ਅੰਮ੍ਰਿਤਸਰ :- ਅੰਮ੍ਰਿਤਸਰ ਦੇ ਖੁੱਲਰ ਗੈਸਟ ਹਾਊਸ ਵਿੱਚ ਉਸ ਵੇਲੇ ਹੜਕੰਪ ਮਚ ਗਿਆ ਜਦੋਂ ਪੁਲਿਸ ਨੂੰ ਇੱਕ ਅਣਜਾਣ ਕਾਲ ਰਾਹੀਂ ਕਮਰਾ ਨੰਬਰ 104 ਵਿੱਚ ਔਰਤ ਦੀ ਲਾਸ਼ ਪਈ ਹੋਣ ਬਾਰੇ ਜਾਣਕਾਰੀ ਮਿਲੀ। ਇੰਸਪੈਕਟਰ ਬਲਵਿੰਦਰ ਸਿੰਘ ਟੀਮ ਸਮੇਤ ਤੁਰੰਤ ਮੌਕੇ ‘ਤੇ ਪਹੁੰਚੇ ਅਤੇ ਕਮਰੇ ਨੂੰ ਸੁਰੱਖਿਅਤ ਕਰਦੇ ਹੋਏ ਫੋਰੈਂਸਿਕ ਮਾਹਿਰਾਂ ਨੂੰ ਜਾਂਚ ਲਈ ਬੁਲਾਇਆ। ਪੂਰੀ ਥਾਂ ਦੀ ਵੀਡੀਓਗ੍ਰਾਫੀ ਕੀਤੀ ਗਈ ਅਤੇ ਲਾਸ਼ ਨੂੰ ਸਿਵਲ ਹਸਪਤਾਲ ਦੇ ਮੁਰਦਾਘਰ ਭੇਜ ਦਿੱਤਾ ਗਿਆ।
ਮ੍ਰਿਤਕਾ ਦੀ ਪਛਾਣ ਵੀਰਪਾਲ ਕੌਰ ਵਜੋਂ, ਪਰਿਵਾਰ ਦੇ ਬਿਆਨਾਂ ‘ਤੇ ਦਰਜ ਹੋਇਆ ਕੇਸ
ਪੁਲਿਸ ਜਾਂਚ ਵਿੱਚ ਮ੍ਰਿਤਕਾ ਦੀ ਪਛਾਣ ਲਗਭਗ 30 ਸਾਲਾ ਵੀਰਪਾਲ ਕੌਰ ਵਜੋਂ ਹੋਈ। ਉਸਦੇ ਭਰਾ ਇੰਦਰਜੀਤ ਸਿੰਘ ਨੇ ਦੱਸਿਆ ਕਿ ਵੀਰਪਾਲ ਕੌਰ ਦਾ ਵਿਆਹ 7–8 ਸਾਲ ਪਹਿਲਾਂ ਰਸਲਾਲ ਸਿੰਘ ਨਾਲ ਹੋਇਆ ਸੀ ਅਤੇ ਉਹ ਜੁੜਵਾਂ ਬੱਚਿਆਂ ਦੀ ਮਾਂ ਸੀ। ਪਰ ਘਰ ਵਿੱਚ ਅਕਸਰ ਝਗੜਿਆਂ ਕਾਰਨ ਪਰਿਵਾਰ ਨੇ ਕੁਝ ਮਹੀਨੇ ਪਹਿਲਾਂ ਉਸਨੂੰ ਬੱਚਿਆਂ ਸਮੇਤ ਆਪਣੇ ਘਰ ਬੁਲਾ ਲਿਆ ਸੀ।
ਪ੍ਰੇਮੀ ਨਾਲ ਨਾਜਾਇਜ਼ ਸਬੰਧਾਂ ਕਾਰਨ ਵਧਿਆ ਤਣਾਅ
ਪਰਿਵਾਰ ਦੇ ਅਨੁਸਾਰ ਵੀਰਪਾਲ ਕੌਰ ਦੇ ਸਹੁਰੇ ਪਿੰਡ ਗਵਾੜ ਦੇ ਰਹਿਣ ਵਾਲੇ ਗੁਰਮੀਤ ਸਿੰਘ ਉਰਫ਼ ਧਰਮ ਨਾਲ ਅਣਚਾਹੇ ਸਬੰਧ ਸਨ। ਇਸ ਕਾਰਨ ਪਤੀ-ਪਤਨੀ ਵਿੱਚ ਰੋਜ਼ਾਨਾ ਤਣਾਅ ਰਹਿੰਦਾ ਸੀ। ਪਰਿਵਾਰ ਦਾ ਦਾਅਵਾ ਹੈ ਕਿ ਇਹੀ ਸਬੰਧ ਕਤਲ ਦੀ ਵਜ੍ਹਾ ਬਣੇ।
14 ਨਵੰਬਰ ਨੂੰ ਸਮਾਨ ਲੈਣ ਦੇ ਬਹਾਨੇ ਨਿਕਲੀ ਅਤੇ ਫਿਰ ਲਾਸ਼ ਵਜੋਂ ਮਿਲੀ
ਇੰਦਰਜੀਤ ਸਿੰਘ ਨੇ ਦੱਸਿਆ ਕਿ ਵੀਰਪਾਲ 14 ਨਵੰਬਰ ਦੀ ਸਵੇਰੇ ਇਹ ਕਹਿ ਕੇ ਘਰੋਂ ਗਈ ਸੀ ਕਿ ਉਹ ਆਪਣੇ ਸਹੁਰੇ ਘਰੋਂ ਕੱਪੜੇ ਅਤੇ ਸਮਾਨ ਲੈਣ ਜਾ ਰਹੀ ਹੈ। ਪਰ ਉਹ ਵਾਪਸ ਨਾ ਆਈ। ਸ਼ਾਮ ਨੂੰ ਪਰਿਵਾਰ ਨੂੰ ਇੱਕ ਕਾਲ ਆਈ ਜਿਸ ਵਿੱਚ ਦੱਸਿਆ ਗਿਆ ਕਿ ਵੀਰਪਾਲ ਕੌਰ ਦੀ ਗਲਾ ਘੁੱਟ ਕੇ ਹੱਤਿਆ ਕਰ ਦਿੱਤੀ ਗਈ ਹੈ ਅਤੇ ਉਹ ਗੈਸਟ ਹਾਊਸ ਵਿੱਚ ਮ੍ਰਿਤ ਪਈ ਹੈ।
ਪ੍ਰੇਮੀ ਉੱਤੇ ਪਰਿਵਾਰ ਦਾ ਸਿਧਾ ਦੋਸ਼ – ਪੁਲਿਸ ਨੇ ਦਰਜ ਕੀਤਾ ਮਾਮਲਾ
ਪਰਿਵਾਰ ਨੇ ਗੁਰਮੀਤ ਸਿੰਘ ਉਰਫ਼ ਧਰਮ ਉੱਤੇ ਕਤਲ ਦਾ ਸਿੱਧਾ ਦੋਸ਼ ਲਗਾਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਘਟਨਾ ਵਾਲੇ ਦਿਨ ਤੋਂ ਉਹ ਲਾਪਤਾ ਹੈ ਅਤੇ ਘਰ ਵਾਪਸ ਨਹੀਂ ਆਇਆ। ਪੁਲਿਸ ਨੇ ਉਸਦੇ ਖਿਲਾਫ ਕੇਸ ਦਰਜ ਕਰਕੇ ਤਲਾਸ਼ ਸ਼ੁਰੂ ਕਰ ਦਿੱਤੀ ਹੈ।
