ਚੰਡੀਗੜ੍ਹ :- ਪੰਜਾਬ ਦੇ ਕਈ ਇਲਾਕਿਆਂ ‘ਚ ਪਰਾਲੀ ਸਾੜਨ ਦੇ ਮੌਸਮ ਦੌਰਾਨ ਹਵਾ ਵਿੱਚ ਪ੍ਰਦੂਸ਼ਣ ਖਤਰਨਾਕ ਹੱਦ ਤੱਕ ਵਧ ਗਿਆ ਹੈ। ਇਸ ਬਦਲਦੇ ਮੌਸਮ ਅਤੇ ਤੀਖੇ ਧੂੰਏਂ ਕਾਰਨ ਸਾਹ ਦੀਆਂ ਸਮੱਸਿਆਵਾਂ, ਅੱਖਾਂ ਵਿੱਚ ਖਾਰਸ਼, ਚਮੜੀ ਦੇ ਰੋਗ ਅਤੇ ਦਮਾ ਦੇ ਮਰੀਜ਼ਾਂ ਲਈ ਖਾਸ ਤੌਰ ‘ਤੇ ਮੁਸ਼ਕਲਾਂ ਵੱਧ ਰਹੀਆਂ ਹਨ। ਇਸ ਗੰਭੀਰ ਸਥਿਤੀ ਨੂੰ ਦੇਖਦੇ ਹੋਏ ਸਿਵਲ ਸਰਜਨ ਡਾ. ਰੋਹਿਤ ਗੋਇਲ ਅਤੇ ਡਿਸਟ੍ਰਿਕਟ ਟੀ.ਬੀ. ਆਫ਼ੀਸਰ ਡਾ. ਨੀਲੂ ਚੁੱਘ ਵੱਲੋਂ ਲੋਕਾਂ ਲਈ ਤਾਜ਼ਾ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ।
ਧੂੰਏਂ ਵਾਲੇ ਦਿਨਾਂ ‘ਚ ਘਰੋਂ ਘੱਟ ਨਿਕਲੋ, ਮਾਸਕ ਲਾਜ਼ਮੀ ਪਹਿਣੋ
ਅਧਿਕਾਰੀਆਂ ਨੇ ਸਲਾਹ ਦਿੱਤੀ ਹੈ ਕਿ ਜਿੱਥੇ ਤਕ ਸੰਭਵ ਹੋਵੇ, ਲੋਕ ਘਰ ਅੰਦਰ ਹੀ ਰਹਿਣ। ਜੇ ਬਾਹਰ ਜਾਣਾ ਪਵੇ ਤਾਂ ਮਾਸਕ ਲਾਜ਼ਮੀ ਪਹਿਣਿਆ ਜਾਵੇ ਤਾਂ ਜੋ ਬਾਰੀਕ ਪ੍ਰਦੂਸ਼ਕ ਕਣ ਸਰੀਰ ਵਿੱਚ ਨਾ ਜਾ ਸਕਣ। ਅੱਖਾਂ ਵਿੱਚ ਜਲਣ ਜਾਂ ਸੁੱਕੇਪਣ ਦੀ ਸਥਿਤੀ ਵਿੱਚ ਠੰਢੇ ਸਾਫ਼ ਪਾਣੀ ਨਾਲ ਧੋਣ ਦੀ ਸਲਾਹ ਦਿੱਤੀ ਗਈ।
ਬੱਚੇ, ਬਜ਼ੁਰਗ ਤੇ ਦਮਾ ਦੇ ਮਰੀਜ਼ ਵਧੇਰੇ ਖ਼ਤਰੇ ‘ਚ
ਸਿਹਤ ਵਿਭਾਗ ਨੇ ਖਾਸ ਤੌਰ ‘ਤੇ ਦਮਾ, ਦਿਲ ਅਤੇ ਫੇਫੜਿਆਂ ਦੇ ਮਰੀਜ਼ਾਂ ਲਈ ਚੇਤਾਵਨੀ ਜਾਰੀ ਕੀਤੀ ਹੈ। ਮਰੀਜ਼ਾਂ ਨੂੰ ਆਪਣੀਆਂ ਦਵਾਈਆਂ ਜਾਂ ਇਨਹੇਲਰ ਹਮੇਸ਼ਾਂ ਨਾਲ ਰੱਖਣ, ਦਵਾਈਆਂ ਵਿੱਚ ਆਪਣੇ ਆਪ ਕੋਈ ਤਬਦੀਲੀ ਨਾ ਕਰਨ ਅਤੇ ਲੱਛਣ ਵਧਣ ‘ਤੇ ਤੁਰੰਤ ਸਿਹਤ ਕੇਂਦਰ ਨਾਲ ਸੰਪਰਕ ਕਰਨ ਦੀ ਅਪੀਲ ਹੈ।
ਮਾਪਿਆਂ ਨੂੰ ਬੱਚਿਆਂ ਨੂੰ ਬਾਹਰ ਖੇਡਣ ਤੋਂ ਰੋਕਣ ਅਤੇ ਬਜ਼ੁਰਗਾਂ ਤੇ ਗਰਭਵਤੀ ਮਹਿਲਾਵਾਂ ਨੂੰ ਵਧੇਰੇ ਸਾਵਧਾਨੀਆਂ ਬਰਤਣ ਦੀ ਸਲਾਹ ਦਿੱਤੀ ਗਈ ਹੈ, ਕਿਉਂਕਿ ਧੂੰਏਂ ਦਾ ਪ੍ਰਭਾਵ ਉਨ੍ਹਾਂ ‘ਤੇ ਤੇਜ਼ੀ ਨਾਲ ਪੈਂਦਾ ਹੈ।
