ਨਵੀਂ ਦਿੱਲੀ :- ਗ੍ਰੇਟਰ ਨੋਇਡਾ ਵਿੱਚ ਪੁਲਿਸ ਨੇ ਪਤੀ ਵਿਪਿਨ ਨੂੰ ਉਸ ਸਮੇਂ ਗੋਲੀ ਮਾਰ ਕੇ ਜ਼ਖਮੀ ਕਰ ਦਿੱਤਾ ਜਦੋਂ ਉਹ ਹਿਰਾਸਤ ਵਿੱਚੋਂ ਭੱਜਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਵਿਪਿਨ ‘ਤੇ ਆਪਣੀ ਪਤਨੀ ਨਿੱਕੀ ਨੂੰ ਦਾਜ਼ ਲਈ ਸਾੜਨ ਦਾ ਦੋਸ਼ ਹੈ। ਉਸਦਾ ਮੁਕਾਬਲਾ ਸਿਰਸਾ ਨੇੜੇ ਹੋਇਆ, ਜਿਸ ਤੋਂ ਬਾਅਦ ਉਸਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਹਿਰਾਸਤ ਤੋਂ ਭੱਜਣ ਦੀ ਕੋਸ਼ਿਸ਼ ਵਿੱਚ ਗੋਲੀ ਲੱਗੀ
ਸ਼ਨੀਵਾਰ ਨੂੰ ਵਿਪਿਨ ਨੂੰ ਉਸਦੀ ਪਤਨੀ ਦੇ ਕਤਲ ਦੇ ਕੇਸ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਐਤਵਾਰ ਨੂੰ ਮੈਡੀਕਲ ਲਈ ਲੈ ਜਾ ਰਹੇ ਸਮੇਂ ਉਸਨੇ ਕਾਰ ਤੋਂ ਛਾਲ ਮਾਰ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ ਅਤੇ ਪੁਲਿਸ ਦਾ ਹਥਿਆਰ ਵੀ ਖੋਹ ਲਿਆ। ਇਸ ਦੌਰਾਨ ਪੁਲਿਸ ਨਾਲ ਮੁਕਾਬਲੇ ਵਿੱਚ ਉਹ ਲੱਤ ਵਿੱਚ ਗੋਲੀ ਲੱਗਣ ਨਾਲ ਜ਼ਖਮੀ ਹੋ ਗਿਆ।
ਇੰਸਟਾਗ੍ਰਾਮ ਪੋਸਟ ਨਾਲ ਮਾਮਲੇ ਨੇ ਫਿਰ ਫੜਿਆ ਤੂਫ਼ਾਨ
ਇਸ ਘਟਨਾ ਤੋਂ ਕੁਝ ਘੰਟੇ ਪਹਿਲਾਂ ਵਿਪਿਨ ਨੇ ਆਪਣੇ ਇੰਸਟਾਗ੍ਰਾਮ ‘ਤੇ ਭਾਵੁਕ ਪੋਸਟ ਸਾਂਝੀ ਕੀਤੀ, ਜਿਸ ਵਿੱਚ ਉਸਨੇ ਦਾਅਵਾ ਕੀਤਾ ਕਿ ਉਸਦੀ ਪਤਨੀ ਨਿੱਕੀ ਨੇ ਖੁਦਕੁਸ਼ੀ ਕੀਤੀ ਹੈ। ਉਸਦੀ ਪੋਸਟ ‘ਚ ਲਿਖਿਆ ਸੀ: “ਦੁਨੀਆ ਮੈਨੂੰ ਕਾਤਲ ਕਹਿ ਰਹੀ ਹੈ, ਨਿੱਕੀ। ਤੂੰ ਮੈਨੂੰ ਕਿਉਂ ਛੱਡ ਦਿੱਤਾ?”
ਇੱਕ ਹੋਰ ਵੀਡੀਓ ਪੋਸਟ ਵਿੱਚ ਨਿੱਕੀ, ਵਿਪਿਨ ਅਤੇ ਉਨ੍ਹਾਂ ਦਾ ਪੁੱਤਰ ਖੁਸ਼ ਨਜ਼ਰ ਆ ਰਹੇ ਹਨ। ਇਸਦੇ ਕੈਪਸ਼ਨ ਵਿੱਚ ਵਿਪਿਨ ਨੇ ਲਿਖਿਆ: “ਮੈਂ ਬਰਬਾਦ ਹੋ ਗਿਆ ਹਾਂ। ਮੇਰੇ ਕੋਲ ਹੁਣ ਕੁਝ ਨਹੀਂ ਬਚਿਆ।”
ਵਿਆਹ ਤੋਂ ਬਾਅਦ ਦਾਜ਼ ਲਈ ਤੰਗ ਕਰਨ ਦੇ ਦੋਸ਼
ਨਿੱਕੀ ਦਾ ਵਿਆਹ 2016 ਵਿੱਚ ਸਿਰਸਾ ਪਿੰਡ ਵਿੱਚ ਹੋਇਆ ਸੀ। ਉਸਦੀ ਭੈਣ ਕੰਚਨ ਦੇ ਅਨੁਸਾਰ, ਵਿਆਹ ਦੇ ਛੇ ਮਹੀਨਿਆਂ ਬਾਅਦ ਹੀ ਉਸਨੂੰ ਦਾਜ਼ ਲਈ ਤੰਗ ਕੀਤਾ ਜਾਣ ਲੱਗਾ। ਕੰਚਨ ਨੇ ਦੋਸ਼ ਲਗਾਇਆ ਕਿ ਵੀਰਵਾਰ ਰਾਤ ਉਸਦੇ ਸਹੁਰਿਆਂ ਨੇ ਉਸਨੂੰ ਕੁੱਟਣ ਤੋਂ ਬਾਅਦ ਅੱਗ ਲਗਾ ਦਿੱਤੀ, ਜਿਸ ਕਾਰਨ ਉਸਦੀ ਮੌਤ ਹੋ ਗਈ।
