ਨਵੀਂ ਦਿੱਲੀ :- ਅਮਰੀਕਾ ਵੱਲੋਂ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਨੂੰ ਡਿਪੋਰਟ ਕਰਨ ਦੀ ਕਾਰਵਾਈ ਜਾਰੀ ਹੈ। ਫ਼ਰਵਰੀ ਵਿੱਚ ਸੈਂਕੜੇ ਪੰਜਾਬੀ ਪ੍ਰਵਾਸੀਆਂ ਨੂੰ ਵਾਪਸ ਭੇਜਣ ਤੋਂ ਬਾਅਦ ਹੁਣ ਪੰਜਾਬ ਦੀ 73 ਸਾਲਾ ਹਰਜੀਤ ਕੌਰ ਨੂੰ 34 ਸਾਲ ਅਮਰੀਕਾ ‘ਚ ਗੁਜ਼ਾਰਣ ਮਗਰੋਂ ਜੰਜ਼ੀਰਾਂ ਵਿੱਚ ਬੰਨ੍ਹ ਕੇ ਭਾਰਤ ਡਿਪੋਰਟ ਕੀਤਾ ਗਿਆ। ਇਸ ਕਦਮ ਨੂੰ ਪ੍ਰਵਾਸੀ ਹੱਕਾਂ ਨਾਲ ਜੁੜੀਆਂ ਸੰਸਥਾਵਾਂ ਨੇ ਜ਼ਾਲਮ ਅਤੇ ਅਣਮਨੁੱਖੀ ਕਹਿੰਦੇ ਹੋਏ ਨਿੰਦਾ ਕੀਤੀ ਹੈ। ਕੈਲੀਫੋਰਨੀਆ ਵਿੱਚ ਕਈ ਅਮਰੀਕੀ ਨੇਤਾਵਾਂ ਅਤੇ ਸੰਗਠਨਾਂ ਨੇ ਇਸ ਫ਼ੈਸਲੇ ਦੇ ਵਿਰੋਧ ਵਿੱਚ ਪ੍ਰਦਰਸ਼ਨ ਕੀਤਾ।
“ਬੀਮਾਰ ਹੋਣ ਦੇ ਬਾਵਜੂਦ ਦਵਾਈ ਨਹੀਂ ਮਿਲੀ” – ਹਰਜੀਤ ਕੌਰ
ਪੰਜਾਬ ਵਿੱਚ ਆਪਣੇ ਭਰਾ ਕੋਲ ਵਾਪਸ ਆਈ ਹਰਜੀਤ ਕੌਰ ਨੇ ਦਾਅਵਾ ਕੀਤਾ ਕਿ ਹਿਰਾਸਤ ਦੌਰਾਨ ਉਸ ਨਾਲ ਬੇਹੱਦ ਅਣਮਨੁੱਖੀ ਸਲੂਕ ਕੀਤਾ ਗਿਆ। ਉਸਨੇ ਕਿਹਾ ਕਿ ਗੰਭੀਰ ਬਿਮਾਰੀਆਂ ਹੋਣ ਦੇ ਬਾਵਜੂਦ ਦਵਾਈ ਨਹੀਂ ਦਿੱਤੀ ਗਈ ਅਤੇ ਕੜਾਕੇ ਦੀ ਠੰਢ ਵਿੱਚ ਸਿਰਫ ਇੱਕ ਚਾਦਰ ਹੀ ਮਿਲੀ। ਉਹਨਾਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸਿਰਫ ਚਿਪਸ ਅਤੇ ਸੈਂਡਵਿਚ ਦੇ ਕੇ ਰੱਖਿਆ ਗਿਆ ਅਤੇ ਇੱਕ ਹਾਰਡਕੋਰ ਮੁਜ਼ਰਮ ਵਾਂਗ ਵਿਵਹਾਰ ਕੀਤਾ ਗਿਆ।
ਕੌਣ ਹੈ ਹਰਜੀਤ ਕੌਰ
ਹਰਜੀਤ ਕੌਰ 1992 ਵਿੱਚ ਇੱਕ ਸਿੰਗਲ ਮਾਂ ਵਜੋਂ ਆਪਣੇ ਦੋ ਪੁੱਤਰਾਂ ਨਾਲ ਅਮਰੀਕਾ ਗਈ ਸੀ। ਉਹ ਕੈਲੀਫੋਰਨੀਆ ਦੇ ਈਸਟ ਬੇਅ ਖੇਤਰ ਵਿੱਚ ਭਾਰਤੀ ਕੱਪੜਿਆਂ ਦੀ ਦੁਕਾਨ ‘ਤੇ ਲੰਬੇ ਸਮੇਂ ਤੱਕ ਕੰਮ ਕਰਦੀ ਰਹੀ। ਉਸਦੀ ਪੋਤੀ ਸੁਖਦੀਪ ਕੌਰ ਨੇ ਦੱਸਿਆ ਕਿ ਉਹ ਨਿਰਸਵਾਰਥ ਅਤੇ ਮਿਹਨਤੀ ਔਰਤ ਸੀ, ਜੋ ਸਿੱਖ ਭਾਈਚਾਰੇ ਲਈ ਮਾਂ ਵਾਂਗ ਸੀ।
2012 ਤੋਂ ਸ਼ਰਣ ਲਈ ਸੰਘਰਸ਼
ਹਰਜੀਤ ਕੌਰ ਨੇ ਕਈ ਵਾਰ ਅਮਰੀਕਾ ਵਿੱਚ ਸ਼ਰਣ ਲਈ ਅਰਜ਼ੀਆਂ ਦਿੱਤੀਆਂ, ਪਰ 2012 ਵਿੱਚ ਉਸਦੀ ਅਰਜ਼ੀ ਰੱਦ ਹੋ ਗਈ। ਫਿਰ ਵੀ, ਉਹ ਹਰ ਛੇ ਮਹੀਨਿਆਂ ਬਾਅਦ ਸੈਨ ਫਰਾਂਸਿਸਕੋ ਇਮੀਗ੍ਰੇਸ਼ਨ ਦਫ਼ਤਰ ਵਿੱਚ ਰਿਪੋਰਟ ਕਰਦੀ ਰਹੀ। ਅਧਿਕਾਰੀਆਂ ਨੇ ਉਸਨੂੰ ਭਰੋਸਾ ਦਿੱਤਾ ਸੀ ਕਿ ਯਾਤਰਾ ਦਸਤਾਵੇਜ਼ਾਂ ਦੀ ਪ੍ਰਕਿਰਿਆ ਪੂਰੀ ਹੋਣ ਤੱਕ ਉਹ ਨਿਗਰਾਨੀ ਹੇਠ ਰਹਿ ਸਕਦੀ ਹੈ।
ਅਚਾਨਕ ਹਿਰਾਸਤ ਤੋਂ ਡਿਪੋਰਟ ਤੱਕ ਦਾ ਸਫ਼ਰ
8 ਸਤੰਬਰ 2025 ਨੂੰ ਸੈਨ ਫਰਾਂਸਿਸਕੋ ਵਿੱਚ ਯੂਐੱਸ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਇਨਫੋਰਸਮੈਂਟ (ICE) ਨੇ ਉਸਨੂੰ ਨਿਯਮਤ ਜਾਂਚ ਦੌਰਾਨ ਅਚਾਨਕ ਹਿਰਾਸਤ ਵਿੱਚ ਲੈ ਲਿਆ। ਫਿਰ ਉਸਨੂੰ ਬੇਕਰਸਫ਼ੀਲਡ ਦੀ ਮੇਸਾ ਫਰਡੇ ਜੇਲ੍ਹ ਤੋਂ ਲਾਸ ਐਂਜਲਸ, ਜਾਰਜੀਆ ਅਤੇ ਆਖ਼ਿਰਕਾਰ ਦਿੱਲੀ ਭੇਜ ਦਿੱਤਾ ਗਿਆ।
ਪ੍ਰਵਾਸੀਆਂ ਵਿੱਚ ਵਧ ਰਹੀ ਚਿੰਤਾ
ਹਰਜੀਤ ਕੌਰ ਤਿੰਨ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਅਮਰੀਕਾ ਦੇ ਈਸਟ ਬੇਅ ਖੇਤਰ ਵਿੱਚ ਰਹਿ ਰਹੀ ਸੀ। ਉਸਦੀ ਡਿਪੋਰਟੇਸ਼ਨ ਨੇ ਉਥੇ ਰਹਿੰਦੇ ਹੋਰ ਪੰਜਾਬੀ ਪ੍ਰਵਾਸੀਆਂ ਵਿੱਚ ਡਰ ਅਤੇ ਚਿੰਤਾ ਦਾ ਮਾਹੌਲ ਪੈਦਾ ਕਰ ਦਿੱਤਾ ਹੈ।
