ਪਟਿਆਲਾ :- ਪਹਾੜੀ ਇਲਾਕਿਆਂ ਵਿੱਚ ਹੋ ਰਹੇ ਲਗਾਤਾਰ ਮੀਂਹ ਦੇ ਨਤੀਜੇ ਵਜੋਂ ਮੈਦਾਨੀ ਹਿੱਸਿਆਂ ਵਿੱਚ ਦਰਿਆਵਾਂ ਦਾ ਪਾਣੀ ਖਤਰਨਾਕ ਪੱਧਰ ਵੱਲ ਵੱਧ ਰਿਹਾ ਹੈ। ਖ਼ਾਸ ਕਰਕੇ ਘੱਗਰ ਦਰਿਆ, ਜੋ ਖਨੌਰੀ ਖੇਤਰ ਰਾਹੀਂ ਵਗਦਾ ਹੈ, ਉਸਦਾ ਪਾਣੀ ਹੌਲੀ ਹੌਲੀ ਉਫਾਨ ‘ਤੇ ਪਹੁੰਚ ਰਿਹਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ, ਘੱਗਰ ਦਾ ਪੱਧਰ ਹੁਣ 740 ਫੁੱਟ ‘ਤੇ ਪਹੁੰਚ ਚੁੱਕਾ ਹੈ, ਜਦਕਿ ਖਤਰੇ ਦੀ ਹੱਦ 748 ਫੁੱਟ ਨਿਰਧਾਰਤ ਕੀਤੀ ਗਈ ਹੈ। ਸਿਰਫ਼ ਪਿਛਲੇ 24 ਘੰਟਿਆਂ ਦੌਰਾਨ ਹੀ ਘੱਗਰ ਵਿੱਚ ਲਗਭਗ 6 ਫੁੱਟ ਪਾਣੀ ਵਧ ਗਿਆ ਹੈ। ਇਹ ਪਹਿਲੀ ਵਾਰ ਹੈ ਕਿ ਚਲਦੇ ਮੌਸਮ ਵਿੱਚ ਦਰਿਆ ਦਾ ਪੱਧਰ 740 ਫੁੱਟ ਤੋਂ ਉੱਤੇ ਗਿਆ ਹੈ, ਜਿਸ ਕਾਰਨ ਇਲਾਕੇ ਦੇ ਵਸਨੀਕਾਂ ਵਿੱਚ ਚਿੰਤਾ ਦਾ ਮਾਹੌਲ ਬਣ ਗਿਆ ਹੈ।
ਇਸ ਤੋਂ ਪਹਿਲਾਂ, 2023 ਵਿੱਚ ਵੀ ਘੱਗਰ ਦਰਿਆ ਨੇ ਕਈ ਥਾਵਾਂ ‘ਤੇ ਆਪਣੇ ਕਿਨਾਰੇ ਤੋੜ ਕੇ ਹੜਾਂ ਦਾ ਰੂਪ ਧਾਰ ਲਿਆ ਸੀ, ਜਿਸ ਕਾਰਨ ਦਰਜਨਾਂ ਪਿੰਡ ਪਾਣੀ ‘ਚ ਘਿਰ ਗਏ ਸਨ ਅਤੇ ਲੋਕਾਂ ਨੂੰ ਆਪਣਾ ਘਰ-ਦੁਕਾਨ ਛੱਡਣੀਆਂ ਪਈਆਂ ਸਨ।
ਹੁਣ ਮੁੜ ਵਰਖਾ ਹੋਣ ਅਤੇ ਘੱਗਰ ਦੇ ਪਾਣੀ ਵਿੱਚ ਵਾਧਾ ਹੋਣ ਕਾਰਨ ਲੋਕਾਂ ਦੇ ਮਨ ਵਿੱਚ ਹੜਾਂ ਦੇ ਡਰ ਨੇ ਡੇਰੇ ਲਾ ਲਏ ਹਨ। ਸਥਾਨਕ ਨਿਵਾਸੀਆਂ ਵਿੱਚ ਸੰਭਾਵਤ ਤਬਾਹੀ ਨੂੰ ਲੈ ਕੇ ਬੇਚੈਨੀ ਵਧ ਰਹੀ ਹੈ।
ਇਸ ਸਾਰੀ ਸਥਿਤੀ ਨੂੰ ਮੱਦੇਨਜ਼ਰ ਰੱਖਦਿਆਂ, ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਇਲਾਕੇ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਅਲਰਟ ਜਾਰੀ ਕਰ ਦਿੱਤਾ ਗਿਆ ਹੈ। ਕਈ ਇਲਾਕਿਆਂ ਵਿੱਚ ਨਿਗਰਾਨੀ ਵਧਾ ਦਿੱਤੀ ਗਈ ਹੈ ਅਤੇ ਸੰਭਾਵੀ ਖ਼ਤਰੇ ਵਾਲੇ ਪਿੰਡਾਂ ਵਿੱਚ ਅਗਾਊਂ ਤਿਆਰੀਆਂ ਵੀ ਕੀਤੀਆਂ ਜਾ ਰਹੀਆਂ ਹਨ।
ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਫਵਾਹਾਂ ਤੋਂ ਬਚਣ ਅਤੇ ਸਰਕਾਰੀ ਹਦਾਇਤਾਂ ਦੀ ਪਾਲਣਾ ਕਰਨ, ਤਾਂ ਜੋ ਕਿਸੇ ਵੀ ਐਮਰਜੈਂਸੀ ਸਥਿਤੀ ਵਿੱਚ ਸਮਾਂ-ਸਿਰ ਕਾਰਵਾਈ ਕੀਤੀ ਜਾ ਸਕੇ।
