ਚੰਡੀਗੜ੍ਹ :- ਬਾਲੀਵੁੱਡ ਦੇ ਮਸ਼ਹੂਰ ਸਿਤਾਰੇ ਕਿਆਰਾ ਅਡਵਾਣੀ ਤੇ ਸਿੱਧਾਰਥ ਮਲਹੋਤਰਾ ਨੇ ਆਪਣੇ ਪ੍ਰਸ਼ੰਸਕਾਂ ਨੂੰ ਆਖਿਰਕਾਰ ਉਹ ਪਲ ਦੇਖਣ ਦਾ ਮੌਕਾ ਦੇ ਦਿੱਤਾ ਜਿਸ ਦੀ ਕਈ ਦਿਨਾਂ ਤੋਂ ਉਡੀਕ ਸੀ। ਜੋੜੇ ਨੇ ਆਪਣੇ ਨਵਜਨਮੇ ਬੱਚੇ ਦੀ ਪਹਿਲੀ ਝਲਕ ਸਾਹਮਣੇ ਲਿਆਉਂਦੇ ਹੋਏ ਆਪਣੀ ਧੀ ਦਾ ਨਾਂ ਵੀ ਐਲਾਨ ਦਿੱਤਾ ਹੈ।
ਇੰਸਟਾਗ੍ਰਾਮ ‘ਤੇ ਜਾਰੀ ਕੀਤਾ ਪਿਆਰ ਭਰਿਆ ਪੋਸਟ
ਦੋਵੇਂ ਸਿਤਾਰਿਆਂ ਨੇ ਇੱਕ ਸਾਂਝੇ ਪੋਸਟ ਰਾਹੀਂ ਦੱਸਿਆ ਕਿ ਉਹਨਾਂ ਨੇ ਧੀ ਦਾ ਨਾਂ ‘ਸਰਾਯਾ ਮਲਹੋਤਰਾ’ ਰੱਖਿਆ ਹੈ। ਤਸਵੀਰ ਵਿੱਚ ਨਿੱਕੀ ਬੇਟੀ ਦੇ ਨੰਨੇ ਮੁੱਲਾਂ ਨੂੰ ਮਾਤਾ–ਪਿਤਾ ਦੇ ਹੱਥਾਂ ਵਿੱਚ ਟਿਕਿਆ ਹੋਇਆ ਵੇਖਿਆ ਜਾ ਸਕਦਾ ਹੈ। ਕੈਪਸ਼ਨ ‘ਚ ਉਹਨਾਂ ਨੇ ਲਿਖਿਆ— “ਸਾਡੀਆਂ ਅਰਦਾਸਾਂ ਤੋਂ ਸਾਡੀਆਂ ਬਾਂਹਾਂ ਤੱਕ… ਰੱਬ ਦੀ ਬਖ਼ਸ਼ਿਸ਼, ਸਾਡੀ ਪਰੀ ਮਲਹੋਤਰਾ।”
ਨਾਂ ਦਾ ਮਤਲਬ ?
ਸਰਾਯਾ ਨਾਂ ਹਿਬਰੂ ਮੂਲ ਦੇ ‘Sarah’ ਤੋਂ ਪ੍ਰੇਰਿਤ ਹੈ, ਜਿਸਦਾ ਮਤਲਬ “exotic princess” ਹੈ। ਜੋੜੇ ਨੇ ਆਪਣੀ ਨਿੱਕੀ ਪਰੀ ਲਈ ਇਹ ਨਾਂ ਬਹੁਤ ਸੋਚ-ਸਮਝ ਕੇ ਚੁਣਿਆ ਹੈ।
ਫਿਲਮੀ ਦੁਨੀਆ ਤੋਂ ਲੈ ਕੇ ਫੈਨਜ਼ ਤੱਕ ਸ਼ੁਭਕਾਮਨਾਵਾਂ ਦੀ ਬਾਰਿਸ਼
ਨਿੱਕੀ ਸਰਾਯਾ ਦੇ ਆਗਮਨ ਦੀ ਖ਼ਬਰ ਸਾਹਮਣੇ ਆਉਂਦੇ ਹੀ ਸੋਸ਼ਲ ਮੀਡੀਆ ‘ਤੇ ਮੁਬਾਰਕਬਾਦਾਂ ਦਾ ਸਿਲਸਿਲਾ ਸ਼ੁਰੂ ਹੋ ਗਿਆ। ਫੈਨਜ਼, ਸਹਿਤਕਾਰਾਂ ਅਤੇ ਸਿਨੇਮਾਈ ਦੋਸਤਾਂ ਨੇ ਜੋੜੇ ਨੂੰ ਦਿਲ ਖੋਲ੍ਹ ਕੇ ਵਧਾਈਆਂ ਭੇਜੀਆਂ।
ਦਿਲਚਸਪ ਗੱਲ ਇਹ ਹੈ ਕਿ ਬੱਚੀ ਦੀ ਪਹਿਲੀ ਤਸਵੀਰ ਉਹੀ ਛੋਟੀਆਂ ਬੇਬੀ ਜੁਰਾਬਾਂ ਨਾਲ ਜੁੜੀ ਹੋਈ ਹੈ, ਜਿਨ੍ਹਾਂ ਨਾਲ ਜੋੜੇ ਨੇ ਆਪਣੀ ਪ੍ਰੈਗਨੈਂਸੀ ਦਾ ਐਲਾਨ ਕੀਤਾ ਸੀ। ਹੁਣ ਉਹੀ ਜੁਰਾਬਾਂ ਸਰਾਯਾ ਦੇ ਮੁੱਲਾਂ ‘ਤੇ ਪਹਿਨੀਆਂ ਨਜ਼ਰ ਆ ਰਹੀਆਂ ਹਨ।
ਫਰਵਰੀ 2023 ‘ਚ ਵਿਆਹ, ਜੁਲਾਈ 2025 ‘ਚ ਧੀ ਦਾ ਜਨਮ
ਕਿਆਰਾ ਤੇ ਸਿੱਧਾਰਥ ਨੇ ਫਰਵਰੀ 2023 ਵਿੱਚ ਵਿਆਹ ਰਚਾਇਆ ਸੀ। ਇਸ ਸਾਲ ਫਰਵਰੀ ‘ਚ ਜੋੜੇ ਨੇ ਆਪਣੀ ਪ੍ਰੈਗਨੈਂਸੀ ਦਾ ਐਲਾਨ ਕੀਤਾ ਸੀ। ਉਹਨਾਂ ਨੇ ਪੂਰੇ ਸਮੇਂ ਦੌਰਾਨ ਆਪਣੀ ਨਿੱਜਤਾ ਨੂੰ ਤਰਜੀਹ ਦਿੱਤੀ ਤੇ ਮੀਡੀਆ ਤੋਂ ਬਚ ਕੇ ਸ਼ਾਂਤੀ ਨਾਲ ਇਹ ਪੜਾਅ ਬਿਤਾਇਆ। ਜੁਲਾਈ ਮਹੀਨੇ ਵਿੱਚ ਉਹਨਾਂ ਦੀ ਧੀ ਨੇ ਜਨਮ ਲਿਆ।
