ਤਰਨਤਾਰਨ :- ਤਰਨਤਾਰਨ ਉਪਚੋਣ ਦੌਰਾਨ ਦਰਜ ਕੀਤੇ ਗਏ ਚਾਰ ਮਾਮਲਿਆਂ ਤੋਂ ਬਾਅਦ, ਅਕਾਲੀ ਦਲ ਉਮੀਦਵਾਰ ਸੁਖਵਿੰਦਰ ਕੌਰ ਦੀ ਧੀ ਕੰਚਨਪ੍ਰੀਤ ਕੌਰ ਅੱਜ ਪਹਿਲੀ ਵਾਰ ਮਜੀਠਾ ਪੁਲਿਸ ਸਟੇਸ਼ਨ ਪਹੁੰਚੀ। ਉੱਥੇ ਉਸਨੇ ਜਾਂਚ ਅਧਿਕਾਰੀਆਂ ਅੱਗੇ ਆਪਣਾ ਬਿਆਨ ਦਰਜ ਕਰਵਾਇਆ। ਇਸ ਮੌਕੇ ਅਕਾਲੀ ਦਲ ਦੇ ਸੀਨੀਅਰ ਆਗੂ ਵਿਰਸਾ ਸਿੰਘ ਵਲਟੋਹਾ ਵੀ ਉਸਦੇ ਨਾਲ ਮੌਜੂਦ ਸਨ।
ਮੈਨੂੰ ਅਦਾਲਤ ਤੋਂ ਪੂਰੀ ਉਮੀਦ ਹੈ – ਕੰਚਨਪ੍ਰੀਤ
ਥਾਣੇ ਬਾਹਰ ਮੌਜੂਦ ਮੀਡੀਆ ਨੂੰ ਕੰਚਨਪ੍ਰੀਤ ਨੇ ਬਹੁਤ ਹੀ ਸੀਮਿਤ ਟਿੱਪਣੀ ਕੀਤੀ। ਉਹਨਾਂ ਕਿਹਾ “ਮੈਨੂੰ ਅਦਾਲਤ ‘ਤੇ ਪੂਰਾ ਭਰੋਸਾ ਹੈ।”
ਇਸ ਤੋਂ ਬਾਅਦ ਉਹ ਹੋਰ ਕੋਈ ਸਵਾਲ ਜਵਾਬ ਕੀਤੇ ਬਿਨਾਂ ਥਾਣੇ ਅੰਦਰ ਚਲੀ ਗਈ।
ਵਲਟੋਹਾ ਦੇ ਤਿੱਖੇ ਸ਼ਬਦ : ਕਿਸੇ ਕੁੜੀ ਨੂੰ ਨਿਸ਼ਾਨਾ ਬਣਾਉਣਾ ਪੰਜਾਬ ਦੀ ਰੀਤ ਨਹੀਂ
ਮੀਡੀਆ ਨਾਲ ਗੱਲਬਾਤ ਦੌਰਾਨ ਵਲਟੋਹਾ ਨੇ ਮਾਮਲੇ ਨੂੰ ਸਾਫ ਸਿਆਸੀ ਕਰਾਰ ਦਿੰਦਿਆਂ ਕਿਹਾ ਕਿ ਮੌਜੂਦਾ ਸਰਕਾਰ ਨੇ ਰਾਜਨੀਤਿਕ ਲਾਭ ਲਈ ਇੱਕ ਨੌਜਵਾਨ ਕੁੜੀ ਵਿਰੁੱਧ ਧੜਾਧੜ ਕੇਸ ਦਰਜ ਕੀਤੇ ਹਨ। ਉਹਨਾਂ ਕਿਹਾ ਪੰਜਾਬ ਵਿੱਚ ਵਿਰੋਧੀਆਂ ਦੀਆਂ ਬੇਟੀਆਂ ਦਾ ਵੀ ਸਤਿਕਾਰ ਹੁੰਦਾ ਹੈ, ਪਰ ਪਹਿਲੀ ਵਾਰ ਇੱਕ ਕੁੜੀ ਨੂੰ ਰੋਕਣ ਲਈ ਕੇਸਾਂ ਦੀ ਵਰਖਾ ਕੀਤੀ ਜਾ ਰਹੀ ਹੈ।
ਅਦਾਲਤ ਵੱਲੋਂ ਗ੍ਰਿਫ਼ਤਾਰੀ ਤੋਂ ਰਾਹਤ, ਨਵਾਂ ਕੇਸ ਦਰਜ ਕਰਨ ਲਈ 7 ਦਿਨ ਦੀ ਸ਼ਰਤ
ਵਲਟੋਹਾ ਨੇ ਦੱਸਿਆ ਕਿ ਅਦਾਲਤ ਨੇ ਕੰਚਨਪ੍ਰੀਤ ਨੂੰ ਵੱਡੀ ਰਾਹਤ ਦਿੱਤੀ ਹੈ —
-
ਗ੍ਰਿਫ਼ਤਾਰੀ ਤੋਂ ਸੁਰੱਖਿਆ
-
ਕਿਸੇ ਵੀ ਨਵੇਂ ਕੇਸ ਤੋਂ 7 ਦਿਨ ਪਹਿਲਾਂ ਨੋਟਿਸ ਜ਼ਰੂਰੀ
ਵਲਟੋਹਾ ਨੇ ਇਸਨੂੰ “ਨਿਆਂ ਦੀ ਜਿੱਤ” ਕਰਾਰ ਦਿੱਤਾ।
ਇਮਾਨਦਾਰ SSP ਨੂੰ ਸਜ਼ਾ – ਕਿਉਂਕਿ ਉਹ ਗ੍ਰਿਫ਼ਤਾਰ ਨਹੀਂ ਕਰ ਸਕਿਆ
ਵਲਟੋਹਾ ਨੇ ਹੋਰ ਗੰਭੀਰ ਦੋਸ਼ ਲਗਾਉਂਦੇ ਹੋਏ ਕਿਹਾ ਕਿ ਕੰਚਨਪ੍ਰੀਤ ਨੂੰ ਗ੍ਰਿਫ਼ਤਾਰ ਨਾ ਕਰ ਸਕਣ ਕਾਰਨ ਸਰਕਾਰ ਨੇ ਇੱਕ ਇਮਾਨਦਾਰ SSP ਨੂੰ ਮੁਅੱਤਲ ਕਰ ਦਿੱਤਾ, ਜੋ ਕਿ ਪ੍ਰਸ਼ਾਸਨ ‘ਤੇ ਰਾਜਨੀਤਿਕ ਦਬਾਅ ਦਾ ਸਾਫ਼ ਇਸ਼ਾਰਾ ਹੈ।
ਉਹਨਾਂ ਕਿਹਾ “ਸਰਕਾਰੀ ਮਸ਼ੀਨਰੀ ਦਾ ਇਸ ਤਰ੍ਹਾਂ ਦੁਰਵਰਤੋਂ ਹੋਣਾ ਨੌਜਵਾਨ ਅਧਿਕਾਰੀਆਂ ਦੇ ਮਨੋਬਲ ‘ਤੇ ਵੱਡਾ ਵਾਰ ਹੈ।
2027 ‘ਚ ਵਿਧਾਇਕ ਬਣਨ ਵਾਲੀ ਕੁੜੀ ਨੂੰ ਬਦਨਾਮ ਕਰਨ ਦੀ ਕੋਸ਼ਿਸ਼
ਵਲਟੋਹਾ ਨੇ ਦਾਅਵਾ ਕੀਤਾ ਕਿ ਕੰਚਨਪ੍ਰੀਤ ਦੀ ਲੋਕਪ੍ਰਿਯਤਾ ਇਸ ਹੱਦ ਤੱਕ ਵਧ ਗਈ ਹੈ ਕਿ ਪ੍ਰਸ਼ਾਸਨਕ ਅਧਿਕਾਰੀ ਵੀ ਕਹਿਰੇ ਹਨ ਕਿ ਉਹ 2027 ਵਿੱਚ ਵਿਧਾਇਕ ਬਣ ਸਕਦੀ ਹੈ। ਉਹਨਾਂ ਕਿਹਾ ਲੋਕਪ੍ਰਿਯਤਾ ਤੋਂ ਡਰ ਕੇ ਹੀ ਇਹ ਕਾਰਵਾਈਆਂ ਕੀਤੀਆਂ ਜਾ ਰਹੀਆਂ ਹਨ।
