ਗੋਰਾਇਆ :- ਗੋਰਾਇਆ ਥਾਣਾ ਖੇਤਰ ਵਿੱਚ ਪੁਲਸ ਵੱਲੋਂ ਇਕ ਵੱਡਾ ਐਨਕਾਊਂਟਰ ਕੀਤਾ ਗਿਆ। ਕਾਰਵਾਈ ਦੌਰਾਨ ਮਸ਼ਹੂਰ ਭਗੌੜਾ ਗੈਂਗਸਟਰ ਗੁਰਪ੍ਰੀਤ ਸਿੰਘ ਉਰਫ਼ ਗੋਪੀ ਨੂੰ ਪੁਲਸ ਨਾਲ ਮੁਕਾਬਲੇ ਵਿੱਚ ਗੋਲੀ ਲੱਗਣ ਤੋਂ ਬਾਅਦ ਕਾਬੂ ਕਰ ਲਿਆ ਗਿਆ।
ਮੁੱਖਬਰ ਦੀ ਇਤਲਾਹ ਨਾਲ ਕਾਰਵਾਈ, ਰੋਕਣ ’ਤੇ ਗੈਂਗਸਟਰ ਨੇ ਗੱਡੀ ਭਜਾਈ
ਥਾਣਾ ਗੋਰਾਇਆ ਨੂੰ ਮੁੱਖਬਰ ਰਾਹੀਂ ਸੂਚਨਾ ਮਿਲੀ ਸੀ ਕਿ ਗੁਰਪ੍ਰੀਤ ਉਰਫ਼ ਗੋਪੀ ਉਸ ਖੇਤਰ ਵਿੱਚ ਗੱਡੀ ਸਮੇਤ ਮੌਜੂਦ ਹੈ। ਪੁਲਸ ਵੱਲੋਂ ਨਾਕਾਬੰਦੀ ਕਰਕੇ ਉਸ ਨੂੰ ਰੋਕਣ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਗੋਪੀ ਨੇ ਗੱਡੀ ਤੇਜ਼ੀ ਨਾਲ ਭਜਾਉਣ ਦੀ ਕੋਸ਼ਿਸ਼ ਕੀਤੀ ਅਤੇ ਘੇਰਾਬੰਦੀ ਤੋਂ ਬਚਣ ਲਈ ਵਾਹਨ ਵਿਚੋਂ ਹੀ ਪੁਲਸ ਉੱਪਰ ਦੋ ਗੋਲੀਆਂ ਚਲਾਈਆਂ।
ਜਵਾਬੀ ਫਾਇਰ ਵਿੱਚ ਲੱਤ ਵਿੱਚ ਗੋਲੀ ਲੱਗੀ, ਹੁਣ ਹਸਪਤਾਲ ਵਿੱਚ ਦਾਖ਼ਲ
ਗੈਂਗਸਟਰ ਦੀ ਗੋਲਾਬਾਰੀ ਤੋਂ ਬਾਅਦ ਪੁਲਸ ਨੇ ਜਵਾਬੀ ਤੌਰ ’ਤੇ ਫਾਇਰ ਕੀਤਾ ਜਿਸ ਵਿੱਚ ਗੋਪੀ ਦੀ ਲੱਤ ਵਿੱਚ ਗੋਲੀ ਲੱਗ ਗਈ। ਜ਼ਖ਼ਮੀ ਹਾਲਤ ਵਿੱਚ ਉਸ ਨੂੰ ਤੁਰੰਤ ਹਸਪਤਾਲ ਪੰਹੁਚਾਇਆ ਗਿਆ, ਜਿਥੇ ਉਸ ਦਾ ਇਲਾਜ ਜਾਰੀ ਹੈ। ਪੁਲਸ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਗੋਪੀ ਦੀ ਹਾਲਤ ਇਸ ਵੇਲੇ ਸਥਿਰ ਹੈ।
ਨਸ਼ਾ ਤਸਕਰੀ ਤੋਂ ਲੜਾਈ ਤੱਕ ਕਈ ਕੇਸ, ਲੰਮੇ ਸਮੇਂ ਤੋਂ ਭਗੌੜਾ
ਪੁਲਸ ਰਿਕਾਰਡ ਅਨੁਸਾਰ ਗੁਰਪ੍ਰੀਤ ਉਰਫ਼ ਗੋਪੀ ਉੱਤੇ ਨਸ਼ਾ ਤਸਕਰੀ, ਲੜਾਈ-ਝਗੜੇ ਅਤੇ ਹਥਿਆਰਾਂ ਨਾਲ ਸੰਬੰਧਤ ਲਗਭਗ ਪੰਜ ਮਾਮਲੇ ਦਰਜ ਹਨ। ਉਹ ਬਹੁਤ ਸਮੇਂ ਤੋਂ ਭਗੌੜੇ ਵਜੋਂ ਚੱਲ ਰਿਹਾ ਸੀ ਅਤੇ ਖੇਤਰ ਦੀ ਪੁਲਸ ਲਈ ਸਿਰਦਰਦ ਬਣਿਆ ਹੋਇਆ ਸੀ।
ਕਾਰ, ਪਿਸਟਲ ਅਤੇ ਰੋਂਦ ਬਰਾਮਦ, ਪੁਲਸ ਵੱਲੋਂ ਅਗਲੀ ਜਾਂਚ ਸ਼ੁਰੂ
ਮੌਕੇ ਤੋਂ ਪੁਲਸ ਨੇ ਇਕ ਕਾਰ, 32 ਬੋਰ ਦਾ ਪਿਸਟਲ ਅਤੇ ਦੋ ਜ਼ਿੰਦਾ ਰੋਂਦ ਬਰਾਮਦ ਕੀਤੇ ਹਨ। ਪੁਲਸ ਨੇ ਸਾਰੇ ਸਬੂਤ ਆਪਣੇ ਕਬਜ਼ੇ ਵਿੱਚ ਲੈਂਦੇ ਹੋਏ ਅਗਲੀ ਤਫ਼ਤੀਸ਼ ਸ਼ੁਰੂ ਕਰ ਦਿੱਤੀ ਹੈ। ਇਹ ਵੀ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਗੋਪੀ ਕਿਸ ਮਕਸਦ ਨਾਲ ਖੇਤਰ ਵਿੱਚ ਘੁੰਮ ਰਿਹਾ ਸੀ ਅਤੇ ਉਸਦੀ ਕਿਸੇ ਹੋਰ ਗੈਂਗ ਨਾਲ ਸੰਭਾਵੀ ਸਾਂਝ ਹੈ ਜਾਂ ਨਹੀਂ।
