ਨਵੀਂ ਦਿੱਲੀ :- ਹਫ਼ਤੇ ਦੇ ਪਹਿਲੇ ਹੀ ਦਿਨ ਕੀਮਤੀ ਧਾਤਾਂ ਦੇ ਬਾਜ਼ਾਰ ਨੇ ਸਕਾਰਾਤਮਕ ਸ਼ੁਰੂਆਤ ਕੀਤੀ ਹੈ। ਸੋਮਵਾਰ ਸਵੇਰੇ ਘਰੇਲੂ ਫਿਊਚਰਜ਼ ਮਾਰਕੀਟ (MCX) ਵਿੱਚ ਸੋਨੇ ਤੇ ਚਾਂਦੀ ਦੋਵੇਂ ਵਿੱਚ ਚੜ੍ਹਾਅ ਦਰਜ ਕੀਤਾ ਗਿਆ। ਨਿਵੇਸ਼ਕਾਂ ਵੱਲੋਂ ਖਰੀਦਦਾਰੀ ਦੇ ਰੁਝਾਨ ਵਿੱਚ ਵਾਧਾ ਦੇਖਣ ਨੂੰ ਮਿਲਿਆ ਹੈ, ਜਿਸ ਨਾਲ ਦੋਵੇਂ ਧਾਤਾਂ ਦੀ ਕੀਮਤ ਉੱਪਰ ਚਲੀ ਗਈ।
MCX ‘ਤੇ ਦਸੰਬਰ ਡਿਲੀਵਰੀ ਵਾਲੇ ਸੋਨੇ ਦੇ ਫਿਊਚਰਜ਼ ਵਿੱਚ 0.22% ਦੀ ਤੇਜ਼ੀ ਦਰਜ ਕੀਤੀ ਗਈ ਅਤੇ ਇਹ ਕੀਮਤ 1,21,494 ਰੁਪਏ ਪ੍ਰਤੀ 10 ਗ੍ਰਾਮ ‘ਤੇ ਪਹੁੰਚ ਗਈ। ਇਸੇ ਤਰ੍ਹਾਂ ਚਾਂਦੀ ਦੇ ਫਿਊਚਰਜ਼ 0.46% ਵੱਧਕੇ 1,48,950 ਰੁਪਏ ਪ੍ਰਤੀ ਕਿਲੋਗ੍ਰਾਮ ‘ਤੇ ਵਪਾਰ ਕਰ ਰਹੇ ਹਨ।
ਮਾਰਕੀਟ ਵਿਸ਼ਲੇਸ਼ਕਾਂ ਅਨੁਸਾਰ, ਡਾਲਰ ਸੂਚਕਾਂਕ (Dollar Index) ਵਿੱਚ ਗਿਰਾਵਟ ਅਤੇ ਘਰੇਲੂ ਬਾਜ਼ਾਰ ਵਿੱਚ ਮੰਗ ਵਧਣ ਕਾਰਨ ਸੋਨੇ ਦੀ ਖਰੀਦਾਰੀ ‘ਚ ਗਤੀ ਆਈ ਹੈ। ਹਾਲਾਂਕਿ, ਅਮਰੀਕੀ ਫੈਡਰਲ ਰਿਜ਼ਰਵ ਦੁਆਰਾ ਵਿਆਜ ਦਰਾਂ ‘ਚ ਕਟੌਤੀ ਦੀਆਂ ਉਮੀਦਾਂ ਕੁਝ ਹੱਦ ਤੱਕ ਨਰਮ ਪਈਆਂ ਹਨ।
ਪਿਛਲੇ ਸੈਸ਼ਨ ਨਾਲ ਤੁਲਨਾ
ਪਿਛਲੇ ਹਫ਼ਤੇ ਦੇ ਅੰਤ ਵਿੱਚ 24 ਕੈਰੇਟ ਸੋਨਾ 1,20,770 ਰੁਪਏ ਪ੍ਰਤੀ 10 ਗ੍ਰਾਮ ‘ਤੇ ਦਰਜ ਸੀ, ਜਦਕਿ 22 ਕੈਰੇਟ 1,17,870 ਰੁਪਏ, 20 ਕੈਰੇਟ 1,07,490 ਰੁਪਏ, 18 ਕੈਰੇਟ 97,820 ਰੁਪਏ ਅਤੇ 14 ਕੈਰੇਟ ਸੋਨਾ 77,900 ਰੁਪਏ ਪ੍ਰਤੀ 10 ਗ੍ਰਾਮ ‘ਤੇ ਵਪਾਰ ਕਰ ਰਿਹਾ ਸੀ।
ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਵੀ ਚਮਕ
ਵਿਸ਼ਵ ਬਾਜ਼ਾਰਾਂ ਵਿੱਚ ਵੀ ਕੀਮਤੀ ਧਾਤਾਂ ਨੇ ਚੜ੍ਹਾਈ ਦਰਜ ਕੀਤੀ ਹੈ। COMEX ‘ਤੇ ਸੋਨੇ ਦੇ ਭਾਅ 0.66% ਜਾਂ 26.20 ਡਾਲਰ ਵੱਧ ਕੇ 4,022.70 ਰੁਪਏ ਪ੍ਰਤੀ ਔਂਸ ‘ਤੇ ਪਹੁੰਚ ਗਏ ਹਨ। ਸਪਾਟ ਸੋਨਾ ਵੀ 4,011.94 ਰੁਪਏ ਪ੍ਰਤੀ ਔਂਸ ‘ਤੇ ਦਰਜ ਕੀਤਾ ਗਿਆ।
ਇਸੇ ਤਰ੍ਹਾਂ COMEX ਚਾਂਦੀ 0.90% ਜਾਂ 0.44 ਡਾਲਰ ਦੀ ਤੇਜ਼ੀ ਨਾਲ 48.60 ਰੁਪਏ ਪ੍ਰਤੀ ਔਂਸ ‘ਤੇ ਚੜ੍ਹੀ, ਜਦਕਿ ਸਪਾਟ ਚਾਂਦੀ 48.88 ਰੁਪਏ ਪ੍ਰਤੀ ਔਂਸ ‘ਤੇ ਵਪਾਰ ਕਰ ਰਹੀ ਸੀ।
ਬਾਜ਼ਾਰ ਮਾਹਰਾਂ ਦੀ ਰਾਏ
ਵਿੱਤੀ ਮਾਹਰਾਂ ਦਾ ਕਹਿਣਾ ਹੈ ਕਿ ਜੇਕਰ ਡਾਲਰ ਕਮਜ਼ੋਰ ਰਹਿੰਦਾ ਹੈ ਅਤੇ ਵਿਦੇਸ਼ੀ ਫੰਡਾਂ ਵੱਲੋਂ ਖਰੀਦ ਜਾਰੀ ਰਹੀ, ਤਾਂ ਆਉਣ ਵਾਲੇ ਹਫ਼ਤਿਆਂ ਵਿੱਚ ਸੋਨਾ 1,22,000 ਰੁਪਏ ਦੀ ਪੱਧਰ ਤੱਕ ਜਾ ਸਕਦਾ ਹੈ।
