ਪੰਜਾਬ :- ਪੰਜਾਬ ‘ਚ ਸਰਦੀਆਂ ਦਾ ਅਸਲ ਅਸਰ ਦਿਖਣਾ ਸ਼ੁਰੂ ਹੋ ਗਿਆ ਹੈ। ਸੂਬੇ ਦੇ ਵੱਧਤਰ ਹਿੱਸਿਆਂ ‘ਚ ਘੱਟੋ-ਘੱਟ ਤਾਪਮਾਨ ਆਮ ਮਾਪਦੰਡ ਨਾਲੋਂ ਹੇਠਾਂ ਰਿਹਾ, ਜਿਸ ਕਰਕੇ ਦਿਨ ਦੇ ਸਮੇਂ ਨਾਲ ਨਾਲ ਰਾਤਾਂ ਵੀ ਕੜਕਣੀਆਂ ਹੋ ਰਹੀਆਂ ਹਨ। ਮੌਸਮ ਵਿਗਿਆਨੀਆਂ ਦੇ ਅਨੁਸਾਰ ਇਸ ਸਮੇਂ ਪੱਛਮੀ ਗੜਬੜੀ ਨਿਰਜੀਵ ਹੈ, ਜਿਸ ਕਰਕੇ ਮੀਂਹ ਦੀ ਕੋਈ ਉਮੀਦ ਨਹੀਂ ਬਣਦੀ। ਇਸੇ ਕਾਰਨ ਅਗਲੇ ਕੁਝ ਦਿਨਾਂ ‘ਚ ਪਾਰਾ 1-2 ਡਿਗਰੀ ਤੱਕ ਉੱਪਰ ਜਾ ਸਕਦਾ ਹੈ, ਹਾਲਾਂਕਿ ਔਸਤ ਦਾ ਪੱਧਰ ਫਿਰ ਵੀ ਆਮ ਦੇ ਨੇੜੇ-ਨੇੜੇ ਹੀ ਰਹੇਗਾ।
ਅਗਲੇ ਦੋ ਹਫ਼ਤਿਆਂ ‘ਚ ਮੀਂਹ ਨਹੀਂ; ਪ੍ਰਦੂਸ਼ਣ ‘ਚ ਰਾਹਤ ਦੀ ਸੰਭਾਵਨਾ ਘੱਟ
ਮੌਸਮ ਵਿਭਾਗ ਦੇ ਤਾਜ਼ਾ ਅਨੁਮਾਨ ਦੱਸਦੇ ਹਨ ਕਿ ਅਗਲੇ 14 ਦਿਨਾਂ ‘ਚ ਪੰਜਾਬ ਲਈ ਮੀਂਹ ਦਾ ਕੋਈ ਸੰਕੇਤ ਨਹੀਂ ਹੈ। ਇਸਦਾ ਸਿੱਧਾ ਮਤਲਬ ਹੈ ਕਿ ਹਵਾ ਦੀ ਗੁਣਵੱਤਾ ਵਿੱਚ ਵੱਡੇ ਸੁਧਾਰ ਦੀ ਉਮੀਦ ਨਹੀਂ। ਇਸ ਸਥਿਤੀ ਨੂੰ ਦੇਖਦਿਆਂ ਸਿਹਤ ਵਿਭਾਗ ਨੇ ਐਡਵਾਈਜ਼ਰੀ ਜਾਰੀ ਕੀਤੀ ਹੈ, ਜਿਸ ‘ਚ ਲੋਕਾਂ ਨੂੰ ਘਰੋਂ ਬਾਹਰ ਨਿਕਲਦਿਆਂ ਮਾਸਕ ਪਹਿਨਣ, ਪ੍ਰਦੂਸ਼ਣ ਵਾਲੀਆਂ ਗਤੀਵਿਧੀਆਂ ਤੋਂ ਬਚਣ ਅਤੇ ਖ਼ਾਸ ਤੌਰ ‘ਤੇ ਪਰਾਲੀ ਸਾੜਨ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।
ਤਾਪਮਾਨ ‘ਚ ਹੋਰ ਗਿਰਾਵਟ; ਸਾਰੇ ਸ਼ਹਿਰ 10 ਡਿਗਰੀ ਤੋਂ ਹੇਠਾਂ
ਮੌਸਮ ਕੇਂਦਰ ਮੁਤਾਬਕ ਪਿਛਲੇ 24 ਘੰਟਿਆਂ ਦੇ ਮੁਕਾਬਲੇ ਤਾਪਮਾਨ ‘ਚ 0.2 ਡਿਗਰੀ ਦੀ ਹੋਰ ਕਮੀ ਦਰਜ ਕੀਤੀ ਗਈ ਹੈ। ਸੂਬੇ ਦੇ ਲਗਭਗ ਸਾਰੇ ਸ਼ਹਿਰਾਂ ਵਿੱਚ ਰਾਤ ਦਾ ਪਾਰਾ 10 ਡਿਗਰੀ ਜਾਂ ਇਸ ਤੋਂ ਵੀ ਹੇਠਾਂ ਲੁਧਕ ਗਿਆ। ਦਿਨ ਦੀ ਗਰਮੀ ਵੀ ਖੂਬ ਘਟੀ ਹੈ ਅਤੇ ਵੱਧ ਤੋਂ ਵੱਧ ਤਾਪਮਾਨ 30 ਡਿਗਰੀ ਤੋਂ ਹੇਠਾਂ ਦਰਜ ਕੀਤਾ ਗਿਆ। ਬਠਿੰਡਾ ਇਸ ਵੇਲੇ ਸੂਬੇ ਦਾ ਸਭ ਤੋਂ ਗਰਮ ਸ਼ਹਿਰ ਰਿਹਾ, ਜਿੱਥੇ ਪਾਰਾ 29.9 ਡਿਗਰੀ ਤੱਕ ਦਾਖ਼ਲ ਹੋਇਆ।
ਪਹਾੜਾਂ ‘ਚ ਬਰਫ਼ਬਾਰੀ ਦਾ ਅਸਰ: ਮੈਦਾਨਾਂ ‘ਚ ਵਧੇਗੀਆਂ ਠੰਢੀਆਂ ਹਵਾਵਾਂ ਤੇ ਧੁੰਦ
ਜੰਮੂ-ਕਸ਼ਮੀਰ, ਹਿਮਾਚਲ ਪ੍ਰਦੇਸ਼ ਤੇ ਉੱਤਰਾਖੰਡ ਵਿੱਚ ਜਾਰੀ ਬਰਫ਼ਬਾਰੀ ਦਾ ਅਸਰ ਸਿੱਧਾ ਪੰਜਾਬ ‘ਤੇ ਵੀ ਪੈ ਰਿਹਾ ਹੈ। ਉੱਥੇ ਤੋਂ ਆ ਰਹੀਆਂਠੰਢੀਆਂ ਹਵਾਵਾਂ ਮੁੱਲਕ ਦੇ ਉੱਤਰੀ ਮੈਦਾਨੀ ਇਲਾਕਿਆਂ ਵਿੱਚ ਧੁੰਦ ਤੇ ਠੰਢ ਦੀ ਤੀਬਰਤਾ ਵਧਾਉਣਗੀਆਂ। ਅੰਤਰਰਾਸ਼ਟਰੀ ਮੌਸਮ ਏਜੰਸੀ (IMD) ਨੇ ਚੇਤਾਵਨੀ ਜਾਰੀ ਕਰਦਿਆਂ ਦੱਸਿਆ ਹੈ ਕਿ ਅਗਲੇ ਦੋ ਮਹੀਨਿਆਂ ਦੌਰਾਨ ਸੰਘਣੀ ਧੁੰਦ, ਠੰਢੀ ਲਹਿਰਾਂ ਅਤੇ ਰਾਤ ਦੇ ਪਾਰੇ ਵਿੱਚ ਤੇਜ਼ੀ ਨਾਲ ਗਿਰਾਵਟ ਦੇ ਹਾਲਾਤ ਬਣ ਸਕਦੇ ਹਨ।
ਲਾ ਨੀਨਾ ਦੇ ਅਸਰ ਨਾਲ ਜਨਵਰੀ ਤੱਕ ਵਧੇਗੀ ਸਰਦੀ ਦੀ ਤੀਬਰਤਾ
ਮੌਸਮ ਮਾਹਿਰਾਂ ਦਾ ਕਹਿਣਾ ਹੈ ਕਿ ਲਾ ਨੀਨਾ ਦੀ ਸਥਿਤੀ ਨਵੰਬਰ ਤੋਂ ਜਨਵਰੀ ਤੱਕ ਸੁਰਗਰਮ ਰਹਿ ਸਕਦੀ ਹੈ, ਜਿਸ ਨਾਲ ਪਾਰਾ ਹੋਰ ਵੀ ਨੀਵਾਂ ਜਾ ਸਕਦਾ ਹੈ। ਤਾਪਮਾਨ ਵਿੱਚ ਇਹ ਤਬਦੀਲੀਆਂ ਮੈਦਾਨੀ ਇਲਾਕਿਆਂ ਵਿੱਚ ਸਰਦੀ ਦੀ ਲਹਿਰ ਨੂੰ ਹੋਰ ਤੀਖੀ ਬਣਾਉਣਗੀਆਂ।
