ਅਨੰਦਪੁਰ ਸਾਹਿਬ :- ਅਨੰਦਪੁਰ ਹਾਈਡਲ ਨਹਿਰ ਵਿੱਚ ਆਏ ਪਾੜ ਕਾਰਨ ਇਲਾਕੇ ਵਿੱਚ ਖ਼ਤਰੇ ਦੀ ਸਥਿਤੀ ਬਣ ਗਈ। ਸਥਾਨਕ ਵਾਸੀਆਂ ਨੇ ਵੱਡਾ ਯੋਗਦਾਨ ਪਾੜ ਨੂੰ ਰੋਕਣ ਵਿੱਚ ਪਾਇਆ ਅਤੇ ਕੈਬਿਨਟ ਮੰਤਰੀ ਹਰਜੋਤ ਬੈਂਸ ਵੀ ਖੁਦ ਮੌਕੇ ‘ਤੇ ਪਹੁੰਚੇ। ਭਾਖੜਾ ਨਹਿਰ ਅਤੇ ਹਾਈਡਲ ਨਹਿਰ ਦੋਵੇਂ ਪ੍ਰਭਾਵਿਤ ਹੋਏ, ਜਿਸ ਕਾਰਨ ਹਾਈਡਲ ਨਹਿਰ ਦਾ ਪਾਣੀ ਤੁਰੰਤ ਬੰਦ ਕਰਨਾ ਪਿਆ।
ਪ੍ਰਸ਼ਾਸਨ ਤੇ ਲੋਕਾਂ ਦੀ ਸਾਂਝੀ ਕੋਸ਼ਿਸ਼ ਨਾਲ ਵੱਡਾ ਨੁਕਸਾਨ ਟਲਿਆ
ਪ੍ਰਸ਼ਾਸਨ ਅਤੇ ਇੰਜੀਨੀਅਰਿੰਗ ਟੀਮਾਂ ਨੇ ਲੋਕਾਂ ਦੇ ਸਹਿਯੋਗ ਨਾਲ ਪਟੜੀ ਦੀ ਮੁਰੰਮਤ ਸ਼ੁਰੂ ਕਰ ਦਿੱਤੀ ਹੈ। ਮਾਹਰਾਂ ਦਾ ਕਹਿਣਾ ਹੈ ਕਿ ਜੇ ਪਾੜ ਵਧਦਾ ਜਾਂ ਪਾਣੀ ਲੀਕ ਹੋ ਜਾਂਦਾ ਤਾਂ ਨੇੜਲੇ ਪਿੰਡਾਂ ਅਤੇ ਖੇਤਾਂ ਵਿੱਚ ਭਾਰੀ ਤਬਾਹੀ ਹੋ ਸਕਦੀ ਸੀ। ਮੰਤਰੀ ਹਰਜੋਤ ਬੈਂਸ ਨੇ ਭਰੋਸਾ ਦਿਵਾਇਆ ਕਿ ਸਰਕਾਰ ਹਰੇਕ ਸੰਭਵ ਕਦਮ ਚੁੱਕ ਰਹੀ ਹੈ। ਸਥਾਨਕ ਲੋਕਾਂ ਨੇ ਰੇਤ ਭਰੀਆਂ ਬੋਰੀਆਂ ਪਾੜ ‘ਤੇ ਪਾ ਕੇ ਪਾਣੀ ਦੇ ਰੁੱਖ ਨੂੰ ਰੋਕਣ ਵਿੱਚ ਵੱਡੀ ਭੂਮਿਕਾ ਨਿਭਾਈ। ਅਧਿਕਾਰੀਆਂ ਅਨੁਸਾਰ ਹਾਈਡਲ ਨਹਿਰ ਦੀ ਮੁਰੰਮਤ ਜਲਦੀ ਮੁਕੰਮਲ ਕਰਕੇ ਸਥਿਤੀ ਨੂੰ ਸਧਾਰਨ ਕੀਤਾ ਜਾਵੇਗਾ।
