ਆਦਮਪੁਰ :- ਕੜਾਕੇ ਦੀ ਠੰਢ, ਰੁਕ-ਰੁਕ ਕੇ ਪੈਂਦਾ ਮੀਂਹ ਅਤੇ ਘੱਟ ਦਿੱਖ ਵਾਲੇ ਮੌਸਮ ਦੇ ਬਾਵਜੂਦ ਆਦਮਪੁਰ ਹਵਾਈ ਅੱਡੇ ਤੋਂ ਯਾਤਰਾ ਕਰਨ ਵਾਲੇ ਯਾਤਰੀਆਂ ਦੇ ਹੌਸਲੇ ਕਮਜ਼ੋਰ ਨਹੀਂ ਪਏ। ਅੱਜ ਆਦਮਪੁਰ ਏਅਰਪੋਰਟ ਨੇ ਆਪਣੀ ਯਾਤਰੀ ਸਮਰੱਥਾ ਦੀ 99.2 ਫੀਸਦੀ ਵਰਤੋਂ ਦਰਜ ਕਰਦਿਆਂ ਇਕ ਨਵਾਂ ਇਤਿਹਾਸਕ ਰਿਕਾਰਡ ਬਣਾਇਆ।
ਮੁੰਬਈ ਅਤੇ ਹਿੰਡਨ ਲਈ ਉਡਾਣਾਂ ਲਗਭਗ ਪੂਰੀ ਸਮਰੱਥਾ ਨਾਲ ਚਲੀਆਂ
ਹਵਾਈ ਅੱਡਾ ਪ੍ਰਬੰਧਨ ਵੱਲੋਂ ਜਾਰੀ ਜਾਣਕਾਰੀ ਮੁਤਾਬਕ ਆਦਮਪੁਰ ਤੋਂ ਮੁੰਬਈ ਅਤੇ ਹਿੰਡਨ ਲਈ ਸੰਚਾਲਿਤ ਦੋਵੇਂ ਉਡਾਣਾਂ ਲਗਭਗ ਪੂਰੀ ਯਾਤਰੀ ਭਰਾਵਟ ਨਾਲ ਰਵਾਨਾ ਹੋਈਆਂ। ਮੁੰਬਈ ਲਈ ਇੰਡੀਗੋ ਏਅਰਲਾਈਨਜ਼ ਦੀ ਉਡਾਣ ‘ਚ ਏਅਰਬੱਸ ਏ-320 ਜਹਾਜ਼ ਵਰਤਿਆ ਗਿਆ, ਜਿਸ ‘ਚ ਕੁੱਲ 188 ਯਾਤਰੀਆਂ ਦੀ ਸਮਰੱਥਾ ਸੀ। ਇਸ ‘ਚੋਂ 187 ਯਾਤਰੀਆਂ ਨੇ ਯਾਤਰਾ ਕੀਤੀ।
ਹਿੰਡਨ ਉਡਾਣ ‘ਚ ਵੀ ਸਿਰਫ਼ ਇਕ ਸੀਟ ਖਾਲੀ
ਇਸੇ ਤਰ੍ਹਾਂ ਸਟਾਰ ਏਅਰਲਾਈਨਜ਼ ਵੱਲੋਂ ਆਦਮਪੁਰ ਤੋਂ ਹਿੰਡਨ ਲਈ ਚਲਾਈ ਗਈ ਉਡਾਣ ‘ਚ ਐਂਬਰਾਇਰ ਈ-175 ਜਹਾਜ਼ ਦੀ ਸੇਵਾ ਲਈ ਗਈ, ਜਿਸ ਦੀ ਸਮਰੱਥਾ 88 ਯਾਤਰੀਆਂ ਦੀ ਹੈ। ਇਸ ਉਡਾਣ ‘ਚ 87 ਯਾਤਰੀ ਸਫਰ ‘ਤੇ ਨਿਕਲੇ, ਜਿਸ ਨਾਲ ਇਹ ਫਲਾਈਟ ਵੀ ਲਗਭਗ ਫੁੱਲ ਰਹੀ।
ਕੁੱਲ ਅੰਕੜੇ ਬਣੇ ਆਦਮਪੁਰ ਲਈ ਮੀਲ ਪੱਥਰ
ਦੋਵੇਂ ਉਡਾਣਾਂ ਦੀ ਮਿਲੀ-ਜੁਲੀ ਸਮਰੱਥਾ 276 ਯਾਤਰੀਆਂ ਦੀ ਸੀ, ਜਿਸ ‘ਚੋਂ 274 ਯਾਤਰੀਆਂ ਨੇ ਯਾਤਰਾ ਕੀਤੀ। ਇਸ ਤਰ੍ਹਾਂ ਆਦਮਪੁਰ ਏਅਰਪੋਰਟ ਨੇ 99.2 ਫੀਸਦੀ ਯਾਤਰੀ ਭਰਾਵਟ ਦਰਜ ਕਰਕੇ ਆਪਣੀ ਕਾਰਗੁਜ਼ਾਰੀ ਦਾ ਨਵਾਂ ਮਿਆਰ ਸਥਾਪਤ ਕੀਤਾ।
ਮੌਸਮ ਕਾਰਨ ਹਲਕੀ ਦੇਰੀ, ਪਰ ਸੇਵਾਵਾਂ ਰਹੀਆਂ ਸੁਚਾਰੂ
ਖ਼ਰਾਬ ਮੌਸਮ ਦੇ ਚਲਦਿਆਂ ਇੰਡੀਗੋ ਦੀ ਮੁੰਬਈ ਉਡਾਣ ਲਗਭਗ 17 ਮਿੰਟਾਂ ਦੀ ਦੇਰੀ ਨਾਲ ਰਵਾਨਾ ਹੋਈ, ਜਦਕਿ ਸਟਾਰ ਏਅਰਲਾਈਨਜ਼ ਦੀ ਹਿੰਡਨ ਉਡਾਣ ਨਿਰਧਾਰਤ ਸਮੇਂ ਅਨੁਸਾਰ ਚਲਾਈ ਗਈ। ਪ੍ਰਬੰਧਨ ਵੱਲੋਂ ਦੱਸਿਆ ਗਿਆ ਕਿ ਮੌਸਮੀ ਚੁਣੌਤੀਆਂ ਦੇ ਬਾਵਜੂਦ ਸੁਰੱਖਿਆ ਅਤੇ ਸੇਵਾ ਮਾਪਦੰਡਾਂ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਗਿਆ।
ਪ੍ਰਸ਼ਾਸਨ ਨੇ ਦੱਸਿਆ ਵਧਦੇ ਵਿਸ਼ਵਾਸ ਦਾ ਸੰਕੇਤ
ਆਦਮਪੁਰ ਏਅਰਪੋਰਟ ਪ੍ਰਸ਼ਾਸਨ ਨੇ ਇਸ ਪ੍ਰਾਪਤੀ ਨੂੰ ਹਵਾਈ ਅੱਡੇ ਲਈ ਮਹੱਤਵਪੂਰਨ ਮੋੜ ਕਰਾਰ ਦਿੱਤਾ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਰਿਕਾਰਡ ਯਾਤਰੀਆਂ ਦੇ ਵਧਦੇ ਭਰੋਸੇ ਅਤੇ ਖੇਤਰ ‘ਚ ਹਵਾਈ ਯਾਤਰਾ ਦੀ ਲਗਾਤਾਰ ਵਧ ਰਹੀ ਮੰਗ ਨੂੰ ਸਪਸ਼ਟ ਤੌਰ ‘ਤੇ ਦਰਸਾਉਂਦਾ ਹੈ।
