ਲੁਧਿਆਣਾ :- ਲੁਧਿਆਣਾ ਦੇ ਭਾਈਵਾਲਾ ਚੌਕ–ਨਾਨਕਸਰ ਫਲਾਈਓਵਰ ’ਤੇ ਸ਼ੁੱਕਰਵਾਰ ਦੇਰ ਰਾਤ ਇਕ ਦਹਿਲਾ ਦੇਣ ਵਾਲਾ ਸੜਕ ਹਾਦਸਾ ਸਾਹਮਣੇ ਆਇਆ। CNG ਨਾਲ ਚੱਲ ਰਹੇ ਟਰੱਕ ਦੇ ਸਿਲੰਡਰ ਵਿਚ ਜ਼ੋਰਦਾਰ ਧਮਾਕੇ ਨਾਲ ਅੱਗ ਲੱਗ ਗਈ ਅਤੇ ਡਰਾਈਵਰ ਕੈਬਿਨ ਵਿਚ ਫਸ ਕੇ ਹੀ ਜਿੰਦਾ ਸੜ ਗਿਆ। ਅੱਗ ਇੰਨੀ ਤੇਜ਼ ਸੀ ਕਿ ਮੌਕੇ ’ਤੇ ਮੌਜੂਦ ਲੋਕ ਚੀਕਾਂ ਮਾਰਦੇ ਡਰਾਈਵਰ ਦੇ ਨੇੜੇ ਵੀ ਨਹੀਂ ਪਹੁੰਚ ਸਕੇ।
ਟੱਕਰ ਤੋਂ ਬਾਅਦ ਲੱਗੀ ਅੱਗ, ਬਚਾਅ ਦੀ ਕੋਈ ਸੰਭਾਵਨਾ ਨਹੀਂ ਰਹੀ
ਮ੍ਰਿਤਕ ਦੀ ਪਛਾਣ ਭੂਸ਼ਣ ਵਜੋਂ ਹੋਈ ਹੈ, ਜੋ ਮਾਲਵਾ ਟਰਾਂਸਪੋਰਟ ਦੇ ਟਰੱਕ ’ਤੇ ਸਾਮਾਨ ਲੈ ਕੇ ਫਿਰੋਜ਼ਪੁਰ ਰੋਡ ਵੱਲ ਜਾ ਰਿਹਾ ਸੀ। ਚਸ਼ਮਦੀਦਾਂ ਮੁਤਾਬਕ, ਟਰੱਕ ਫਲਾਈਓਵਰ ’ਤੇ ਮੇਨ ਬੋਰਡ ਵਾਲੇ ਪਿੱਲਰ ਨਾਲ ਟਕਰਾਇਆ, ਜਿਸ ਨਾਲ ਅਗਲਾ ਹਿੱਸਾ ਸੜਨਾ ਸ਼ੁਰੂ ਹੋਇਆ। ਸਿਲੰਡਰ ਫਟਣ ਨਾਲ ਅੱਗ ਪਲ ਭਰ ਵਿੱਚ ਪੂਰੇ ਟਰੱਕ ਵਿਚ ਫੈਲ ਗਈ ਅਤੇ ਡਰਾਈਵਰ ਕੈਬਿਨ ਵਿਚ ਕੈਦ ਹੋ ਗਿਆ।
ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਦੇਰ ਰਾਤ ਮੌਕੇ ’ਤੇ ਪਹੁੰਚੀਆਂ
ਫਾਇਰ ਅਧਿਕਾਰੀ ਰਾਜਿੰਦਰ ਕੁਮਾਰ ਨੇ ਦੱਸਿਆ ਕਿ ਰਾਤ 11:30 ਵਜੇ ਜਾਣਕਾਰੀ ਮਿਲਣ ’ਤੇ 2–3 ਗੱਡੀਆਂ ਅੱਗ ਬੁਝਾਉਣ ਲਈ ਭੇਜੀਆਂ ਗਈਆਂ। ਟਰੱਕ ਵਿਚ ਦਵਾਈਆਂ ਦੇ ਪਾਰਸਲ ਹੋਣ ਕਾਰਨ ਅੱਗ ਹੋਰ ਵੀ ਭਭਕ ਉਠੀ। ਗਾੜ੍ਹੇ ਧੂੰਏ ਨੇ ਰਾਹਤ ਕੰਮ ਮੁਸ਼ਕਲ ਕਰ ਦਿੱਤਾ ਅਤੇ ਡਰਾਈਵਰ ਕਰੀਬ ਅੱਧਾ ਘੰਟਾ ਲਪਟਾਂ ਵਿਚ ਫਸਿਆ ਰਿਹਾ।
ਪੁਲਿਸ ਵੱਲੋਂ ਜਾਂਚ ਸ਼ੁਰੂ, ਸਿਲੰਡਰ ਧਮਾਕੇ ਨੂੰ ਮੁੱਖ ਕਾਰਨ ਮੰਨਿਆ
ਜਾਂਚ ਅਫਸਰ ਮੇਵਾ ਸਿੰਘ ਅਨੁਸਾਰ ਪ੍ਰਾਰੰਭਿਕ ਜਾਂਚ ਵਿਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਟੱਕਰ ਕਾਰਨ CNG ਸਿਲੰਡਰ ਨੂੰ ਝਟਕਾ ਲੱਗਿਆ, ਜਿਸ ਤੋਂ ਬਾਅਦ ਸਿਲੰਡਰ ਫਟ ਗਿਆ। ਪੁਲਿਸ ਨੇ ਸਥਾਨ ਤੋਂ ਸਬੂਤ ਇਕੱਠੇ ਕਰਕੇ ਮਾਮਲੇ ਦੀ ਵਿਸਥਾਰਪੂਰਵਕ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
