ਨਵੀਂ ਦਿੱਲੀ :- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਬੁੱਧਵਾਰ ਨੂੰ ਕਿਹਾ ਕਿ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਉਨ੍ਹਾਂ ਨੂੰ ਯਕੀਨ ਦਿਵਾਇਆ ਹੈ ਕਿ ਭਾਰਤ ਹੁਣ ਰੂਸ ਤੋਂ ਤੇਲ ਖਰੀਦਣਾ ਬੰਦ ਕਰੇਗਾ। ਟਰੰਪ ਨੇ ਇਸ ਕਦਮ ਨੂੰ ਮਾਸਕੋ ‘ਤੇ ਅੰਤਰਰਾਸ਼ਟਰੀ ਦਬਾਅ ਵਧਾਉਣ ਵੱਲ “ਵੱਡਾ ਕਦਮ” ਕਰਾਰ ਦਿੱਤਾ।
ਟਰੰਪ ਨੇ ਕਿਹਾ – ਮੋਦੀ ਨਾਲ ਮੇਰਾ ਦੋਸਤਾਨਾ ਰਿਸ਼ਤਾ
ਵਾਈਟ ਹਾਊਸ ਦੇ ਓਵਲ ਆਫ਼ਿਸ ‘ਚ ਐਫ.ਬੀ.ਆਈ. ਡਾਇਰੈਕਟਰ ਕੈਸ਼ ਪਟੇਲ ਨਾਲ ਸਾਂਝੀ ਪ੍ਰੈਸ ਕਾਨਫਰੰਸ ਦੌਰਾਨ ਟਰੰਪ ਨੇ ਕਿਹਾ, “ਹਾਂ, ਬਿਲਕੁਲ। ਮੋਦੀ ਮੇਰੇ ਦੋਸਤ ਹਨ। ਸਾਡੇ ਵਿਚਕਾਰ ਬਹੁਤ ਚੰਗਾ ਰਿਸ਼ਤਾ ਹੈ। ਮੈਂ ਖੁਸ਼ ਨਹੀਂ ਸੀ ਕਿ ਭਾਰਤ ਰੂਸ ਤੋਂ ਤੇਲ ਖਰੀਦ ਰਿਹਾ ਹੈ, ਪਰ ਅੱਜ ਉਨ੍ਹਾਂ ਨੇ ਮੈਨੂੰ ਯਕੀਨ ਦਿਵਾਇਆ ਹੈ ਕਿ ਹੁਣ ਉਹ ਰੂਸ ਤੋਂ ਤੇਲ ਨਹੀਂ ਖਰੀਦਣਗੇ। ਇਹ ਇਕ ਵੱਡਾ ਕਦਮ ਹੈ। ਹੁਣ ਸਾਨੂੰ ਚੀਨ ਤੋਂ ਵੀ ਇਹੀ ਉਮੀਦ ਹੈ।”
ਮੋਦੀ ਨਾਲ ਚੰਗੇ ਸਬੰਧਾਂ ਦਾ ਜ਼ਿਕਰ
ਟਰੰਪ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਆਪਣੀ ਨਿੱਜੀ ਦੋਸਤੀ ਦਾ ਜ਼ਿਕਰ ਕਰਦੇ ਹੋਏ ਕਿਹਾ, “ਉਹ ਮੇਰੇ ਦੋਸਤ ਹਨ, ਸਾਡੇ ਰਿਸ਼ਤੇ ਬਹੁਤ ਮਜ਼ਬੂਤ ਹਨ। ਉਨ੍ਹਾਂ ਨੇ ਦੋ ਦਿਨ ਪਹਿਲਾਂ ਵੀ ਇਹ ਗੱਲ ਕੀਤੀ ਸੀ, ਜਿਵੇਂ ਤੁਸੀਂ ਜਾਣਦੇ ਹੋ।”
ਰੂਸ ਨਾਲ ਭਾਰਤ ਦੀ ਊਰਜਾ ਵਪਾਰ ਨੀਤੀ ‘ਤੇ ਨਿਸ਼ਾਨਾ
ਟਰੰਪ ਨੇ ਕਿਹਾ ਕਿ ਰੂਸ ਤੋਂ ਤੇਲ ਖਰੀਦਣਾ ਮਾਸਕੋ ਨੂੰ ਯੂਕਰੇਨ ਵਿਚ ਜੰਗ ਜਾਰੀ ਰੱਖਣ ਵਿੱਚ ਮਦਦ ਕਰਦਾ ਹੈ। ਉਨ੍ਹਾਂ ਕਿਹਾ, “ਅਸੀਂ ਖੁਸ਼ ਨਹੀਂ ਸੀ ਕਿ ਭਾਰਤ ਰੂਸ ਤੋਂ ਤੇਲ ਖਰੀਦ ਰਿਹਾ ਸੀ, ਕਿਉਂਕਿ ਇਸ ਨਾਲ ਰੂਸ ਨੂੰ ਇਸ ਬੇਮਤਲਬ ਜੰਗ ਨੂੰ ਜਾਰੀ ਰੱਖਣ ਦਾ ਹੌਸਲਾ ਮਿਲਦਾ ਹੈ, ਜਿਸ ‘ਚ ਹੁਣ ਤਕ ਲਗਭਗ ਇਕ ਮਿਲੀਅਨ ਤੋਂ ਵੱਧ ਜਾਨਾਂ ਜਾ ਚੁੱਕੀਆਂ ਹਨ, ਜਿਨ੍ਹਾਂ ‘ਚ ਜ਼ਿਆਦਾਤਰ ਸੈਨਿਕ ਹਨ।”
ਭਾਰਤ ਨੇ ਦਿੱਤੀ ਆਪਣੀ ਆਰਥਿਕ ਵਜ੍ਹਾ
ਦੂਜੇ ਪਾਸੇ, ਭਾਰਤ ਦਾ ਮੰਨਣਾ ਹੈ ਕਿ ਰੂਸ ਤੋਂ ਕੱਚਾ ਤੇਲ ਆਯਾਤ ਕਰਨਾ ਉਸਦੀ ਆਰਥਿਕ ਸਥਿਰਤਾ ਤੇ ਸਸਤੀ ਊਰਜਾ ਲਈ ਜ਼ਰੂਰੀ ਹੈ। ਨਵੀਂ ਦਿੱਲੀ ਦਾ ਸਪੱਸ਼ਟ ਕਹਿਣਾ ਹੈ ਕਿ ਉਸਦੇ ਊਰਜਾ ਸੰਬੰਧੀ ਫ਼ੈਸਲੇ ਸਿਰਫ਼ ਆਰਥਿਕ ਅਤੇ ਰਾਸ਼ਟਰੀ ਹਿਤਾਂ ਦੇ ਆਧਾਰ ‘ਤੇ ਲਏ ਜਾਂਦੇ ਹਨ, ਨਾ ਕਿ ਕਿਸੇ ਦਬਾਅ ਹੇਠ।
“ਇਹ ਜੰਗ ਕਦੇ ਹੋਣੀ ਹੀ ਨਹੀਂ ਚਾਹੀਦੀ ਸੀ”: ਟਰੰਪ
ਟਰੰਪ ਨੇ ਯੂਕਰੇਨ ਜੰਗ ਨੂੰ “ਬੇਲੋੜੀ ਟਕਰਾਅ” ਕਹਿੰਦੇ ਹੋਏ ਕਿਹਾ, “ਇਹ ਇਕ ਐਸੀ ਜੰਗ ਹੈ ਜੋ ਪਹਿਲੇ ਹਫ਼ਤੇ ਹੀ ਖਤਮ ਹੋ ਜਾਣੀ ਚਾਹੀਦੀ ਸੀ, ਪਰ ਹੁਣ ਚੌਥੇ ਸਾਲ ਵਿੱਚ ਦਾਖਲ ਹੋ ਰਹੀ ਹੈ। ਮੈਂ ਚਾਹੁੰਦਾ ਹਾਂ ਕਿ ਇਹ ਜੰਗ ਖਤਮ ਹੋਵੇ। ਇਸੇ ਲਈ ਮੈਂ ਨਹੀਂ ਚਾਹੁੰਦਾ ਸੀ ਕਿ ਭਾਰਤ ਰੂਸ ਤੋਂ ਤੇਲ ਖਰੀਦਦਾ ਰਹੇ।”
ਵਾਸ਼ਿੰਗਟਨ ਲਈ ਸਿਆਸੀ ਤੌਰ ‘ਤੇ ਮਹੱਤਵਪੂਰਨ ਮੋੜ
ਟਰੰਪ ਦਾ ਇਹ ਬਿਆਨ ਅੰਤਰਰਾਸ਼ਟਰੀ ਪੱਧਰ ‘ਤੇ ਇਕ ਮਹੱਤਵਪੂਰਨ ਸਿਆਸੀ ਮੋੜ ਵਜੋਂ ਦੇਖਿਆ ਜਾ ਰਿਹਾ ਹੈ। ਵਾਸ਼ਿੰਗਟਨ ਇਕ ਪਾਸੇ ਰੂਸ ਨੂੰ ਆਰਥਿਕ ਤੌਰ ‘ਤੇ ਇਕੱਲਾ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਜਦਕਿ ਦੂਜੇ ਪਾਸੇ ਭਾਰਤ ਨਾਲ ਮਜ਼ਬੂਤ ਰਿਸ਼ਤੇ ਕਾਇਮ ਰੱਖਣ ਦੀ ਰਣਨੀਤੀ ਤੇ ਵੀ ਕੰਮ ਕਰ ਰਿਹਾ ਹੈ।
