ਅੰਮ੍ਰਿਤਸਰ :- ਸਿੱਖ ਸਟੂਡੈਂਟਸ ਫੈਡਰੇਸ਼ਨ (USSF) ਵੱਲੋਂ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ (GNDU) ਦੇ ਵਾਈਸ ਚਾਂਸਲਰ ਖ਼ਿਲਾਫ਼ ਅਕਾਲ ਤਖਤ ਸਾਹਿਬ ‘ਤੇ ਸ਼ਿਕਾਇਤ ਦੇਣ ਤੋਂ ਬਾਅਦ, ਫੈਡਰੇਸ਼ਨ ਨੇ ਯੂਨੀਵਰਸਿਟੀ ਦੇ ਰਜਿਸਟਰਾਰ ‘ਤੇ ਵਿਦਿਆਰਥੀਆਂ ਨਾਲ ਧੱਕੇਸ਼ਾਹੀ ਕਰਨ ਦੇ ਗੰਭੀਰ ਦੋਸ਼ ਲਗਾਏ ਹਨ।
ਫੈਡਰੇਸ਼ਨ ਅਨੁਸਾਰ, ਕਈ ਜਥੇਬੰਦੀਆਂ ਅਤੇ ਗੁਰਸਿੱਖਾਂ ਦੀਆਂ ਸ਼ਿਕਾਇਤਾਂ ਉੱਤੇ ਅਕਾਲ ਤਖਤ ਸਾਹਿਬ ਨੇ (GNDU) ਦੇ ਵਾਈਸ ਚਾਂਸਲਰ ਪ੍ਰੋ. ਕਰਮਜੀਤ ਸਿੰਘ ਨੂੰ ਤਲਬ ਕੀਤਾ ਹੈ। ਸੰਗਠਨ ਦਾ ਕਹਿਣਾ ਹੈ ਕਿ ਪ੍ਰੋ. ਕਰਮਜੀਤ ਸਿੰਘ ਨੇ ਗੁਰੂ ਨਾਨਕ ਸਾਹਿਬ ਜੀ ਦੇ ਨਿਆਰੇ ਫ਼ਲਸਫ਼ੇ ਨੂੰ ਵੇਦਾਂ ਦੇ ਫ਼ਲਸਫ਼ੇ ਨਾਲ ਜੋੜਨ ਦੀ “ਗੰਭੀਰ ਗਲਤੀ” ਕੀਤੀ ਹੈ, ਜਿਸ ਲਈ ਉਨ੍ਹਾਂ ਨੂੰ ਪੰਥ ਵਿੱਚੋਂ ਛੇਕ ਕੇ ਮਿਸਾਲ ਪੈਦਾ ਕਰਨੀ ਚਾਹੀਦੀ ਹੈ।
ਹਾਈ ਪ੍ਰੋਫਾਈਲ ਕਮੇਟੀ ਬਣੀ, ਕਾਰਕੁੰਨਾ ‘ਤੇ ਕਾਰਵਾਈ ਦੀ ਤਿਆਰੀ
ਯੂ.ਐਸ.ਐਸ.ਐਫ ਨੇ ਦੋਸ਼ ਲਗਾਇਆ ਕਿ ਹੁਣ ਵਾਈਸ ਚਾਂਸਲਰ ਅਤੇ ਰਜਿਸਟਰਾਰ, ਸੰਗਠਨ ਦੇ ਕਾਰਕੁੰਨਾ ਖ਼ਿਲਾਫ਼ ਕਾਰਵਾਈ ਕਰਨ ਦੇ ਉੱਦੇਸ਼ ਨਾਲ ਇੱਕ ਹਾਈ ਪ੍ਰੋਫਾਈਲ ਕਮੇਟੀ ਬਣਾ ਚੁੱਕੇ ਹਨ। ਇਹ ਕਮੇਟੀ ਕਾਰਕੁੰਨਾ ਦੀ ਪਛਾਣ ਕਰਕੇ ਉਨ੍ਹਾਂ ਖ਼ਿਲਾਫ਼ ਪ੍ਰਸ਼ਾਸਕੀ ਕਦਮ ਚੁੱਕੇਗੀ।
ਸੰਗਠਨ ਦਾ ਦਾਅਵਾ ਹੈ ਕਿ ਕੁਝ ਵਿਦਿਆਰਥੀਆਂ ‘ਤੇ “ਨਕਲੀ ਯੂਐਮਸੀ” ਲਗਾ ਕੇ, ਵਿਰੋਧ ਹੋਣ ‘ਤੇ ਉਹ ਕੈਂਸਲ ਕੀਤੀਆਂ ਗਈਆਂ, ਪਰ ਹੁਣ ਪੇਪਰਾਂ ਵਿੱਚ ਫੇਲ ਕਰਕੇ ਉਨ੍ਹਾਂ ਦੀਆਂ ਡਿਗਰੀਆਂ ਪ੍ਰਭਾਵਿਤ ਕੀਤੀਆਂ ਜਾ ਰਹੀਆਂ ਹਨ।
ਰਜਿਸਟਰਾਰ ਨੂੰ ਸਖ਼ਤ ਚੇਤਾਵਨੀ
ਯੂ.ਐਸ.ਐਸ.ਐਫ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਰਜਿਸਟਰਾਰ ਵੱਲੋਂ “ਗੁੰਡਾਗਰਦੀ” ਬੰਦ ਨਾ ਕੀਤੀ ਗਈ ਤਾਂ ਸੰਗਠਨ ਵੀ ਮੂੰਹਤੋੜ ਜਵਾਬ ਦੇਵੇਗਾ। ਫੈਡਰੇਸ਼ਨ ਨੇ ਕਿਹਾ ਕਿ ਨਿੱਜੀ ਟਕਰਾਅ ਦੇ ਰਾਹ ‘ਤੇ ਆਉਣ ਦੇ ਨਤੀਜੇ ਲਈ ਪ੍ਰਸ਼ਾਸਨ ਖੁਦ ਜ਼ਿੰਮੇਵਾਰ ਹੋਵੇਗਾ।
