ਚੰਡੀਗੜ੍ਹ :- ਚੇਤ ਦੇ ਪਵਿੱਤਰ ਨਰਾਤਿਆਂ ਦੇ ਅੱਜ ਛੇਵੇਂ ਦਿਨ ਭਗਤ ਜਨ ਮਾ ਕਾਤਿਆਨੀ ਦੀ ਭਗਤੀ ਵਿੱਚ ਲੀਨ ਹਨ। ਧਾਰਮਿਕ ਮਾਨਤਾਵਾਂ ਅਨੁਸਾਰ, ਇਹ ਦਿਨ ਆਦਿਸ਼ਕਤੀ ਦੇ ਛੇਵੇਂ ਰੂਪ ਨੂੰ ਸਮਰਪਿਤ ਹੁੰਦਾ ਹੈ, ਜਿਸ ਦੀ ਅਰਾਧਨਾ ਨਾਲ ਜੀਵਨ ਦੀਆਂ ਕਈ ਮੁਸ਼ਕਲਾਂ ਦੂਰ ਹੋਣ ਦੀ ਆਸ ਰੱਖੀ ਜਾਂਦੀ ਹੈ।
ਮਹਿਸ਼ਾਸੁਰ ਦੇ ਸੰਘਾਰ ਨਾਲ ਜੁੜੀ ਕਥਾ
ਪੁਰਾਤਨ ਕਥਾਵਾਂ ਮੁਤਾਬਕ ਮਾਂ ਕਾਤਿਆਨੀ ਰਾਕਸ਼ਸ ਮਹਿਸ਼ਾਸੁਰ ਦਾ ਸੰਘਾਰ ਕਰਕੇ ਧਰਤੀ ‘ਤੇ ਧਰਮ ਦੀ ਸਥਾਪਨਾ ਕੀਤੀ ਸੀ। ਇਸ ਕਰਕੇ ਉਨ੍ਹਾਂ ਨੂੰ ਬੁਰਾਈ ਦੇ ਨਾਸ ਕਰਨ ਵਾਲੀ ਦੇਵੀ ਵਜੋਂ ਵੀ ਯਾਦ ਕੀਤਾ ਜਾਂਦਾ ਹੈ ਅਤੇ ਭਗਤਾਂ ਵੱਲੋਂ ਉਨ੍ਹਾਂ ਦੀ ਵਿਸ਼ੇਸ਼ ਸ਼ਰਧਾ ਨਾਲ ਪੂਜਾ ਕੀਤੀ ਜਾਂਦੀ ਹੈ।
ਮਾਂ ਦਾ ਦਿਵਯ ਤੇ ਸ਼ਕਤੀਸ਼ਾਲੀ ਸਰੂਪ
ਮਾਂ ਕਾਤਿਆਨੀ ਦਾ ਰੂਪ ਬਹੁਤ ਹੀ ਤੇਜਸਵੀ ਅਤੇ ਸ਼ਕਤੀਮਾਨ ਮੰਨਿਆ ਜਾਂਦਾ ਹੈ। ਚਾਰ ਭੁਜਾਵਾਂ ਵਾਲੀ ਇਹ ਦੇਵੀ ਆਪਣੇ ਹੱਥਾਂ ਵਿੱਚ ਤਲਵਾਰ ਅਤੇ ਕਮਲ ਧਾਰਨ ਕਰਦੀ ਹੈ, ਜਦਕਿ ਦੂਜੇ ਹੱਥ ਅਭਯ ਅਤੇ ਵਰਦਾਨ ਦੀ ਮੂਰਤ ਵਿੱਚ ਹਨ। ਉਨ੍ਹਾਂ ਦੀ ਸਵਾਰੀ ਸ਼ੇਰ ਹੈ, ਜੋ ਹਿੰਮਤ ਅਤੇ ਸ਼ਕਤੀ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ।
ਪੂਜਾ ਕਰਨ ਦੀ ਪ੍ਰਕਿਰਿਆ ਅਤੇ ਰਸਮਾਂ
ਇਸ ਦਿਨ ਭਗਤ ਕਲਸ਼ ਸਥਾਪਨਾ ਨਾਲ ਪੂਜਾ ਦੀ ਸ਼ੁਰੂਆਤ ਕਰਦੇ ਹਨ ਅਤੇ ਸੰਕਲਪ ਕਰਕੇ ਮਾਂ ਦਾ ਧਿਆਨ ਲਗਾਉਂਦੇ ਹਨ। ਇਸ ਤੋਂ ਬਾਅਦ ਗੰਗਾਜਲ ਨਾਲ ਮੂਰਤੀ ਦਾ ਅਭਿਸ਼ੇਕ ਕੀਤਾ ਜਾਂਦਾ ਹੈ। ਪੀਲੇ ਰੰਗ ਦੇ ਕੱਪੜੇ, ਫੁੱਲ ਅਤੇ ਹਲਦੀ ਨਾਲ ਮਾਂ ਦਾ ਸ਼ਿੰਗਾਰ ਕੀਤਾ ਜਾਂਦਾ ਹੈ ਅਤੇ ਅੰਤ ਵਿੱਚ ਧੂਪ-ਦੀਪ ਕਰਕੇ ਆਰਤੀ ਉਤਾਰੀ ਜਾਂਦੀ ਹੈ।
ਅਰਾਧਨਾ ਨਾਲ ਮਿਲਦਾ ਹੈ ਆਤਮਵਿਸ਼ਵਾਸ ਅਤੇ ਸੁਖ
ਧਾਰਮਿਕ ਵਿਸ਼ਵਾਸਾਂ ਅਨੁਸਾਰ, ਮਾਂ ਕਾਤਿਆਨੀ ਦੀ ਸੱਚੇ ਮਨ ਨਾਲ ਕੀਤੀ ਅਰਾਧਨਾ ਨਾਲ ਵਿਆਹ ਵਿੱਚ ਆ ਰਹੀਆਂ ਰੁਕਾਵਟਾਂ ਦੂਰ ਹੋਣ ਦੀ ਮਾਨਤਾ ਹੈ। ਇਸ ਦੇ ਨਾਲ ਹੀ ਭਗਤਾਂ ਨੂੰ ਹਿੰਮਤ, ਆਤਮਵਿਸ਼ਵਾਸ ਅਤੇ ਮਨ ਦੀ ਸ਼ਾਂਤੀ ਪ੍ਰਾਪਤ ਹੁੰਦੀ ਹੈ। ਖ਼ਾਸ ਕਰਕੇ ਅਣਵਿਆਹੀਆਂ ਕੁੜੀਆਂ ਲਈ ਇਸ ਦਿਨ ਦੀ ਪੂਜਾ ਨੂੰ ਬਹੁਤ ਹੀ ਲਾਭਕਾਰੀ ਮੰਨਿਆ ਜਾਂਦਾ ਹੈ।
ਧਾਰਮਿਕ ਵਿਸ਼ਵਾਸਾਂ ‘ਤੇ ਆਧਾਰਿਤ ਜਾਣਕਾਰੀ
ਇਸ ਨਾਲ ਸੰਬੰਧਿਤ ਜਾਣਕਾਰੀ ਧਾਰਮਿਕ ਮਾਨਤਾਵਾਂ ਅਤੇ ਪ੍ਰਚਲਿਤ ਰਿਵਾਜਾਂ ‘ਤੇ ਆਧਾਰਿਤ ਹੈ, ਜਿਸਨੂੰ ਭਗਤ ਆਪਣੀ ਸ਼ਰਧਾ ਅਨੁਸਾਰ ਅਪਣਾਉਂਦੇ ਹਨ।
