ਭਗੌੜਾ ਐਲਾਨ ਹੋ ਚੁੱਕੇ ਰਾਮ ਸਿੰਘ ਉਰਫ ਲੱਡੂ ਦਾ ਘਰ ਢਾਹਿਆ ਗਿਆ
ਗੁਰੂ ਕੀ ਵਡਾਲੀ :- ਸਰਕਾਰ ਵੱਲੋਂ ਨਸ਼ਿਆਂ ਵਿਰੁੱਧ ਚਲ ਰਹੀ ਯੁੱਧ ਪੱਧਰੀ ਮੁਹਿੰਮ ਤਹਿਤ ਅੱਜ ਅੰਮ੍ਰਿਤਸਰ ਦੇ ਗੁਰੂ ਕੀ ਵਡਾਲੀ ਇਲਾਕੇ ‘ਚ ਡਰੱਗ ਸਮਗਲਰ ਰਾਮ ਸਿੰਘ ਉਰਫ ਲੱਡੂ ਦੀ ਜਾਇਦਾਦ ਖ਼ਿਲਾਫ ਵੱਡੀ ਤੋੜ-ਫੋੜ ਦੀ ਕਾਰਵਾਈ ਕੀਤੀ ਗਈ।
ਅਮਲ ਵਿੱਚ ਲਿਆਂਦੇ ਗਏ ਅਸਰਦਾਰ ਐਕਸ਼ਨ
ਡੀਸੀਪੀ (ਲਾ ਐਂਡ ਆਰਡਰ) ਆਲਮ ਵਿਜੇ ਸਿੰਘ ਨੇ ਮੀਡੀਆ ਨੂੰ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਰਾਮ ਸਿੰਘ ਅਤੇ ਉਸ ਦੇ ਭਰਾ ਗੁਰਪ੍ਰੀਤ ਸਿੰਘ ਵਿਰੁੱਧ ਐਨਡੀਪੀਐਸ ਐਕਟ ਹੇਠ ਕਈ ਮਾਮਲੇ ਦਰਜ ਹਨ। ਰਾਮ ਸਿੰਘ ‘ਤੇ ਲੁਧਿਆਣਾ ਅਤੇ ਥਾਣਾ ਛੇਹਰਟਾ ਵਿੱਚ ਤਿੰਨ ਵੱਖ-ਵੱਖ ਮਾਮਲੇ ਚੱਲ ਰਹੇ ਹਨ ਅਤੇ ਉਹ ਹੁਣ ਭਗੌੜਾ ਘੋਸ਼ਿਤ ਕੀਤਾ ਜਾ ਚੁੱਕਾ ਹੈ।
ਨਗਰ ਨਿਗਮ ਅਤੇ ਪੁਲਿਸ ਵੱਲੋਂ ਮਿਲੀ ਜਾਣਕਾਰੀ ਦੇ ਆਧਾਰ ‘ਤੇ ਉਸ ਦੀ ਅਣਕਾਨੂੰਨੀ ਤਰੀਕੇ ਨਾਲ ਬਣਾਈ ਗਈ ਜਾਇਦਾਦ ਦੀ ਪੁਸ਼ਟੀ ਹੋਣ ‘ਤੇ ਤੋੜ-ਫੋੜ ਦੀ ਕਾਰਵਾਈ ਅੰਜਾਮ ਦਿੱਤੀ ਗਈ। ਗੁਰਪ੍ਰੀਤ ਸਿੰਘ ਵੀ ਡਰੱਗ ਸਮਗਲਿੰਗ ਦੇ ਮਾਮਲੇ ‘ਚ ਫਰਾਰ ਹੈ।
ਨਸ਼ਾ ਸਮਗਲਰਾਂ ਵਿਰੁੱਧ ਮੁਹਿੰਮ ਜਾਰੀ ਰਹੇਗੀ: ਪੁਲਿਸ
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਜਾਇਦਾਦ ਨਸ਼ਿਆਂ ਤੋਂ ਆਏ ਕਾਲੇ ਧਨ ਨਾਲ ਖਰੀਦੀ ਗਈ ਸੀ। ਵਿਭਾਗਾਂ ਨੇ ਕਿਹਾ ਕਿ ਰਾਮ ਸਿੰਘ 2019 ਤੋਂ ਨਸ਼ਾ ਮਾਮਲਿਆਂ ਵਿਚ ਸ਼ਾਮਲ ਹੈ, ਪਰ ਹੁਣ ਪੁਲਿਸ ਨੇ ਇਸਨੂੰ ਕਾਨੂੰਨੀ ਤੌਰ ‘ਤੇ ਨਿਸ਼ਾਨਾ ਬਣਾਇਆ ਹੈ।
ਅਧਿਕਾਰੀਆਂ ਨੇ ਕਿਹਾ, “ਜੋ ਵੀ ਵਿਅਕਤੀ ਨਸ਼ਾ ਵਪਾਰ ‘ਚ ਲਿਪਤ ਹੋਇਆ ਪਾਇਆ ਜਾਂਦਾ ਹੈ, ਉਸ ਵਿਰੁੱਧ ਤੁਰੰਤ ਕਾਨੂੰਨੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਇਹ ਮੁਹਿੰਮ ਅਜੇ ਹੋਰ ਤੇਜ਼ੀ ਨਾਲ ਚਲਾਈ ਜਾਵੇਗੀ।”
