ਗੁਰਦਾਸਪੁਰ :- ਗੁਰਦਾਸਪੁਰ ਜ਼ਿਲ੍ਹਾ ਡੇਂਗੂ ਦੇ ਵੱਧ ਰਹੇ ਪ੍ਰਕੋਪ ਕਾਰਨ ਇੱਕ ਵਾਰ ਫਿਰ ਚਰਚਾ ਵਿਚ ਹੈ। ਸ਼ਹਿਰ ਦੇ ਵਾਰਡ ਨੰਬਰ 16, ਮੁਹੱਲਾ ਨੰਗਲ ਕੋਟਲੀ ਦੀ ਗਲੀ ਗੁਰਦੁਆਰਾ ਸਾਹਿਬ ਨੇੜੇ ਰਹਿਣ ਵਾਲੇ 25 ਸਾਲਾ ਇੰਦਰਜੀਤ ਸਿੰਘ ਉਰਫ਼ ਇੰਦੂ ਦੀ ਬੀਮਾਰੀ ਕਾਰਨ ਮੌਤ ਹੋ ਗਈ। ਨੌਜਵਾਨ ਦੀ ਅਕਾਲੀ ਮੌਤ ਨਾਲ ਇਲਾਕੇ ‘ਚ ਸੋਗ ਦੀ ਲਹਿਰ ਦੌੜ ਗਈ ਹੈ।
ਪਰਿਵਾਰ ਦੀ ਹਾਲਤ ਸੁਧਾਰਨ ਲਈ ਵਿਦੇਸ਼ ਗਿਆ ਸੀ ਜਵਾਕ
ਸਥਾਨਕ ਰਿਹਾਇਸ਼ੀਆਂ ਮੁਤਾਬਕ ਇੰਦਰਜੀਤ ਸਿੰਘ ਬਹੁਤ ਹੀ ਮਿਹਨਤੀ ਸੁਭਾਅ ਦਾ ਸੀ। ਗਰੀਬ ਪਰਿਵਾਰ ਦੀ ਆਰਥਿਕ ਸਹਾਇਤਾ ਲਈ ਉਹ ਨੌਕਰੀ ਦੀ ਖਾਤਰ ਦੁਬਈ ਗਿਆ ਹੋਇਆ ਸੀ ਅਤੇ ਕੁਝ ਹੀ ਸਮਾਂ ਪਹਿਲਾਂ ਘਰ ਪਰਤਿਆ ਸੀ। ਪਰ ਘਰ ਵਾਪਸੀ ਦੇ ਕੁਝ ਦਿਨਾਂ ਵਿੱਚ ਹੀ ਡੇਂਗੂ ਨੇ ਉਸਦੀ ਜ਼ਿੰਦਗੀ ਨਿਗਲ ਲਈ।
ਮੁਹੱਲੇ ਵਿਚ ਫੋਗਿੰਗ ਨਾ ਹੋਣ ‘ਤੇ ਨਿਵਾਸੀਆਂ ਦਾ ਗੁੱਸਾ
ਇਲਾਕੇ ਦੇ ਬਸਨੀਕਾਂ ਨੇ ਮਿਊਂਸਿਪਲ ਪ੍ਰਬੰਧਨ ਅਤੇ ਸਿਹਤ ਵਿਭਾਗ ਦੀ ਕਾਰਗੁਜ਼ਾਰੀ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ। ਮੁਹੱਲਾ ਵਾਸੀਆਂ ਦਾ ਕਹਿਣਾ ਹੈ ਕਿ ਡੇਂਗੂ ਦੇ ਦਰਜਨਾਂ ਕੇਸ ਸਾਹਮਣੇ ਆਉਣ ਦੇ ਬਾਵਜੂਦ ਅਜੇ ਤੱਕ ਇਲਾਕੇ ਵਿਚ ਕੋਈ ਵਿਆਪਕ ਫੋਗਿੰਗ ਜਾਂ ਸਪਰੇਅ ਕੈਂਪ ਨਹੀਂ ਲਗਾਇਆ ਗਿਆ।
ਸਪਰੇਅ ਆਉਂਦੇ ਵੀ ਹੈ ਤਾਂ ਸਿਰਫ਼ ਚੋਣਵੇਂ ਘਰਾਂ ਵਿਚ ਹੀ
ਨਿਵਾਸੀਆਂ ਦਾ ਆਰੋਪ ਹੈ ਕਿ ਜਦੋਂ ਵੀ ਸਫਾਈ ਜਾਂ ਫੋਗਿੰਗ ਵਾਲੀ ਟੀਮ ਆਉਂਦੀ ਹੈ, ਉਹ ਘਰਾਂ ਦੇ ਨਾਂ ਪੁੱਛ ਕੇ ਸਿਰਫ਼ ਕੁਝ ਮਕਾਨਾਂ ਵਿਚ ਕਾਰਵਾਈ ਕਰਕੇ ਚਲੀ ਜਾਂਦੀ ਹੈ। ਪੂਰੇ ਮੁਹੱਲੇ ਵਿੱਚ ਮੱਛਰ ਨਾਸ਼ਕ ਸਪਰੇਅ ਨਾ ਹੋਣ ਕਾਰਨ ਖ਼ਤਰਾ ਲਗਾਤਾਰ ਵੱਧ ਰਿਹਾ ਹੈ।
ਲਾਪਰਵਾਹੀ ਦਾ ਨਤੀਜਾ, ਜਾਨਾਂ ਖਤਰੇ ਵਿੱਚ
ਇਲਾਕਾ ਨਿਵਾਸੀਆਂ ਦਾ ਕਹਿਣਾ ਹੈ ਕਿ ਸਿਆਸੀ ਲਾਪਰਵਾਹੀ ਅਤੇ ਵਿਤਕਰਾਪੂਰਣ ਰਵੱਈਏ ਕਾਰਨ ਇਲਾਜ ਤੋਂ ਪਹਿਲਾਂ ਰੋਕਥਾਮ ਦੀ ਕਾਰਵਾਈ ਢਿੱਲੀ ਪਈ ਹੈ। ਉਹਨਾਂ ਮੰਗ ਕੀਤੀ ਹੈ ਕਿ ਤੁਰੰਤ ਵੱਡੇ ਪੱਧਰ ‘ਤੇ ਫੋਗਿੰਗ ਅਤੇ ਸਫਾਈ ਮੁਹਿੰਮ ਚਲਾਈ ਜਾਵੇ ਤਾਕਿ ਹੋਰ ਜਾਨਾਂ ਨੂੰ ਖਤਰਾ ਨਾ ਬਣੇ।
