ਭਾਰਤ-ਬ੍ਰਿਟੇਨ ਸਬੰਧਾਂ ਨੂੰ ਨਵੀਂ ਰਫ਼ਤਾਰ: ਮੁੰਬਈ ‘ਚ ਅੱਜ ਮੋਦੀ ਤੇ ਸਟਾਰਮਰ ਦੀ ਮਹੱਤਵਪੂਰਨ ਬੈਠਕ, ‘ਵਿਜ਼ਨ-2035’ ਰੋਡਮੈਪ ‘ਤੇ ਹੋਵੇਗੀ ਚਰਚਾ

ਨਵੀਂ ਦਿੱਲੀ :- ਭਾਰਤ ਅਤੇ ਬ੍ਰਿਟੇਨ ਦਰਮਿਆਨ ਰਣਨੀਤਕ ਸਾਂਝੇਦਾਰੀ ਨੂੰ ਨਵੀਂ ਮਜ਼ਬੂਤੀ ਦੇਣ ਲਈ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਆਪਣੇ ਪਹਿਲੇ ਭਾਰਤ ਦੌਰੇ ‘ਤੇ ਪਹੁੰਚੇ ਹਨ। ਅੱਜ ਸਵੇਰੇ ਮੁੰਬਈ ਵਿੱਚ ਉਨ੍ਹਾਂ ਦੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਹੋਣੀ ਨਿਰਧਾਰਤ ਹੈ। ਦੋਵੇਂ ਨੇਤਾਵਾਂ ਵਿਚਾਲੇ ਇਹ ਬੈਠਕ ਦੋਵੇਂ ਦੇਸ਼ਾਂ ਦੇ ਭਵਿੱਖੀ ਰਿਸ਼ਤਿਆਂ ਲਈ ਬਹੁਤ ਅਹਿਮ ਮੰਨੀ ਜਾ ਰਹੀ ਹੈ। ਇਸ ਮੀਟਿੰਗ ਵਿੱਚ ਖਾਸ ਤੌਰ ‘ਤੇ ‘ਵਿਜ਼ਨ-2035’ ਰੋਡਮੈਪ ਨੂੰ ਅੱਗੇ ਵਧਾਉਣ ਅਤੇ ਦੁਵੱਲੇ ਵਪਾਰ ਸਮਝੌਤੇ ਦੇ ਮੌਕਿਆਂ ਦਾ ਪੂਰਾ ਲਾਭ ਲੈਣ ‘ਤੇ ਚਰਚਾ ਹੋਵੇਗੀ।

ਵਿਜ਼ਨ-2035 ਕੀ ਹੈ?

‘ਵਿਜ਼ਨ-2035’ ਭਾਰਤ ਅਤੇ ਬ੍ਰਿਟੇਨ ਦਰਮਿਆਨ ਇੱਕ ਦਸ ਸਾਲਾਂ ਦਾ ਸਾਂਝਾ ਰੋਡਮੈਪ ਹੈ, ਜੋ ਪੀ.ਐੱਮ. ਮੋਦੀ ਦੀ ਜੁਲਾਈ 2025 ਦੀ ਲੰਡਨ ਯਾਤਰਾ ਦੌਰਾਨ ਤਿਆਰ ਕੀਤਾ ਗਿਆ ਸੀ। ਇਸ ਰੋਡਮੈਪ ਦਾ ਮਕਸਦ ਦੋਵੇਂ ਦੇਸ਼ਾਂ ਵਿਚਾਲੇ ਆਰਥਿਕ, ਤਕਨੀਕੀ ਅਤੇ ਰੱਖਿਆ ਸਬੰਧਾਂ ਨੂੰ ਇਕ ਨਵੇਂ ਪੱਧਰ ‘ਤੇ ਲਿਜਾਣਾ ਹੈ।

ਮੁੱਖ ਖੇਤਰਾਂ ਵਿੱਚ ਸ਼ਾਮਲ ਹਨ:

• ਵਪਾਰ ਅਤੇ ਨਿਵੇਸ਼
• ਰੱਖਿਆ ਤੇ ਸੁਰੱਖਿਆ
• ਤਕਨਾਲੋਜੀ ਅਤੇ ਨਵੀਨਤਾ
• ਜਲਵਾਯੂ ਅਤੇ ਊਰਜਾ ਸਹਿਯੋਗ
• ਸਿਹਤ ਤੇ ਸਿੱਖਿਆ ਖੇਤਰ ਵਿੱਚ ਸਾਂਝੇ ਉਪਰਾਲੇ

ਇਹ ਵਿਜ਼ਨ ਦੋਵੇਂ ਦੇਸ਼ਾਂ ਦੀ ਵਿਆਪਕ ਰਣਨੀਤਕ ਸਾਂਝੇਦਾਰੀ (Comprehensive Strategic Partnership) ਨੂੰ ਹੋਰ ਮਜ਼ਬੂਤ ਕਰਨ ਵੱਲ ਇੱਕ ਵੱਡਾ ਕਦਮ ਮੰਨਿਆ ਜਾ ਰਿਹਾ ਹੈ।

ਮੁੰਬਈ ‘ਚ ਹੋਣਗੇ ਕਈ ਮਹੱਤਵਪੂਰਨ ਪ੍ਰੋਗਰਾਮ

ਅੱਜ ਸਵੇਰੇ 10 ਵਜੇ ਮੋਦੀ ਤੇ ਸਟਾਰਮਰ ਦੀ ਮੁੱਖ ਬੈਠਕ ਹੋਵੇਗੀ, ਜਿਸ ਵਿੱਚ ਇਹ ਮੁੱਦੇ ਰਹਿਣਗੇ:

ਆਰਥਿਕ ਅਤੇ ਵਪਾਰ ਸਮਝੌਤਾ (CETA): ਦੋਵੇਂ ਨੇਤਾ ਭਾਰਤ-ਬ੍ਰਿਟੇਨ “ਕੰਪ੍ਰੀਹੈਂਸਿਵ ਇਕਨਾਮਿਕ ਐਂਡ ਟਰੇਡ ਐਗਰੀਮੈਂਟ” (CETA) ਦੀ ਤਰੱਕੀ ਦੀ ਸਮੀਖਿਆ ਕਰਨਗੇ। ਇਹ ਸਮਝੌਤਾ ਭਵਿੱਖ ਵਿੱਚ ਮੁਕਤ ਵਪਾਰ (FTA) ਨੂੰ ਹੋਰ ਵਧਾਵੇਗਾ।

CEO ਫੋਰਮ ਤੇ ਗਲੋਬਲ ਫਿਨਟੈਕ ਫੈਸਟ: ਦੁਪਹਿਰ ਨੂੰ ਦੋਵੇਂ ਆਗੂ ਮੁੰਬਈ ਦੇ ਜੀਓ ਵਰਲਡ ਸੈਂਟਰ ਵਿੱਚ CEO ਫੋਰਮ ‘ਚ ਸ਼ਾਮਲ ਹੋਣਗੇ ਤੇ ਉਸ ਤੋਂ ਬਾਅਦ ਗਲੋਬਲ ਫਿਨਟੈਕ ਫੈਸਟ (GFF) ਨੂੰ ਸੰਬੋਧਨ ਕਰਨਗੇ। ਇਹ ਤਿੰਨ ਦਿਨਾਂ ਦਾ ਪ੍ਰੋਗਰਾਮ ਹੈ ਜਿਸ ਵਿੱਚ 75 ਤੋਂ ਵੱਧ ਦੇਸ਼ਾਂ ਦੇ 1 ਲੱਖ ਤੋਂ ਵੱਧ ਡੈਲੀਗੇਟ ਸ਼ਾਮਲ ਹੋਣਗੇ।

ਵਿਸ਼ਵ ਤੇ ਖੇਤਰੀ ਮੁੱਦੇ: ਦੋਵੇਂ ਆਗੂ ਵਿਸ਼ਵ ਸ਼ਾਂਤੀ, ਖੇਤਰੀ ਸੁਰੱਖਿਆ ਅਤੇ ਜਲਵਾਯੂ ਬਦਲਾਅ ਵਰਗੇ ਅਹਿਮ ਵਿਸ਼ਿਆਂ ‘ਤੇ ਵੀ ਵਿਚਾਰ ਸਾਂਝੇ ਕਰਨਗੇ।

ਸਟਾਰਮਰ ਦਾ ਵੱਡਾ ਬਿਆਨ — “ਇਹ ਸਿਰਫ਼ ਸਮਝੌਤਾ ਨਹੀਂ, ਵਿਕਾਸ ਦਾ ਲਾਂਚਪੈਡ ਹੈ”

ਮੁੰਬਈ ਪਹੁੰਚਣ ਤੋਂ ਬਾਅਦ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਭਾਰਤੀ ਉੱਦਮੀਆਂ ਨਾਲ ਮੁਲਾਕਾਤ ਦੌਰਾਨ ਕਿਹਾ ਕਿ “ਯੂਰਪੀਅਨ ਯੂਨੀਅਨ ਤੋਂ ਬਾਹਰ ਆਉਣ ਤੋਂ ਬਾਅਦ, ਭਾਰਤ ਨਾਲ ਇਹ ਸਭ ਤੋਂ ਵੱਡਾ ਵਪਾਰ ਸਮਝੌਤਾ ਹੈ। ਇਹ ਸਿਰਫ਼ ਕਾਗਜ਼ ਦਾ ਟੁਕੜਾ ਨਹੀਂ, ਸਗੋਂ ਵਿਕਾਸ ਦਾ ਲਾਂਚਪੈਡ ਹੈ।”

ਉਨ੍ਹਾਂ ਕਿਹਾ ਕਿ ਇਸ ਸਮਝੌਤੇ ਨਾਲ ਦੋਵੇਂ ਦੇਸ਼ਾਂ ਵਿਚਾਲੇ ਵਪਾਰ ਤੇਜ਼ ਅਤੇ ਸਸਤਾ ਹੋਵੇਗਾ, ਜਿਸ ਨਾਲ ਰੁਜ਼ਗਾਰ ਦੇ ਨਵੇਂ ਮੌਕੇ ਵੀ ਪੈਦਾ ਹੋਣਗੇ। ਹਾਲਾਂਕਿ ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਇਸ ਵਿਚ ਵੀਜ਼ਾ ਨਿਯਮਾਂ ਵਿੱਚ ਕੋਈ ਛੋਟ ਨਹੀਂ ਹੋਵੇਗੀ ਅਤੇ ਨਾ ਹੀ ਭਾਰਤੀ ਵਿਦਿਆਰਥੀਆਂ ਜਾਂ ਕਾਮਿਆਂ ਲਈ ਨਵੇਂ ਵੀਜ਼ਾ ਰਸਤੇ ਖੋਲ੍ਹੇ ਜਾਣਗੇ।

ਮੋਦੀ ਦਾ ਸਵਾਗਤੀ ਸੰਦੇਸ਼

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਟਾਰਮਰ ਦੀ ਇਸ ਇਤਿਹਾਸਕ ਭਾਰਤ ਯਾਤਰਾ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਦੋਵੇਂ ਦੇਸ਼ ਇੱਕ ਮਜ਼ਬੂਤ ਤੇ ਖੁਸ਼ਹਾਲ ਭਵਿੱਖ ਦੇ ਸਾਂਝੇ ਦ੍ਰਿਸ਼ਟੀਕੋਣ ਵੱਲ ਵਧ ਰਹੇ ਹਨ। ਉਨ੍ਹਾਂ ਕਿਹਾ ਕਿ “ਵਿਜ਼ਨ-2035 ਸਿਰਫ਼ ਦਸਤਾਵੇਜ਼ ਨਹੀਂ, ਸਗੋਂ ਦੋਵੇਂ ਲੋਕਤੰਤਰਾਂ ਦੀ ਸਾਂਝੀ ਇੱਛਾ ਦਾ ਪ੍ਰਤੀਕ ਹੈ।”