ਚੰਡੀਗੜ੍ਹ :- ਆਧੁਨਿਕ ਜੀਵਨ ਸ਼ੈਲੀ ਵਿੱਚ ਘਰ-ਗ੍ਰਿਹਸਥੀ, ਨੌਕਰੀ, ਬੱਚਿਆਂ ਦੀ ਜ਼ਿੰਮੇਵਾਰੀ ਅਤੇ ਹਰ ਪਾਸੇ ਦੀ ਦੌੜ-ਭੱਜ ਨੇ ਔਰਤਾਂ ਦੀ ਸਿਹਤ ‘ਤੇ ਗੰਭੀਰ ਪ੍ਰਭਾਵ ਪਾਇਆ ਹੈ। ਰੋਜ਼ਾਨਾ ਦੀ ਬਿਜ਼ੀ ਰੁਟੀਨ ਕਾਰਨ ਕਈ ਔਰਤਾਂ ਨੂੰ ਪੂਰੀ ਨੀਂਦ ਨਹੀਂ ਮਿਲਦੀ, ਪੋਸ਼ਣ ਦੀ ਘਾਟ ਰਹਿੰਦੀ ਹੈ ਅਤੇ ਆਰਾਮ ਲਈ ਵੀ ਸਮਾਂ ਨਹੀਂ ਬਚਦਾ। ਇਸ ਕਾਰਨ ਥਕਾਵਟ, ਖੂਨ ਦੀ ਕਮੀ, ਹਾਰਮੋਨਲ ਗੜਬੜ ਅਤੇ ਰੋਗ-ਰੋਕੂ ਸ਼ਕਤੀ ਘਟਣਾ ਵਰਗੀਆਂ ਸਮੱਸਿਆਵਾਂ ਤੇਜ਼ੀ ਨਾਲ ਵਧ ਰਹੀਆਂ ਹਨ।
ਪੋਸ਼ਣ ਮਾਹਿਰ ਦੀਪਸ਼ਿਖਾ ਜੈਨ ਵੱਲੋਂ ਚਾਰ ਜ਼ਰੂਰੀ ਭੋਜਨਾਂ ਦੀ ਸਿਫ਼ਾਰਸ਼
ਇਸੇ ਮੱਦੇਨਜ਼ਰ, ਪੋਸ਼ਣ ਮਾਹਿਰ ਦੀਪਸ਼ਿਖਾ ਜੈਨ ਨੇ ਇੱਕ ਵੀਡੀਓ ਰਾਹੀਂ ਔਰਤਾਂ ਦੀ ਸਿਹਤ ਲਈ ਚਾਰ ਖਾਸ ਭੋਜਨਾਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਭੋਜਨ ਨਾ ਸਿਰਫ਼ ਸਰੀਰ ਨੂੰ ਅੰਦਰੋਂ ਤਾਕਤ ਦਿੰਦੇ ਹਨ, ਬਲਕਿ ਹਾਰਮੋਨਲ ਸੰਤੁਲਨ ਅਤੇ ਊਰਜਾ ਦੇ ਪੱਧਰ ਨੂੰ ਵੀ ਕਾਇਮ ਰੱਖਦੇ ਹਨ।
ਕੱਦੂ ਦੇ ਬੀਜ: ਹਾਰਮੋਨਲ ਸੰਤੁਲਨ ਲਈ ਵਰਦਾਨ
ਜੈਨ ਮੁਤਾਬਕ, ਕੱਦੂ ਦੇ ਬੀਜ ‘ਚ ਮੌਜੂਦ ਫਾਈਟੋਐਸਟ੍ਰੋਜਨ ਹਾਰਮੋਨਾਂ ਨੂੰ ਸੰਤੁਲਿਤ ਰੱਖਣ ‘ਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦਾ ਹੈ। ਇਹ ਬੀਜ ਮਾਹਵਾਰੀ ਚੱਕਰ ਨੂੰ ਨਿਯਮਿਤ ਰੱਖਣ, ਮੂਡ ਸਵਿੰਗ ਘਟਾਉਣ ਅਤੇ ਹਾਰਮੋਨਲ ਗੜਬੜੀ ਨਾਲ ਪੀੜਤ ਔਰਤਾਂ ਲਈ ਬਹੁਤ ਲਾਭਦਾਇਕ ਹਨ।
ਸੌਗੀ (ਕਿਸ਼ਮਿਸ਼): ਖੂਨ ਦੀ ਕਮੀ ਤੋਂ ਬਚਾਵ ਦਾ ਆਸਾਨ ਜਰੀਆ
ਭਿੱਜੇ ਹੋਏ ਕਾਲੇ ਕਿਸ਼ਮਿਸ਼ ਆਇਰਨ ਦੇ ਵਧੀਆ ਸਰੋਤ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਰਾਤ ਨੂੰ 7–8 ਕਿਸ਼ਮਿਸ਼ ਭਿਉਂ ਕੇ ਸਵੇਰੇ ਖਾਣ ਨਾਲ ਅਨੀਮੀਆ ਕੰਟਰੋਲ ‘ਚ ਰਹਿੰਦੀ ਹੈ, ਖੂਨ ਦੀ ਗਤੀਵਿਧੀ ਸੁਧਰਦੀ ਹੈ ਅਤੇ ਮਾਹਵਾਰੀ ਦੌਰਾਨ ਆਉਣ ਵਾਲੀ ਕਮਜ਼ੋਰੀ ਘਟਦੀ ਹੈ।
ਡਾਰਕ ਚਾਕਲੇਟ: ਤਣਾਅ ਅਤੇ PMS ਦੌਰਾਨ ਸਰੀਰ ਲਈ ਆਰਾਮ
ਪੀਐਮਐਸ ਦੇ ਦੌਰਾਨ ਆਉਣ ਵਾਲੇ ਮੂਡ ਸਵਿੰਗ ਅਤੇ ਚਿੜਚਿੜੇਪਨ ‘ਤੇ ਡਾਰਕ ਚਾਕਲੇਟ ਪ੍ਰਭਾਵਸ਼ਾਲੀ ਮੰਨੀ ਜਾਂਦੀ ਹੈ। ਇਸ ਵਿੱਚ ਮੈਗਨੀਸ਼ੀਅਮ ਦੀ ਵਧੀਆ ਮਾਤਰਾ ਹੁੰਦੀ ਹੈ, ਜੋ ਸਰੀਰ ਨੂੰ ਆਰਾਮ ਦਿੰਦੀ ਹੈ ਅਤੇ ਮਾਨਸਿਕ ਤੌਰ ‘ਤੇ ਰਿਲੈਕਸ ਕਰਦੀ ਹੈ। ਮਾਹਵਾਰੀ ਤੋਂ ਪਹਿਲਾਂ ਵਧਣ ਵਾਲੀਆਂ ਖਾਣੇ ਦੀਆਂ ਲਾਲਸਾਵਾਂ ਨੂੰ ਵੀ ਇਹ ਸੌਖੇ ਨਾਲ ਕੰਟਰੋਲ ਕਰਦੀ ਹੈ।
ਚੀਆ ਬੀਜ: ਔਰਤਾਂ ਲਈ ਸੁਪਰਫੂਡ
ਚੀਆ ਬੀਜਾਂ ਨੂੰ ਅੱਜਕੱਲ੍ਹ ਸੁਪਰਫੂਡ ਵਜੋਂ ਜਾਣਿਆ ਜਾਂਦਾ ਹੈ। ਓਮੇਗਾ-3 ਫੈਟੀ ਐਸਿਡ, ਫਾਈਬਰ ਅਤੇ ਹੋਰ ਜ਼ਰੂਰੀ ਪੋਸ਼ਕ ਤੱਤਾਂ ਨਾਲ ਭਰਪੂਰ ਇਹ ਬੀਜ ਪਾਚਨ ਪ੍ਰਣਾਲੀ ਨੂੰ ਤਾਕਤ ਦਿੰਦੇ ਹਨ, ਹਾਰਮੋਨਾਂ ਨੂੰ ਬੈਲੈਂਸ ਕਰਦੇ ਹਨ ਅਤੇ ਚਮੜੀ ਦੀ ਸਿਹਤ ਵਿੱਚ ਸੁਧਾਰ ਲਿਆਉਂਦੇ ਹਨ। ਮਾਹਿਰਾਂ ਮੁਤਾਬਕ, ਰੋਜ਼ਾਨਾ ਇੱਕ ਚਮਚ ਚੀਆ ਬੀਜਾਂ ਦਾ ਸੇਵਨ ਸਰੀਰ ਨੂੰ ਕੁਦਰਤੀ ਊਰਜਾ ਅਤੇ ਚਮਕ ਪ੍ਰਦਾਨ ਕਰਦਾ ਹੈ।
