ਚੰਡੀਗੜ੍ਹ :- ਪੰਜਾਬ ਦੇ ਖ਼ਜ਼ਾਨਾ ਅਤੇ ਲੇਖਾ ਡਾਇਰੈਕਟੋਰੇਟ (ਡੀ.ਟੀ.ਏ) ਨੇ ਵਿੱਤੀ ਪ੍ਰਸ਼ਾਸਨ ਨੂੰ ਆਧੁਨਿਕ ਬਣਾਉਣ, ਪਾਰਦਰਸ਼ਤਾ ਵਧਾਉਣ ਅਤੇ ਸਰਕਾਰੀ ਵਿਭਾਗਾਂ ਦੀ ਕਾਰਗੁਜ਼ਾਰੀ ਸੁਧਾਰਨ ਲਈ ਕਈ ਡਿਜੀਟਲ ਉਪਰਾਲੇ ਕੀਤੇ ਹਨ। ਇਹ ਤਕਨੀਕੀ ਸੁਧਾਰ ਪੰਜਾਬ ਨੂੰ ਪੂਰੀ ਤਰ੍ਹਾਂ ਡਿਜੀਟਲ ਗਵਰਨੈਂਸ ਵੱਲ ਲੈ ਜਾਣ ਵਿੱਚ ਮੀਲ ਪੱਥਰ ਸਾਬਤ ਹੋ ਰਹੇ ਹਨ।
ਐਸ.ਐਨ.ਏ.-ਸਪਰਸ਼ ਰਾਹੀਂ ਫੰਡ ਪ੍ਰਬੰਧਨ ਸੁਧਾਰ
ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਦੱਸਿਆ ਕਿ ਡਾਇਰੈਕਟੋਰੇਟ ਨੇ ਕੇਂਦਰ ਪ੍ਰਾਯੋਜਿਤ ਸਕੀਮਾਂ ਲਈ ਐਸ.ਐਨ.ਏ.-ਸਪਰਸ਼ ਨਾਮਕ ਨਵਾਂ ਫੰਡ ਪ੍ਰਵਾਹ ਢਾਂਚਾ ਤਿਆਰ ਕਰਕੇ 2024-25 ਵਿੱਚ 450 ਕਰੋੜ ਰੁਪਏ ਦੀ ਪ੍ਰੋਤਸਾਹਨ ਰਕਮ ਹਾਸਲ ਕੀਤੀ।
ਇਹ ਪ੍ਰਣਾਲੀ ਪੀ.ਐਫ.ਐਮ.ਐਸ, ਰਾਜ ਦੇ ਆਈ.ਐਫ.ਐਮ.ਐਸ ਅਤੇ ਰਿਜ਼ਰਵ ਬੈਂਕ ਦੇ ਈ-ਕੁਬੇਰ ਸਿਸਟਮ ਨੂੰ ਜੋੜਦੀ ਹੈ, ਜਿਸ ਨਾਲ ਖ਼ਜ਼ਾਨੇ ਦੀ ਨਕਦੀ ਤਰਲਤਾ ਵਧੇਗੀ ਅਤੇ ਬੈਂਕ ਖਾਤਿਆਂ ਵਿੱਚ ਪਏ ਬਿਨਾਂ ਵਰਤੇ ਫੰਡ ਘਟਣਗੇ।
ਚੀਮਾ ਨੇ ਕਿਹਾ ਕਿ ਸੂਬਾ ਸਰਕਾਰ ਨੇ ਇਸ ਪ੍ਰਣਾਲੀ ਲਈ ਵੱਖਰਾ ਐਸ.ਐਨ.ਏ.-ਸਪਰਸ਼ ਖ਼ਜ਼ਾਨਾ ਸਥਾਪਿਤ ਕੀਤਾ ਹੈ ਅਤੇ ਹੁਣ 2025-26 ਲਈ ਐਸ.ਏ.ਐਸ.ਸੀ.ਆਈ ਯੋਜਨਾ ਹੇਠ 350 ਕਰੋੜ ਰੁਪਏ ਦੀ ਪ੍ਰੋਤਸਾਹਨ ਰਕਮ ਦਾ ਲਕਸ਼ ਰੱਖਿਆ ਹੈ।
ਪੈਨਸ਼ਨਰ ਸੇਵਾ ਪੋਰਟਲ – ਪੈਨਸ਼ਨ ਪ੍ਰਕਿਰਿਆ ਹੋਈ ਆਸਾਨ
ਪੈਨਸ਼ਨਰਾਂ ਲਈ ਪੈਨਸ਼ਨਰ ਸੇਵਾ ਪੋਰਟਲ (ਪੀ.ਐਸ.ਪੀ) ਸ਼ੁਰੂ ਕੀਤਾ ਗਿਆ ਹੈ, ਜੋ ਬੈਂਕਾਂ ਤੇ ਖ਼ਜ਼ਾਨੇ ਵਿਚਕਾਰ ਪੈਨਸ਼ਨ ਕੇਸ ਆਨਲਾਈਨ ਪ੍ਰਕਿਰਿਆ ਨੂੰ ਆਸਾਨ ਬਣਾਉਂਦਾ ਹੈ।
ਇਸ ਪੋਰਟਲ ਰਾਹੀਂ ਈ-ਪੀਪੀਓ, ਪੈਨਸ਼ਨ ਅਪਡੇਟਸ ਦੀ ਅਸਲ-ਸਮੇਂ ਟ੍ਰੈਕਿੰਗ, ਸ਼ਿਕਾਇਤ ਨਿਵਾਰਨ, ਜੀਵਨ ਸਰਟੀਫਿਕੇਟ ਏਕੀਕਰਣ ਤੇ ਆਨਲਾਈਨ ਬੇਨਤੀਆਂ ਦੀ ਸਹੂਲਤ ਮਿਲੇਗੀ।
ਨਵਾਂ ਆਡਿਟ ਮੈਨੇਜਮੈਂਟ ਸਿਸਟਮ – ਰੀਅਲ ਟਾਈਮ ਨਿਗਰਾਨੀ
ਨਵੇਂ ਆਡਿਟ ਮੈਨੇਜਮੈਂਟ ਸਿਸਟਮ (ਏ.ਐਮ.ਐਸ) ਨਾਲ ਸਾਰੇ ਭਾਈਵਾਲਾਂ ਨੂੰ ਆਡਿਟ ਰਿਪੋਰਟਾਂ ਤੱਕ ਰੀਅਲ ਟਾਈਮ ਪਹੁੰਚ ਮਿਲੇਗੀ ਅਤੇ ਪ੍ਰਸ਼ਾਸਕੀ ਸਕੱਤਰ ਪੱਧਰ ‘ਤੇ ਨਿਯਮਤ ਸਮੀਖਿਆ ਮੀਟਿੰਗਾਂ ਰਾਹੀਂ ਆਡਿਟ ਸਬੰਧੀ ਮਸਲੇ ਤੇਜ਼ੀ ਨਾਲ ਹੱਲ ਹੋਣਗੇ।
ਭਵਿੱਖ ਵਿੱਚ ਅਕਾਊਂਟੈਂਟ ਜਨਰਲ ਦੀਆਂ ਆਡਿਟ ਰਿਪੋਰਟਾਂ ਵੀ ਇਸ ਸਿਸਟਮ ਵਿੱਚ ਸ਼ਾਮਲ ਕੀਤੀਆਂ ਜਾਣਗੀਆਂ।
ਗੈਰ-ਖ਼ਜ਼ਾਨਾ ਮਾਡਿਊਲ ਅਤੇ ਈ-ਵਾਊਚਰ ਸਿਸਟਮ
ਸੂਬੇ ਵਿੱਚ ਗੈਰ-ਖ਼ਜ਼ਾਨਾ ਮਾਡਿਊਲ ਲਾਗੂ ਕੀਤਾ ਗਿਆ ਹੈ ਜੋ ਜੰਗਲਾਤ ਅਤੇ ਲੋਕ ਨਿਰਮਾਣ ਵਿਭਾਗਾਂ ਦੇ ਮਹੀਨਾਵਾਰ ਖਾਤਿਆਂ ਨੂੰ ਸਵੈਚਾਲਤ ਬਣਾਉਂਦਾ ਹੈ।
ਸਰਕਾਰ ਨੇ ਸਾਰੇ ਬਿੱਲਾਂ ਲਈ ਈ-ਵਾਊਚਰ ਪ੍ਰਣਾਲੀ ਵੀ ਸ਼ੁਰੂ ਕੀਤੀ ਹੈ ਜਿਸ ਨਾਲ ਸਟੇਸ਼ਨਰੀ, ਯਾਤਰਾ ਅਤੇ ਭੌਤਿਕ ਵਾਊਚਰਾਂ ਦੇ ਖਰਚੇ ਘਟਣਗੇ।
ਸੇਵਾਵਾਂ ਵਿੱਚ ਸੁਧਾਰ ਤੇ ਪਾਰਦਰਸ਼ਤਾ
ਚੀਮਾ ਨੇ ਕਿਹਾ ਕਿ ਇਹ ਡਿਜੀਟਲ ਸੁਧਾਰ ਸਰਕਾਰੀ ਕਰਮਚਾਰੀਆਂ ਤੇ ਨਾਗਰਿਕਾਂ ਲਈ ਸੇਵਾਵਾਂ ਨੂੰ ਸੁਚਾਰੂ ਕਰਨਗੇ, ਜਵਾਬਦੇਹੀ ਵਧਾਉਣਗੇ ਅਤੇ ਸਰਕਾਰੀ ਖਰਚੇ ਵਿੱਚ ਵੱਡੀ ਬੱਚਤ ਹੋਵੇਗੀ।
ਉਨ੍ਹਾਂ ਜ਼ੋਰ ਦਿੱਤਾ ਕਿ,
“ਅਸੀਂ ਸਿਰਫ਼ ਸੌਫਟਵੇਅਰ ਨਹੀਂ ਬਦਲ ਰਹੇ, ਸਗੋਂ ਇਹ ਯਕੀਨੀ ਬਣਾ ਰਹੇ ਹਾਂ ਕਿ ਹਰੇਕ ਰੁਪਏ ਦਾ ਪਾਰਦਰਸ਼ੀ ਤੇ ਪ੍ਰਭਾਵਸ਼ਾਲੀ ਇਸਤੇਮਾਲ ਹੋਵੇ।”
