ਚੰਡੀਗੜ੍ਹ :- ਪੰਜਾਬ ਸਰਕਾਰ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਪਿੰਡਾਂ ਨੂੰ ਭਰੋਸੇਮੰਦ ਅਤੇ ਸੁਵਿਧਾਜਨਕ ਸੜਕਾਂ ਨਾਲ ਜੋੜਨ ਦੇ ਸੁਪਨੇ ਨੂੰ ਅੱਗੇ ਵਧਾਉਂਦਿਆਂ, ਰਾਜਪੁਰਾ ਦੀ ਵਿਧਾਇਕ ਨੀਨਾ ਮਿੱਤਲ ਨੇ ਅੱਜ ਪਿੰਡ ਨਲਾਸ ਤੋਂ ਬਖਸ਼ੀਵਾਲਾ ਤੱਕ ਲਗਭਗ 4 ਕਿਲੋਮੀਟਰ ਲੰਬੀ ਨਵੀਂ ਸੜਕ ਦਾ ਉਦਘਾਟਨ ਕੀਤਾ। ਇਸ ਪ੍ਰੋਜੈਕਟ ਦੀ ਲਾਗਤ ਲਗਭਗ 65 ਲੱਖ ਰੁਪਏ ਆਂਕੀ ਗਈ ਹੈ।
ਸ਼ਿਵ ਮੰਦਿਰ ਵਿੱਚ ਰਿਵਾਇਤੀ ਤਰੀਕੇ ਨਾਲ ਸੜਕ ਕੰਮ ਦੀ ਸ਼ੁਰੂਆਤ
ਉਦਘਾਟਨ ਸਮਾਰੋਹ ਦੌਰਾਨ ਪਿੰਡ ਨਲਾਸ ਦੇ ਸ਼ਿਵ ਮੰਦਿਰ ਦੇ ਮੁੱਖ ਸੇਵਾਦਾਰ ਮਹਾਰਾਜ ਸੰਤ ਗਿਰੀ ਜੀ ਨੇ ਨਾਰੀਅਲ ਤੋੜ ਕੇ ਸੜਕ ਕੰਮ ਦੀ ਸ਼ੁਰੂਆਤ ਕੀਤੀ। ਇਸ ਮੌਕੇ ਪਿੰਡ ਦੇ ਲੋਕਾਂ ਦੇ ਨਾਲ-ਨਾਲ ਪੀਡਬਲਯੂਡੀ ਵਿਭਾਗ ਦੇ ਐਸਡੀਓ ਯਾਦਵਿੰਦਰ ਸ਼ਰਮਾ ਅਤੇ ਹੋਰ ਅਧਿਕਾਰੀ ਵੀ ਮੌਜੂਦ ਸਨ।
ਉੱਚ ਕੁਆਲਟੀ ਮਟੀਰੀਅਲ ਨਾਲ ਬਣਾਈ ਜਾਵੇਗੀ ਸੜਕ
ਪੀਡਬਲਯੂਡੀ ਐਸਡੀਓ ਯਾਦਵਿੰਦਰ ਸ਼ਰਮਾ ਨੇ ਦੱਸਿਆ ਕਿ ਨਵੀਂ ਸੜਕ ਸਰਕਾਰੀ ਮਿਆਰ ਅਨੁਸਾਰ ਉੱਚ ਕੁਆਲਟੀ ਦੇ ਮਟੀਰੀਅਲ ਨਾਲ ਤਿਆਰ ਕੀਤੀ ਜਾਵੇਗੀ। ਠੇਕੇਦਾਰ ਨੇ ਇਸ ਸੜਕ ‘ਤੇ ਪੰਜ ਸਾਲ ਦੀ ਗਰੰਟੀ ਵੀ ਦਿੱਤੀ ਹੈ। ਜੇਕਰ ਕਿਸੇ ਸਮੇਂ ਦੌਰਾਨ ਸੜਕ ਵਿੱਚ ਕੋਈ ਖਾਮੀ ਆਉਂਦੀ ਹੈ, ਤਾਂ ਉਸ ਦੀ ਮੁਰੰਮਤ ਠੇਕੇਦਾਰ ਵੱਲੋਂ ਕੀਤੀ ਜਾਵੇਗੀ।
ਪਿੰਡਾਂ ਦੇ ਲੋਕਾਂ ਲਈ ਆਵਾਜਾਈ ਵਿੱਚ ਸੁਵਿਧਾ
ਵਿਧਾਇਕ ਨੀਨਾ ਮਿੱਤਲ ਨੇ ਕਿਹਾ ਕਿ ਪੰਜਾਬ ਸਰਕਾਰ ਦਾ ਮਕਸਦ ਹੈ ਕਿ ਹਰ ਪਿੰਡ ਸੁਵਿਧਾਜਨਕ ਸੜਕਾਂ ਨਾਲ ਜੁੜੇ, ਤਾਂ ਜੋ ਲੋਕਾਂ ਨੂੰ ਆਵਾਜਾਈ ਵਿੱਚ ਕੋਈ ਰੁਕਾਵਟ ਨਾ ਹੋਵੇ। ਉਨ੍ਹਾਂ ਭਰੋਸਾ ਦਿਵਾਇਆ ਕਿ ਸੜਕ ਕੁਝ ਹੀ ਮਹੀਨਿਆਂ ਵਿੱਚ ਪੂਰੀ ਤਰ੍ਹਾਂ ਤਿਆਰ ਹੋ ਕੇ ਲੋਕਾਂ ਦੇ ਹਵਾਲੇ ਕਰ ਦਿੱਤੀ ਜਾਵੇਗੀ।
