂ ਪਹਿਲਾਂ ਕ੍ਰੇਟਾ ਨੇ ਫਾਰਚਿਊਨਰ ਨੂੰ ਟੱਕਰ ਮਾਰੀ ਅਤੇ ਫਾਰਚਿਊਨਰ ਉਲਟ ਕੇ ਸਿੱਧਾ ਉਨ੍ਹਾਂ ਦੀ ਵਿਟਾਰਾ ਨਾਲ ਟਕਰਾ ਗਿਆ। ਉਸ ਵੇਲੇ ਕਾਰ ਵਿਚ ਉਹਨਾਂ ਦਾ ਬੇਟਾ, ਨੂੰਹ ਅਤੇ ਪੋਤੀ ਸਨ ਜੋ ਗੰਭੀਰ ਜ਼ਖ਼ਮੀ ਹੋਏ ਅਤੇ ਬੇਹੋਸ਼ ਅਵਸਥਾ ਵਿਚ ਲੋਕਾਂ ਵੱਲੋਂ ਬਚਾਏ ਗਏ। ਪਰਿਵਾਰ ਦਾ ਕਹਿਣਾ ਹੈ ਕਿ ਉਹ ਵੀ ਹਾਦਸੇ ਦੇ ਪੀੜਤ ਹਨ, ਪਰ ਉਨ੍ਹਾਂ ਨੂੰ ਦੋਸ਼ੀ ਬਣਾਉਣਾ ਪੂਰੀ ਤਰ੍ਹਾਂ ਗਲਤ ਹੈ।
ਐੱਫਆਈਆਰ ‘ਤੇ ਵਿਰੋਧ
ਸੁਧਾ ਕਪੂਰ ਨੇ ਇਹ ਵੀ ਦਾਅਵਾ ਕੀਤਾ ਕਿ ਸ਼ੁਰੂਆਤ ਵਿਚ ਪੁਲਸ ਨੇ ਕ੍ਰੇਟਾ ਚਾਲਕ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਸੀ ਪਰ ਬਾਅਦ ‘ਚ ਉਨ੍ਹਾਂ ਦੀ ਵਿਟਾਰਾ ਨੂੰ ਹੀ ਦੋਸ਼ੀ ਕਹਿ ਕੇ ਨਵੀਂ ਐੱਫਆਈਆਰ ਦਰਜ ਕਰ ਦਿੱਤੀ। ਪਰਿਵਾਰ ਦੀ ਮੰਗ ਹੈ ਕਿ ਪੁਲਸ ਇਸ ਮਾਮਲੇ ਵਿਚ ਬਿਨਾਂ ਪੱਖਪਾਤ ਦੇ ਜਾਂਚ ਕਰੇ।
ਭਰਾ ਵਿਕ੍ਰਾਂਤ ਕਪੂਰ ਦੇ ਦੋਸ਼
ਵਿਟਾਰਾ ਚਾਲਕ ਦੇ ਭਰਾ ਵਿਕ੍ਰਾਂਤ ਕਪੂਰ ਦਾ ਕਹਿਣਾ ਹੈ ਕਿ ਹਾਦਸੇ ਵਿਚ ਉਨ੍ਹਾਂ ਦੀ ਕਾਰ ਵੀ ਪੂਰੀ ਤਰ੍ਹਾਂ ਤਬਾਹ ਹੋ ਗਈ ਅਤੇ ਸਾਰੇ ਮੈਂਬਰ ਇਸ ਵੇਲੇ ਹਸਪਤਾਲ ਵਿਚ ਇਲਾਜ ਅਧੀਨ ਹਨ। ਉਸ ਨੇ ਦਲੀਲ ਦਿੱਤੀ ਕਿ ਸੀਸੀਟੀਵੀ ਫੁਟੇਜ ਸਾਬਤ ਕਰ ਰਿਹਾ ਹੈ ਕਿ ਫਾਰਚਿਊਨਰ ਦੀ ਟੱਕਰ ਕਾਰਨ ਉਨ੍ਹਾਂ ਦੀ ਵਿਟਾਰਾ ਬੇਕਾਬੂ ਹੋਈ। ਵਿਕ੍ਰਾਂਤ ਨੇ ਪੁਲਸ ‘ਤੇ ਪੱਖਪਾਤ ਦੇ ਦੋਸ਼ ਲਗਾ ਕੇ ਕਮਿਸ਼ਨਰ ਕੋਲ ਨਿਰਪੱਖ ਜਾਂਚ ਦੀ ਅਪੀਲ ਕੀਤੀ।
ਹੋਰ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਦੀ ਮੰਗ
ਪਰਿਵਾਰ ਨੇ ਕਿਹਾ ਕਿ ਉਨ੍ਹਾਂ ਨੂੰ ਰਿਚੀ ਕੇਪੀ ਦੀ ਮੌਤ ‘ਤੇ ਗਹਿਰਾ ਦੁੱਖ ਹੈ, ਪਰ ਪੁਲਸ ਵੱਲੋਂ ਉਨ੍ਹਾਂ ‘ਤੇ ਝੂਠਾ ਦੋਸ਼ ਮੜ੍ਹਣਾ ਨਾਈਂਸਾਫ਼ੀ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਸਿਰਫ਼ ਇਕ ਨਹੀਂ ਸਗੋਂ ਇਲਾਕੇ ਵਿਚ ਲੱਗੇ ਸਾਰੇ ਸੀਸੀਟੀਵੀ ਕੈਮਰੇ ਖੰਗਾਲੇ ਜਾਣ ਤਾਂ ਕਿ ਹਾਦਸੇ ਦੀ ਸੱਚਾਈ ਸਾਹਮਣੇ ਆ ਸਕੇ।
