ਗੁਰਦਾਸਪੁਰ :- ਗੁਰਦਾਸਪੁਰ ‘ਚ ਦੇਰ ਰਾਤ ਇੱਕ ਮੈਡੀਕਲ ਸਟੋਰ ‘ਤੇ ਅਜੀਬੋ-ਗਰੀਬ ਘਟਨਾ ਸਾਹਮਣੇ ਆਈ ਹੈ। ਕਾਰ ਸਵਾਰ ਕੁਝ ਨੌਜਵਾਨ ਗਾਹਕ ਬਣ ਕੇ ਦੁਕਾਨ ‘ਤੇ ਪਹੁੰਚੇ ਅਤੇ ਠੱਗੀ ਕਰਕੇ 1500 ਰੁਪਏ ਦੀਆਂ ਦਵਾਈਆਂ ਲੈ ਕੇ ਰਫ਼ੂਚੱਕਰ ਹੋ ਗਏ। ਦੁਕਾਨਦਾਰ ਦੇ ਮੁਤਾਬਕ ਇਹ ਘਟਨਾ ਸਿਰਫ਼ ਚੋਰੀ ਨਹੀਂ, ਸਗੋਂ ਕਿਸੇ ਵੱਡੀ ਸਾਜ਼ਿਸ਼ ਦੀ ਨਿਸ਼ਾਨਦਹੀ ਕਰਦੀ ਹੈ।
ਨੌਜਵਾਨਾਂ ਨੇ ਪਹਿਲਾਂ ਬਣਾਈ ਭਰੋਸੇ ਦੀ ਸਥਿਤੀ
ਦੁਕਾਨ ਮਾਲਕ ਵਿਨੋਦ ਮਹਾਜਨ ਨੇ ਦੱਸਿਆ ਕਿ ਨੌਜਵਾਨ ਪਹਿਲਾਂ ਬਲੱਡ ਪ੍ਰੈਸ਼ਰ ਚੈੱਕ ਕਰਵਾਉਣ ਦਾ ਬਹਾਨਾ ਲੈ ਕੇ ਅੰਦਰ ਆਏ। ਉਹ ਕੁਝ ਮਿੰਟ ਦੁਕਾਨ ਵਿੱਚ ਖੜ੍ਹੇ ਰਿਹੇ ਤਾਂ ਜੋ ਮਾਹੌਲ ਨੂੰ ਸਮਝ ਸਕਣ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕਈ ਤਰ੍ਹਾਂ ਦੀਆਂ ਦਵਾਈਆਂ ਮੰਗਵਾਈਆਂ, ਜਿਨ੍ਹਾਂ ਦੀ ਕੁੱਲ ਕੀਮਤ ਲਗਭਗ 1500 ਰੁਪਏ ਸੀ।
ਦਵਾਈਆਂ ਹੱਥ ‘ਚ ਆਈਆਂ ਤੇ ਨੌਜਵਾਨ ਸਿੱਧੇ ਭੱਜੇ
ਜਿਵੇਂ ਹੀ ਪੈਕਿੰਗ ਪੂਰੀ ਹੋਈ ਅਤੇ ਦਵਾਈਆਂ ਉਨ੍ਹਾਂ ਦੇ ਹੱਥ ਵਿੱਚ ਆਈਆਂ, ਉਹ ਇੱਕ ਪਲ ਵੀ ਬਰਬਾਦ ਨਾ ਕਰਦੇ ਹੋਏ ਬਿਨਾਂ ਪੈਸੇ ਦਿੱਤੇ ਤੇਜ਼ੀ ਨਾਲ ਕਾਰ ਵੱਲ ਭੱਜੇ ਅਤੇ ਮੌਕੇ ਤੋਂ ਗਾਇਬ ਹੋ ਗਏ। ਸਾਰੀ ਕਾਰਗੁਜ਼ਾਰੀ ਮੈਡੀਕਲ ਸਟੋਰ ‘ਤੇ ਲੱਗੇ ਸੀਸੀਟੀਵੀ ‘ਚ ਸਾਫ਼-ਸਾਫ਼ ਦਿੱਖ ਰਹੀ ਹੈ।
ਜੇ ਭੀੜ ਨਾ ਹੁੰਦੀ ਤਾਂ ਹੋ ਸਕਦੀ ਸੀ ਵੱਡੀ ਵਾਰਦਾਤ
ਦੁਕਾਨਦਾਰ ਨੇ ਕਿਹਾ ਕਿ ਉਸ ਵੇਲੇ ਉਸ ਦਾ ਪੁੱਤਰ ਅਤੇ 5–6 ਹੋਰ ਗਾਹਕ ਵੀ ਮੌਜੂਦ ਸਨ। ਉਸ ਨੂੰ ਸ਼ੱਕ ਹੈ ਕਿ ਇਹ ਨੌਜਵਾਨ ਦੁਕਾਨ ਦੀ ਰੇਕੀ ਕਰਨ ਦੀ ਨੀਅਤ ਨਾਲ ਆਏ ਸਨ, ਪਰ ਅਚਾਨਕ ਜ਼ਿਆਦਾ ਲੋਕਾਂ ਨੂੰ ਦੇਖ ਕੇ ਉਹ ਘਬਰਾ ਗਏ ਅਤੇ ਵੱਡੇ ਹਮਲੇ ਜਾਂ ਲੁੱਟ ਦੀ ਬਜਾਏ ਛੋਟੀ ਚੋਰੀ ਕਰਕੇ ਨਿਕਲ ਗਏ।
ਉਸ ਨੇ ਇਹ ਵੀ ਕਿਹਾ—ਜੇਕਰ ਉਸ ਸਮੇਂ ਦੁਕਾਨ ਸੁੰਨੀ ਹੁੰਦੀ, ਤਾਂ ਨਤੀਜੇ ਬਹੁਤ ਗੰਭੀਰ ਹੋ ਸਕਦੇ ਸਨ।
ਪੁਲਿਸ ਨੇ ਸ਼ੁਰੂ ਕੀਤੀ ਜਾਂਚ, ਫੁਟੇਜ ਖੰਗਾਲੇ ਜਾ ਰਹੇ ਹਨ
ਘਟਨਾ ਤੋਂ ਬਾਅਦ ਪੁਲਿਸ ਨੇ ਸਟੋਰ ਦੇ ਸੀਸੀਟੀਵੀ ਫੁਟੇਜ ਆਪਣੇ ਕਬਜ਼ੇ ਵਿੱਚ ਲਏ ਹਨ ਅਤੇ ਕਾਰ ਦੀ ਪਹਿਚਾਣ ਸਮੇਤ ਨੌਜਵਾਨਾਂ ਦੀ ਭਾਲ ਤੇਜ਼ ਕਰ ਦਿੱਤੀ ਹੈ। ਸਥਾਨਕ ਲੋਕਾਂ ਵਿਚ ਇਸ ਘਟਨਾ ਤੋਂ ਬਾਅਦ ਡਰ ਅਤੇ ਚਿੰਤਾ ਦਾ ਮਾਹੌਲ ਬਣ ਗਿਆ ਹੈ।
