ਰੋਹਤਕ :- ਰੋਹਤਕ ਦੇ ਲਖਨਮਾਜਰਾ ਬਲਾਕ ਵਿੱਚ ਬੁੱਧਵਾਰ ਸਵੇਰੇ ਬਾਸਕੇਟਬਾਲ ਮੈਦਾਨ ‘ਚ ਇੱਕ ਐਸੀ ਅਣਹੋਣੀ ਵਾਪਰੀ ਜਿਸ ਨੇ ਪੂਰੇ ਇਲਾਕੇ ਨੂੰ ਹਿਲਾ ਦਿੱਤਾ। ਪ੍ਰੈਕਟਿਸ ਦੌਰਾਨ ਬਾਸਕੇਟਬਾਲ ਦਾ ਖੰਭਾ ਅਚਾਨਕ ਜ਼ਮੀਨ ‘ਤੇ ਆ ਡਿੱਗਿਆ, ਜਿਸ ਨਾਲ 16 ਸਾਲਾ ਰਾਸ਼ਟਰੀ ਪੱਧਰੀ ਖਿਡਾਰੀ ਹਾਰਦਿਕ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਘਟਨਾ ਦੀ ਸੂਚਨਾ ਮਿਲਣ ‘ਤੇ ਪੁਲਿਸ ਤੁਰੰਤ ਮੌਕੇ ‘ਤੇ ਪਹੁੰਚੀ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ।
ਸੁਪਨਿਆਂ ਨਾਲ ਭਰਪੂਰ ਨੌਜਵਾਨ ਦੀ ਜੀਵਨਲੀਲਾ ਸਮਾਪਤ
ਮ੍ਰਿਤਕ ਹਾਰਦਿਕ, ਜੋ 10ਵੀਂ ਜਮਾਤ ਦਾ ਵਿਦਿਆਰਥੀ ਅਤੇ ਸੰਦੀਪ (ਰਹਿ. ਲਖਨਮਾਜਰਾ) ਦਾ ਪੁੱਤਰ ਸੀ, ਹਰ ਰੋਜ਼ ਦੀ ਤਰ੍ਹਾਂ ਅੱਜ ਵੀ ਸਵੇਰੇ ਬਾਸਕੇਟਬਾਲ ਦਾ ਅਭਿਆਸ ਕਰਨ ਮੈਦਾਨ ‘ਚ ਪਹੁੰਚਿਆ ਸੀ। ਉਸਦਾ ਇੱਕ ਛੋਟਾ ਭਰਾ ਵੀ 7ਵੀਂ ਜਮਾਤ ਵਿੱਚ ਪੜ੍ਹਦਾ ਹੈ। ਪਰ ਹਾਰਦਿਕ ਦੀ ਇਹ ਸਧਾਰਣ ਪ੍ਰੈਕਟਿਸ ਉਸਦੀ ਜ਼ਿੰਦਗੀ ਦੀ ਆਖ਼ਰੀ ਵਾਰੀ ਸਾਬਤ ਹੋਈ।
ਸੀਸੀਟੀਵੀ ‘ਚ ਕੈਦ ਦਹਿਲਾ ਦੇਣ ਵਾਲੀ ਤਸਵੀਰ – 750 ਕਿਲੋ ਭਾਰ ਵਾਲਾ ਖੰਭਾ ਢਹਿ ਪਿਆ
ਪਰਿਵਾਰ ਅਤੇ ਪੁਲਿਸ ਦੇ ਬਿਆਨਾਂ ਮੁਤਾਬਕ, ਘਟਨਾ ਬਿਲਕੁਲ ਅਚਾਨਕ ਵਾਪਰੀ। ਸੀਸੀਟੀਵੀ ਫੁਟੇਜ ਵਿੱਚ ਸਾਫ਼ ਦਿਸਦਾ ਹੈ ਕਿ ਹਾਰਦਿਕ ਨੇ ਜਦੋਂ ਗੇਂਦ ਨੂੰ ਹੂਪ ਵੱਲ ਸੁੱਟਿਆ ਅਤੇ ਖੰਭੇ ਨੇੜੇ ਦੌੜਿਆ, ਤਾਂ ਖੰਭਾ ਇੱਕ ਪਲ ਵਿੱਚ ਟੁੱਟ ਕੇ ਉਸਦੀ ਛਾਤੀ ‘ਤੇ ਆ ਡਿੱਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਖੰਭਾ ਲਗਭਗ 750 ਕਿਲੋਗ੍ਰਾਮ ਭਾਰ ਦਾ ਸੀ। ਭਾਰੀ ਚੋਟ ਲੱਗਣ ਨਾਲ ਹਾਰਦਿਕ ਨੇ ਮੌਕੇ ‘ਤੇ ਹੀ ਦਮ ਤੋੜ ਦਿੱਤਾ।
ਹਸਪਤਾਲ ਪਹੁੰਚਣ ਤੇ ਡਾਕਟਰਾਂ ਨੇ ਕੀਤਾ ਮ੍ਰਿਤਕ ਐਲਾਨ
ਹਾਦਸੇ ਤੋਂ ਤੁਰੰਤ ਬਾਅਦ ਹਾਰਦਿਕ ਨੂੰ ਹਸਪਤਾਲ ਲਿਜਾਇਆ ਗਿਆ, ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ। ਪਰਿਵਾਰ, ਖਿਡਾਰੀ ਮੰਡਲ ਅਤੇ ਪੂਰਾ ਇਲਾਕਾ ਸ਼ੌਕ ਵਿੱਚ ਹੈ।
ਪੁਲਿਸ ਨੇ ਸ਼ੁਰੂ ਕੀਤੀ ਜਾਂਚ, ਸੀਸੀਟੀਵੀ ਜ਼ਬਤ – ਤਿੰਨ ਦਿਨ ਲਈ ਖੇਡ ਸਮਾਗਮ ਰੱਦ
ਲਖਨਮਾਜਰਾ ਪੁਲਿਸ ਸਟੇਸ਼ਨ ਦੇ ਐਸਐਚਓ ਸਮਰਜੀਤ ਸਿੰਘ ਨੇ ਦੱਸਿਆ ਕਿ ਲਾਸ਼ ਦਾ ਪੋਸਟਮਾਰਟਮ ਕਰਵਾ ਕੇ ਪਰਿਵਾਰ ਨੂੰ ਸੌਂਪ ਦਿੱਤਾ ਗਿਆ ਹੈ। ਪੁਲਿਸ ਨੇ ਧਾਰਾ 174 (CRPC) ਤਹਿਤ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ ਅਤੇ ਘਟਨਾ ਦੀ ਸੀਸੀਟੀਵੀ ਫੁਟੇਜ ਵੀ ਜ਼ਬਤ ਕਰ ਲਈ ਗਈ ਹੈ। ਇਸ ਹਾਦਸੇ ਤੋਂ ਬਾਅਦ ਇਲਾਕੇ ਵਿੱਚ ਹੋਣ ਵਾਲੇ ਖੇਡ ਸਮਾਗਮ ਤਿੰਨ ਦਿਨ ਲਈ ਮੁਲਤਵੀ ਕਰ ਦਿੱਤੇ ਗਏ ਹਨ।
