ਨਵੀਂ ਦਿੱਲੀ :- ਦੇਸ਼ ਦੀ ਸਭ ਤੋਂ ਉੱਚੀ ਤੇ ਵੱਡੀ ਵਿਧਾਨਿਕ ਇਮਾਰਤ ਵਿੱਚ ਸ਼ੁੱਕਰਵਾਰ ਸਵੇਰੇ ਇੱਕ ਹੋਰ ਸੁਰੱਖਿਆ ਚੂਕ ਸਾਹਮਣੇ ਆਈ। ਸਵੇਰੇ ਤਕਰੀਬਨ 6 ਵਜੇ ਇੱਕ ਵਿਅਕਤੀ ਸੰਸਦ ਦੀ ਕੰਧ ਟੱਪ ਕੇ ਅੰਦਰ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਪਰ ਸੁਰੱਖਿਆ ਕਰਮੀਆਂ ਨੇ ਸਮੇਂ ਸਿਰ ਕਾਰਵਾਈ ਕਰਕੇ ਉਸਨੂੰ ਰੋਕ ਲਿਆ।
ਸੁਰੱਖਿਆ ਕਰਮੀਆਂ ਨੇ ਸਮੇਂ ਸਿਰ ਦਿੱਤਾ ਜਵਾਬ
ਦਿੱਲੀ ਪੁਲਿਸ ਮੁਤਾਬਕ, ਜਿਵੇਂ ਹੀ ਗਸ਼ਤ ‘ਤੇ ਤਾਇਨਾਤ ਸੁਰੱਖਿਆ ਕਰਮੀਆਂ ਨੇ ਸ਼ੱਕੀ ਹਿਲਜੁਲ ਦੇਖੀ, ਤੁਰੰਤ ਕਾਰਵਾਈ ਕਰਕੇ ਉਸਨੂੰ ਕੰਧ ਪਾਰ ਕਰਨ ਤੋਂ ਪਹਿਲਾਂ ਹੀ ਕਾਬੂ ਕਰ ਲਿਆ ਗਿਆ। ਸ਼ਖ਼ਸ ਫ਼ਿਲਹਾਲ ਪੁਲਿਸ ਹਿਰਾਸਤ ਵਿੱਚ ਹੈ ਅਤੇ ਉਸਦੀ ਪੁੱਛਗਿੱਛ ਜਾਰੀ ਹੈ।
ਰਾਜ ਸਭਾ ਅਧਿਕਾਰੀ ਵੱਲੋਂ ਪੁਸ਼ਟੀ
ਇੱਕ ਰਾਜ ਸਭਾ ਅਧਿਕਾਰੀ ਨੇ ਦੱਸਿਆ ਕਿ, “ਅੱਜ ਸਵੇਰੇ ਇੱਕ ਸ਼ਖ਼ਸ ਨੇ ਬਿਨਾਂ ਇਜਾਜ਼ਤ ਸੰਸਦ ਪ੍ਰੰਗਣ ਵਿੱਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕੀਤੀ। ਉਸਨੂੰ ਫੜ ਲਿਆ ਗਿਆ ਹੈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।”
2023 ਦੀ ਘਟਨਾ ਤੋਂ ਬਾਅਦ ਮੁੜ ਸੁਰੱਖਿਆ ‘ਤੇ ਸਵਾਲ
ਇਹ ਤਾਜ਼ਾ ਕੋਸ਼ਿਸ਼ ਉਸ ਸਮੇਂ ਸਾਹਮਣੇ ਆਈ ਹੈ ਜਦੋਂ 13 ਦਸੰਬਰ 2023 ਨੂੰ ਲੋਕ ਸਭਾ ਚੈਂਬਰ ਵਿੱਚ ਵੀ ਚੌਕਾਣ ਵਾਲਾ ਸੁਰੱਖਿਆ ਭੰਗ ਹੋਇਆ ਸੀ। ਉਸ ਵੇਲੇ ਦੋ ਵਿਅਕਤੀਆਂ ਨੇ ਵਿਜ਼ਟਰ ਗੈਲਰੀ ਤੋਂ ਛਾਲ ਮਾਰ ਕੇ ਧੂੰਆਂ ਛੱਡਿਆ ਅਤੇ ਨਾਰੇਬਾਜ਼ੀ ਕੀਤੀ ਸੀ, ਜਦੋਂਕਿ ਹੋਰ ਦੋ ਲੋਕਾਂ ਨੇ ਸੰਸਦ ਕੰਪਲੇਕਸ ਦੇ ਬਾਹਰ ਰੰਗਦਾਰ ਧੂੰਆਂ ਛੱਡ ਕੇ ਪ੍ਰਦਰਸ਼ਨ ਕੀਤਾ ਸੀ। ਉਸ ਮਾਮਲੇ ਵਿੱਚ ਛੇ ਲੋਕ ਗ੍ਰਿਫ਼ਤਾਰ ਹੋਏ ਸਨ ਅਤੇ ਉਨ੍ਹਾਂ ‘ਤੇ ਕੜੀਆਂ ਸ਼ਰਤਾਂ ਲਗਾਈਆਂ ਗਈਆਂ ਸਨ, ਜਿਵੇਂ ਮੀਡੀਆ ਨਾਲ ਗੱਲਬਾਤ ‘ਤੇ ਰੋਕ ਅਤੇ ਦਿੱਲੀ–ਐਨਸੀਆਰ ਤੋਂ ਬਾਹਰ ਜਾਣ ਲਈ ਪਹਿਲਾਂ ਮਨਜ਼ੂਰੀ ਲੈਣ ਦੀ ਲੋੜ।
ਵਧੀਕ ਸੁਰੱਖਿਆ ਦੀ ਲੋੜ ਮਹਿਸੂਸ
ਤਾਜ਼ਾ ਘਟਨਾ ਨੇ ਇੱਕ ਵਾਰ ਫਿਰ ਸੰਸਦ ਦੀ ਸੁਰੱਖਿਆ ‘ਤੇ ਸਵਾਲ ਖੜੇ ਕਰ ਦਿੱਤੇ ਹਨ। ਪੁਲਿਸ ਅਧਿਕਾਰੀਆਂ ਨੇ ਕਿਹਾ ਹੈ ਕਿ ਸ਼ਖ਼ਸ ਦੇ ਮਨਸੂਬਿਆਂ ਬਾਰੇ ਵਧੇਰੇ ਜਾਣਕਾਰੀ ਪੁੱਛਗਿੱਛ ਪੂਰੀ ਹੋਣ ਤੋਂ ਬਾਅਦ ਹੀ ਸਾਂਝੀ ਕੀਤੀ ਜਾਵੇਗੀ।
