ਚੰਡੀਗੜ੍ਹ :- ਪੰਜਾਬ ਦੇ ਸਰਹੱਦੀ ਜ਼ਿਲ੍ਹੇ ਫਿਰੋਜ਼ਪੁਰ ਦੇ ਪਿੰਡ ਚੱਕ ਤਾਰਨ ਵਾਲੀ ਦਾ ਰਹਿਣ ਵਾਲਾ 10 ਸਾਲਾ ਮਾਸਟਰ ਸ਼ਰਵਣ ਸਿੰਘ ਦੇਸ਼ ਪੱਧਰ ’ਤੇ ਮਿਸਾਲ ਬਣ ਗਿਆ ਹੈ। ਸਰਹੱਦ ’ਤੇ ਖ਼ਤਰੇ ਭਰੇ ਹਾਲਾਤਾਂ ਵਿਚ ਨਿਡਰ ਹੋ ਕੇ ਕੀਤੀ ਸੇਵਾ ਦੇ ਚਲਦਿਆਂ ਭਾਰਤ ਸਰਕਾਰ ਵੱਲੋਂ ਉਸਨੂੰ ਸਾਲ 2026 ਲਈ ਪ੍ਰਧਾਨ ਮੰਤਰੀ ਰਾਸ਼ਟਰੀ ਬਾਲ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਜਾ ਰਿਹਾ ਹੈ। ਇਹ ਸਨਮਾਨ 26 ਦਸੰਬਰ ਨੂੰ ਨਵੀਂ ਦਿੱਲੀ ਦੇ ਵਿਗਿਆਨ ਭਵਨ ਵਿੱਚ ਰਾਸ਼ਟਰਪਤੀ ਵੱਲੋਂ ਦਿੱਤਾ ਜਾਵੇਗਾ।
ਆਪ੍ਰੇਸ਼ਨ ਸਿੰਦੂਰ ਦੌਰਾਨ ਦਿਖਾਈ ਅਸਾਧਾਰਨ ਹਿੰਮਤ
ਮਈ 2026 ਵਿੱਚ ਭਾਰਤ–ਪਾਕਿਸਤਾਨ ਸਰਹੱਦ ’ਤੇ ਚੱਲੇ ਆਪ੍ਰੇਸ਼ਨ ਸਿੰਦੂਰ ਸਮੇਂ ਸ਼ਰਵਣ ਸਿੰਘ ਨੇ ਉਹ ਕੰਮ ਕੀਤਾ, ਜੋ ਵੱਡੇ ਵੀ ਕਰਨ ਤੋਂ ਘਬਰਾਉਂਦੇ ਹਨ। ਲਗਾਤਾਰ ਡਰੋਨ ਘੁਸਪੈਠ ਅਤੇ ਹਮਲੇ ਦੇ ਖ਼ਤਰੇ ਦੇ ਬਾਵਜੂਦ, ਉਹ ਹਰ ਰੋਜ਼ ਅਗਲੀਆਂ ਚੌਕੀਆਂ ਤੱਕ ਜਾ ਕੇ ਤਾਇਨਾਤ ਫੌਜੀਆਂ ਲਈ ਪਾਣੀ, ਦੁੱਧ, ਲੱਸੀ, ਚਾਹ ਅਤੇ ਹੋਰ ਜ਼ਰੂਰੀ ਸਮਾਨ ਪਹੁੰਚਾਉਂਦਾ ਰਿਹਾ। ਉਸਦੀ ਹਾਜ਼ਰੀ ਫੌਜੀਆਂ ਲਈ ਸਿਰਫ਼ ਸਪਲਾਈ ਨਹੀਂ, ਸਗੋਂ ਹੌਸਲੇ ਦੀ ਤਾਕਤ ਵੀ ਬਣੀ।
ਸਿਵਲ–ਫੌਜੀ ਸਹਿਯੋਗ ਦੀ ਬਣੀ ਮਿਸਾਲ
ਸ਼ਰਵਣ ਸਿੰਘ ਨੇ ਸਿਰਫ਼ ਖੁਦ ਹੀ ਨਹੀਂ, ਸਗੋਂ ਆਪਣੇ ਪਰਿਵਾਰ ਨੂੰ ਵੀ ਫੌਜ ਦੀ ਮਦਦ ਲਈ ਪ੍ਰੇਰਿਤ ਕੀਤਾ। ਪਰਿਵਾਰ ਵੱਲੋਂ ਫੌਜੀਆਂ ਲਈ ਰਹਿਣ, ਆਰਾਮ ਅਤੇ ਹੋਰ ਸਹੂਲਤਾਂ ਦਿੱਤੀਆਂ ਗਈਆਂ, ਜਿਸ ਨਾਲ ਸੰਵੇਦਨਸ਼ੀਲ ਸਰਹੱਦੀ ਖੇਤਰ ਵਿੱਚ ਸਿਵਲ–ਫੌਜੀ ਸਾਂਝ ਮਜ਼ਬੂਤ ਹੋਈ। ਇਹ ਕਦਮ ਸਥਾਨਕ ਲੋਕਾਂ ਲਈ ਵੀ ਪ੍ਰੇਰਣਾ ਬਣਿਆ।
ਫੌਜ ਵੱਲੋਂ ਸਿੱਖਿਆ ਲਈ ਸਹਾਇਤਾ
ਸ਼ਰਵਣ ਦੀ ਬਹਾਦਰੀ ਅਤੇ ਸੇਵਾ ਭਾਵਨਾ ਤੋਂ ਪ੍ਰਭਾਵਿਤ ਹੋ ਕੇ ਗੋਲਡਨ ਐਰੋ ਡਿਵੀਜ਼ਨ ਵੱਲੋਂ ਉਸਦੀ ਸਿੱਖਿਆ ਨੂੰ ਸਪਾਂਸਰ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ। ਫੌਜੀ ਅਧਿਕਾਰੀਆਂ ਨੇ ਉਸਨੂੰ “ਹਿੰਮਤ ਅਤੇ ਮਨੁੱਖਤਾ ਦੀ ਜਿਉਂਦੀ ਮਿਸਾਲ” ਦੱਸਿਆ।
ਪਿੰਡ ਤੇ ਪਰਿਵਾਰ ’ਚ ਖੁਸ਼ੀ ਦਾ ਮਾਹੌਲ
ਪੁਰਸਕਾਰ ਦੀ ਘੋਸ਼ਣਾ ਤੋਂ ਬਾਅਦ ਪਿੰਡ ਚੱਕ ਤਾਰਨ ਵਾਲੀ ਅਤੇ ਸ਼ਰਵਣ ਦੇ ਪਰਿਵਾਰ ਵਿੱਚ ਖੁਸ਼ੀ ਦੀ ਲਹਿਰ ਹੈ। ਮਾਂ, ਭੈਣ ਅਤੇ ਦਾਦਾ ਜੀ ਨੇ ਕਿਹਾ ਕਿ ਸ਼ਰਵਣ ਦੀ ਇਹ ਉਪਲਬਧੀ ਸਿਰਫ਼ ਪਰਿਵਾਰ ਨਹੀਂ, ਸਗੋਂ ਪੂਰੇ ਪੰਜਾਬ ਅਤੇ ਦੇਸ਼ ਲਈ ਮਾਣ ਦੀ ਗੱਲ ਹੈ।
