ਸੈਸ਼ਨ ਚਾਰ ਦਿਨ ਪਹਿਲਾਂ ਰੋਕਣ ਦੀ ਚਰਚਾ
ਨਵੀਂ ਦਿੱਲੀ :- ਅੱਜ ਸੰਸਦ ਦੇ ਮਾਨਸੂਨ ਸੈਸ਼ਨ ਦਾ 17ਵਾਂ ਦਿਨ ਹੈ। ਸਵੇਰੇ 11 ਵਜੇ ਸ਼ੁਰੂ ਹੋਈ ਕਾਰਵਾਈ ਵਿੱਚ ਚਰਚਾ ਇਸ ਗੱਲ ਦੀ ਹੈ ਕਿ ਸੈਸ਼ਨ ਮੰਗਲਵਾਰ ਨੂੰ ਹੀ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕੀਤਾ ਜਾ ਸਕਦਾ ਹੈ, ਜੋ ਕਿ ਤੈਅ ਸ਼ਡਿਊਲ ਤੋਂ ਚਾਰ ਦਿਨ ਪਹਿਲਾਂ ਹੋਵੇਗਾ। ਮੌਜੂਦਾ ਯੋਜਨਾ ਮੁਤਾਬਕ ਸੈਸ਼ਨ 13 ਅਗਸਤ ਤੋਂ 17 ਅਗਸਤ ਤੱਕ ਮੁਲਤਵੀ ਕਰਕੇ 21 ਅਗਸਤ ਤੱਕ ਜਾਰੀ ਰੱਖਣ ਦੀ ਸੰਭਾਵਨਾ ਸੀ।
ਸੋਮਵਾਰ ਨੂੰ ਸਰਕਾਰ ਨੇ ਵਿਰੋਧੀ ਧਿਰ ਦੇ ਸ਼ੋਰਗੁੱਲ ਦੇ ਦੌਰਾਨ ਕੁਝ ਮਹੱਤਵਪੂਰਨ ਬਿੱਲ ਪਾਸ ਕੀਤੇ। ਇਸ ਤੋਂ ਪਹਿਲਾਂ ਵੀ ਕਈ ਕਾਨੂੰਨ ਹੰਗਾਮੇ ਦੇ ਮਾਹੌਲ ਵਿੱਚ ਹੀ ਪਾਸ ਹੋਏ। ਬਿਹਾਰ ਦੇ ਐਸਆਈਆਰ ਮੁੱਦੇ ‘ਤੇ ਵਿਰੋਧੀ ਧਿਰ ਨੇ ਸਰਕਾਰ ਵਿਰੁੱਧ ਸਖ਼ਤ ਰਵੱਈਆ ਅਪਣਾਇਆ ਹੋਇਆ ਹੈ ਅਤੇ ਸਦਨ ਦੇ ਅੰਦਰ ਤੇ ਬਾਹਰ ਦੋਵੇਂ ਥਾਵਾਂ ‘ਤੇ ਵਿਰੋਧ ਜਾਰੀ ਹੈ।
ਬੰਗਾਲੀ ਭਾਸ਼ਾ ਵਿਵਾਦ ਤੇ ਸੰਸਦ ਬਾਹਰ ਪ੍ਰਦਰਸ਼ਨ
ਸੰਸਦ ਬਾਹਰ ਟੀਐਮਸੀ ਸੰਸਦ ਮੈਂਬਰਾਂ, ਜਿਨ੍ਹਾਂ ਵਿੱਚ ਸਾਬਕਾ ਕ੍ਰਿਕਟਰ ਅਤੇ ਮੁਰਸ਼ਿਦਾਬਾਦ ਤੋਂ ਸੰਸਦ ਮੈਂਬਰ ਯੂਸਫ਼ ਪਠਾਨ, ਅਤੇ ਸਪਾ ਦੀ ਸੰਸਦ ਮੈਂਬਰ ਜਯਾ ਬੱਚਨ ਸ਼ਾਮਲ ਹਨ, ਨੇ ਬੰਗਾਲੀ ਭਾਸ਼ਾ ਸੰਬੰਧੀ ਵਿਵਾਦ ਦਾ ਵਿਰੋਧ ਕੀਤਾ।
ਇਸਦੇ ਨਾਲ ਹੀ, ਵਿਰੋਧੀ ਧਿਰ ਵੱਲੋਂ ਜਾਰੀ ਨਾਅਰੇਬਾਜ਼ੀ ਅਤੇ ਹੰਗਾਮੇ ਕਾਰਨ ਲੋਕ ਸਭਾ ਦੀ ਕਾਰਵਾਈ ਦੁਪਹਿਰ 12 ਵਜੇ ਤੱਕ ਲਈ ਮੁਲਤਵੀ ਕਰ ਦਿੱਤੀ ਗਈ। ਅੱਜ ਵੀ ਸਦਨ ਵਿੱਚ ਵਿਰੋਧੀ ਮੈਂਬਰਾਂ ਵੱਲੋਂ ਹੰਗਾਮੇ ਦੇ ਜਾਰੀ ਰਹਿਣ ਦੀ ਸੰਭਾਵਨਾ ਹੈ।
