ਝਾਰਖੰਡ :- ਸੂਬੇ ਵਿੱਚ ਪੈ ਰਹੀ ਕੜਾਕੇ ਦੀ ਠੰਢ ਅਤੇ ਸਵੇਰ ਦੀ ਘਣੀ ਧੁੰਦ ਨੂੰ ਦੇਖਦੇ ਹੋਏ ਰਾਜ ਸਰਕਾਰ ਅਤੇ ਸਕੂਲ ਪਰਸ਼ਾਸਨਾਂ ਨੇ ਬੱਚਿਆਂ ਦੀ ਸੁਰੱਖਿਆ ਲਈ ਸਕੂਲ ਦੇ ਸਮੇਂ ’ਚ ਤਬਦੀਲੀ ਕਰਨ ਦਾ ਫ਼ੈਸਲਾ ਲਿਆ ਹੈ। ਪਿਛਲੇ ਕੁਝ ਦਿਨਾਂ ਤੋਂ ਤਾਪਮਾਨ ਲਗਾਤਾਰ ਡਿੱਗ ਰਿਹਾ ਹੈ ਤੇ ਸਵੇਰ ਦੀਆਂ ਘੜੀਆਂ ਵਿੱਚ ਠੰਢ ਆਪਣੀ ਚਰਮ ਸੀਮਾ ’ਤੇ ਹੈ, ਜਿਸ ਕਰਕੇ ਨੰਨੇ ਵਿਦਿਆਰਥੀਆਂ ਲਈ ਪੁਰਾਣੇ ਸਮੇਂ ਅਨੁਸਾਰ ਸਕੂਲ ਪਹੁੰਚਣਾ ਮੁਸ਼ਕਲ ਹੋ ਰਿਹਾ ਸੀ।
ਸਵੇਰ ਦੀ ਕੰਬਾਊ ਠੰਢ ਤੇ ਧੁੰਦ, ਸਮਾਂ ਬਦਲਣ ਦਾ ਮੁੱਖ ਕਾਰਨ
ਜਮਸ਼ੇਦਪੁਰ ਦੇ ICSE ਬੋਰਡ ਦੇ ਸਕੂਲਾਂ ਨੇ ਮੌਸਮ ਦੀ ਗੰਭੀਰਤਾ ਨੂੰ ਧਿਆਨ ਵਿੱਚ ਰੱਖਦਿਆਂ ਆਪਣੀ ਦਾਖਲਾ ਟਾਈਮਿੰਗ ਵਿੱਚ ਅੱਧਾ ਘੰਟਾ ਵਾਧਾ ਕਰ ਦਿੱਤਾ ਹੈ। ਪਹਿਲਾਂ 7:30 ਵਜੇ ਖੁੱਲ੍ਹਣ ਵਾਲੇ ਇਹ ਸਕੂਲ ਹੁਣ ਸਵੇਰੇ 8 ਵਜੇ ਤੋਂ ਵਿਦਿਆਰਥੀਆਂ ਨੂੰ ਅੰਦਰ ਲੈਣਗੇ।
ਦੂਜੇ ਪਾਸੇ, CBSE ਸਕੂਲਾਂ ਨੇ ਪੂਰਾ ਇੱਕ ਘੰਟਾ ਸਮਾਂ ਅੱਗੇ ਕਰ ਦਿੱਤਾ ਹੈ। ਪਹਿਲਾਂ ਸਵੇਰੇ 7 ਵਜੇ ਸ਼ੁਰੂ ਹੋਣ ਵਾਲੀ ਕਲਾਸ ਹੁਣ 8 ਵਜੇ ਲੱਗੇਗੀ। ਸਕੂਲ ਪ੍ਰਸ਼ਾਸਨਾਂ ਦਾ ਕਹਿਣਾ ਹੈ ਕਿ ਇਹ ਕਦਮ ਬੱਚਿਆਂ ਦੀ ਤੰਦਰੁਸਤੀ ਅਤੇ ਸੁਰੱਖਿਆ ਨੂੰ ਪਹਿਲ ਦਿੰਦਿਆਂ ਲਿਆ ਗਿਆ ਹੈ।
ਮੌਸਮ ਵਿਭਾਗ ਦੀ ਚੇਤਾਵਨੀ, ਅਗਲੇ ਦਿਨ ਹੋਰ ਠੰਢ ਵਧੇਗੀ
ਮੌਸਮ ਵਿਭਾਗ ਦੇ ਅਨੁਸਾਰ ਰਾਤ ਦੇ ਤਾਪਮਾਨ ਵਿੱਚ ਅਗਲੇ ਦੋ ਦਿਨਾਂ ਦੌਰਾਨ ਕੋਈ ਵੱਡਾ ਵਾਧਾ ਨਹੀਂ ਹੋਵੇਗਾ। 29 ਨਵੰਬਰ ਤੋਂ 2 ਦਸੰਬਰ ਵਿਚਕਾਰ ਪਾਰਾ ਹੋਰ ਡਿੱਗ ਸਕਦਾ ਹੈ, ਜਿਸ ਨਾਲ ਘੱਟੋ-ਘੱਟ ਤਾਪਮਾਨ 2 ਤੋਂ 4 ਡਿਗਰੀ ਤੱਕ ਘਟਣ ਦੀ ਸੰਭਾਵਨਾ ਹੈ। ਇਸ ਨਾਲ ਰਾਤ ਦੀ ਠੰਢ ਹੋਰ ਜ਼ਿਆਦਾ ਕਹਿਰ ਵਰਤ ਸਕਦੀ ਹੈ।
ਗੁਮਲਾ ਸਭ ਤੋਂ ਠੰਡਾ, ਪਾਰਾ 7.7 ਡਿਗਰੀ ਤੱਕ ਡਿੱਗਿਆ
ਪਿਛਲੇ 24 ਘੰਟਿਆਂ ਵਿੱਚ ਗੁਮਲਾ ਜ਼ਿਲ੍ਹਾ ਸੂਬੇ ਵਿੱਚ ਸਭ ਤੋਂ ਠੰਡਾ ਸਾਬਤ ਹੋਇਆ, ਜਿੱਥੇ ਘੱਟੋ-ਘੱਟ ਤਾਪਮਾਨ 7.7 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ। ਦੂਜੇ ਪਾਸੇ, ਗੋਡਾ ਜ਼ਿਲ੍ਹੇ ਨੇ 31.1 ਡਿਗਰੀ ਸੈਲਸੀਅਸ ਦੇ ਨਾਲ ਸਭ ਤੋਂ ਵੱਧ ਤਾਪਮਾਨ ਦਰਜ ਕਰਕੇ ਵਿਰੋਧੀ ਤਸਵੀਰ ਪੇਸ਼ ਕੀਤੀ।
