ਸਮਾਣਾ :- ਸਮਾਣਾ–ਕੈਥਲ ਰੋਡ ਰਾਮ ਨਗਰ ਪੁਲਿਸ ਚੌਂਕੀ ਦੇ ਬਾਹਰ ਮੰਗਲਵਾਰ ਸਵੇਰੇ ਟਰੱਕ ਆਪਰੇਟਰਾਂ ਨੇ ਆਵਾਜਾਈ ਨੂੰ ਪੂਰੀ ਤਰ੍ਹਾਂ ਜਾਮ ਕਰਕੇ ਮਾਈਨਿੰਗ ਵਿਭਾਗ ਵਿਰੁੱਧ ਤਿੱਖਾ ਰੋਸ ਜਤਾਇਆ। ਆਪਰੇਟਰਾਂ ਦਾ ਦੋਸ਼ ਹੈ ਕਿ ਹਰਿਆਣਾ ਤੋਂ ਰੇਤਾ-ਬਜਰੀ ਲਿਆਉਣ ਵਾਲੇ ਟਰੱਕਾਂ ਤੋਂ ਮਾਈਨਿੰਗ ਟੀਮਾਂ ਵੱਲੋਂ 3000 ਰੁਪਏ ਦੀ ਪਰਚੀ ਕੱਟੀ ਜਾ ਰਹੀ ਹੈ, ਜਿਸ ਨਾਲ ਉਨ੍ਹਾਂ ਦਾ ਰੋਜ਼ਾਨਾ ਖ਼ਰਚਾ ਅਤੇ ਕਮਾਈ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋ ਰਹੀ ਹੈ। ਡਰਾਈਵਰਾਂ ਨੇ ਕਿਹਾ ਕਿ ਇੱਕ–ਦੋ ਗੱਡੀਆਂ ’ਚੋਂ ਬਹੁਤ ਤੋਂ ਬਹੁਤ 2000 ਰੁਪਏ ਹੀ ਬਚਦੇ ਹਨ, ਇਸ ਲਈ 3000 ਰੁਪਏ ਦੀ ਫੀਸ ਦੇਣਾ ਉਨ੍ਹਾਂ ਲਈ ਅਸੰਭਵ ਹੈ।
ਵਿਭਾਗ ਦਾ ਸਟੈਂਡ: ਨੋਟੀਫਿਕੇਸ਼ਨ ਅਨੁਸਾਰ ਫੀਸ ਲਾਗੂ
ਦੂਜੇ ਪਾਸੇ ਮਾਈਨਿੰਗ ਵਿਭਾਗ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਰਕਮ ਕਿਸੇ ਮਨਮਰਜ਼ੀ ਨਾਲ ਨਹੀਂ ਲੱਗ ਰਹੀ, ਸਗੋਂ ਪੰਜਾਬ ਸਰਕਾਰ ਵੱਲੋਂ 28 ਅਕਤੂਬਰ 2025 ਨੂੰ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਦੂਜੇ ਰਾਜਾਂ ਤੋਂ ਆਉਣ ਵਾਲੇ ਰੇਤਾ-ਬਜਰੀ ਵਾਲੇ ਟਰੱਕਾਂ ’ਤੇ ਇਹ ਫੀਸ ਲਗੂ ਕੀਤੀ ਗਈ ਹੈ। ਵਿਭਾਗ ਦੇ ਐਕਸੀਅਨ ਪ੍ਰਥਮ ਗੰਭੀਰ ਨੇ ਦੱਸਿਆ ਕਿ ਫੀਸ ਲੱਗਣ ਪਿੱਛੋਂ ਡਰਾਈਵਰਾਂ ਨੂੰ ਰਸੀਦ ਵੀ ਜਾਰੀ ਕੀਤੀ ਜਾਂਦੀ ਹੈ ਅਤੇ ਸਮੂਹ ਕਾਰਵਾਈ ਸਰਕਾਰੀ ਹਦਾਇਤਾਂ ਅਨੁਸਾਰ ਹੀ ਹੋ ਰਹੀ ਹੈ।
ਪੁਲਿਸ ਦੀ ਹਸਤਖੇਜ਼ੀ ਨਾਲ ਮਾਮਲੇ ਨੂੰ ਸਧਾਰਨ ਕਰਨ ਦੀ ਕੋਸ਼ਿਸ਼
ਤਣਾਅ ਵਧਦਾ ਵੇਖਦੇ ਹੋਏ ਡੀਐਸਪੀ ਸਮਾਣਾ ਗੁਰਬੀਰ ਸਿੰਘ ਬਰਾੜ ਅਤੇ ਐਸਐਚਓ ਫਸਿਆਣਾ ਅਮਨਪਾਲ ਸਿੰਘ ਤੁਰੰਤ ਮੌਕੇ ’ਤੇ ਪਹੁੰਚੇ। ਪੁਲਿਸ ਅਧਿਕਾਰੀਆਂ ਨੇ ਮਾਈਨਿੰਗ ਟੀਮ ਤੇ ਟਰੱਕ ਡਰਾਈਵਰਾਂ ਨੂੰ ਬੈਠਾ ਕੇ ਗੱਲਬਾਤ ਕਰਵਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਡਰਾਈਵਰ ਆਪਣੇ ਮਤ ’ਤੇ ਡਟੇ ਰਹੇ ਕਿ ਉਹ ਅਤਿਰਿਕਤ ਫੀਸ ਭਰਣ ਸਮਰੱਥ ਨਹੀਂ। ਉਨ੍ਹਾਂ ਨੇ ਮਾਈਨਿੰਗ ਨੀਤੀ ਨੂੰ ਨਰਮ ਕਰਨ ਅਤੇ ਹਰਿਆਣਾ ਤੋਂ ਆਉਣ ਵਾਲੇ ਸਮਾਨ ’ਤੇ ਵਾਧੂ ਬੋਝ ਨਾ ਪਾਉਣ ਦੀ ਮੰਗ ਵੀ ਰੱਖੀ।
ਮੁੱਦਾ ਹਾਲ ਨਾ ਹੋਣ ਕਾਰਨ ਪ੍ਰਦਰਸ਼ਨ ਜਾਰੀ
ਪ੍ਰਸ਼ਾਸਕੀ ਹਿੱਸੇਦਾਰੀ ਦੇ ਬਾਵਜੂਦ ਮੀਟਿੰਗ ਵਿਚ ਕਿਸੇ ਨਤੀਜੇ ’ਤੇ ਸਹਿਮਤੀ ਨਹੀਂ ਬਣ ਸਕੀ। ਆਪਰੇਟਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਫੀਸ ਵਾਪਸ ਨਾ ਲਈ ਗਈ ਜਾਂ ਘਟਾਈ ਨਾ ਗਈ ਤਾਂ ਉਹ ਅੰਦੋਲਨ ਨੂੰ ਹੋਰ ਤੇਜ ਕਰਨ ਲਈ ਮਜਬੂਰ ਹੋਣਗੇ। ਚਾਰੇ ਪਾਸੇ ਮਾਈਨਿੰਗ ਵਿਭਾਗ ਦਾ ਰੁਖ ਸਪਸ਼ਟ ਹੈ ਕਿ ਜਦ ਤਕ ਨੋਟੀਫਿਕੇਸ਼ਨ ਰੱਦ ਨਹੀਂ ਹੁੰਦਾ, ਫੀਸ ਲੱਗਦੀ ਰਹੇਗੀ।
