ਚੰਡੀਗੜ੍ਹ :- ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਆਪਣੀ 10 ਦਿਨਾਂ ਦੀ ਨਿਵੇਸ਼ ਪਰਚਾਰ ਯਾਤਰਾ ਲਈ ਜਾਪਾਨ ਪਹੁੰਚ ਗਏ ਹਨ। ਟੋਕੀਓ ਏਅਰਪੋਰਟ ‘ਤੇ ਭਾਰਤੀ ਰਾਜਦੂਤ ਮੈਗਮ ਐੱਮ ਮਲਿਕ ਨੇ ਮੁੱਖ ਮੰਤਰੀ ਦਾ ਅਧਿਕਾਰਕ ਸਵਾਗਤ ਕੀਤਾ। ਦੌਰੇ ਦੀ ਸ਼ੁਰੂਆਤ ਮੁੱਖ ਮੰਤਰੀ ਨੇ ਗਾਂਧੀ ਪਾਰਕ ਪਹੁੰਚ ਕੇ ਮਹਾਤਮਾ ਗਾਂਧੀ ਦੇ ਸਮਾਰਕ ‘ਤੇ ਫੁੱਲ ਚੜ੍ਹਾ ਕੇ ਕੀਤੀ।ਇਸ ਮੌਕੇ ਉਨ੍ਹਾਂ ਦੇ ਨਾਲ ਮੁੱਖ ਸਕੱਤਰ ਸਮੇਤ ਕਈ ਸੀਨੀਅਰ ਅਧਿਕਾਰੀ ਵੀ ਮੌਜੂਦ ਰਹੇ।
ਜਾਪਾਨੀ ਨਿਵੇਸ਼ਕਾਰਾਂ ਨਾਲ ਉੱਚ ਪੱਧਰੀ ਗੱਲਬਾਤਾਂ ਦਾ ਆਰੰਭ
ਦੌਰੇ ਦੇ ਪਹਿਲੇ ਦਿਨ ਹੀ ਮੁੱਖ ਮੰਤਰੀ ਮਾਨ ਵੱਖ-ਵੱਖ ਜਾਪਾਨੀ ਉਦਯੋਗਕ ਸੰਸਥਾਵਾਂ ਨਾਲ ਮੁਲਾਕਾਤਾਂ ਸ਼ੁਰੂ ਕਰਨਗੇ। ਸਭ ਤੋਂ ਪਹਿਲਾਂ ਉਹ ਜਾਪਾਨ ਬੈਂਕ ਫਾਰ ਇੰਟਰਨੈਸ਼ਨਲ ਕੋਆਪਰੇਸ਼ਨ (JBIC) ਦੇ ਅਧਿਕਾਰੀਆਂ ਨਾਲ ਰਲ ਕੇ ਪੰਜਾਬ ਵਿੱਚ ਨਵੇਂ ਉਦਯੋਗਿਕ ਨਿਵੇਸ਼ ਅਤੇ ਸਾਂਝੇ ਪ੍ਰੋਜੈਕਟਾਂ ਬਾਰੇ ਚਰਚਾ ਕਰਨਗੇ।
ਪੰਜਾਬ ਲਈ ਵੱਡੇ ਉਦਯੋਗ ਘਰਾਂ ਨਾਲ ਲਗਾਤਾਰ ਮੀਟਿੰਗਾਂ
ਮੁੱਖ ਮੰਤਰੀ ਦੇ ਸ਼ਡਿਊਲ ਵਿੱਚ ਜਾਪਾਨ ਦੀਆਂ ਕਈ ਚੋਟੀ ਦੀਆਂ ਕੰਪਨੀਆਂ ਨਾਲ ਵਿਸ਼ੇਸ਼ ਮੀਟਿੰਗਾਂ ਸ਼ਾਮਲ ਹਨ—
-
ਆਈਸਾਨ ਇੰਡਸਟਰੀ
-
ਯਾਮਾਹਾ ਮੋਟਰ
-
ਹੌਂਡਾ ਮੋਟਰ
ਇਨ੍ਹਾਂ ਕੰਪਨੀਆਂ ਨਾਲ ਪੰਜਾਬ ਵਿੱਚ ਰੋਜ਼ਗਾਰ, ਨਵੀਆਂ ਫੈਕਟਰੀਆਂ ਅਤੇ ਤਕਨੀਕੀ ਸਹਿਯੋਗ ਸੰਬੰਧੀ ਵਿਚਾਰ-ਵਟਾਂਦੇ ਹੋਣਗੇ।
ਬੁਨਿਆਦੀ ਢਾਂਚੇ ਦੇ ਵੱਡੇ ਪ੍ਰੋਜੈਕਟਾਂ ‘ਤੇ JICA ਨਾਲ ਗੱਲਬਾਤ
ਦੌਰੇ ਦੌਰਾਨ ਮੁੱਖ ਮੰਤਰੀ JICA ਸਾਊਥ ਏਸ਼ੀਆ ਡਿਵੀਜ਼ਨ ਦੇ ਡਾਇਰੈਕਟਰ ਜਨਰਲ ਨਾਲ ਵੀ ਇੱਕ ਮਹੱਤਵਪੂਰਨ ਬੈਠਕ ਕਰਨਗੇ, ਜਿਸ ਵਿੱਚ ਪੰਜਾਬ ਦੇ ਬੁਨਿਆਦੀ ਢਾਂਚੇ—ਸੜਕਾਂ, ਪਾਣੀ ਪ੍ਰਬੰਧਨ, ਟ੍ਰਾਂਸਪੋਰਟ ਅਤੇ ਆਈਟੀ ਸਿਸਟਮ ਨਾਲ ਜੁੜੇ ਨਵੇਂ ਪ੍ਰੋਜੈਕਟ ਤੇ ਕੇਂਦਰਿਤ ਚਰਚਾ ਹੋਵੇਗੀ।
ਜਾਪਾਨ ਸਰਕਾਰ ਅਤੇ ਬਹੁ-ਰਾਸ਼ਟਰੀ ਕੰਪਨੀਆਂ ਨਾਲ ਵੀ ਮੁੱਖ ਮੁਲਾਕਾਤਾਂ
ਮੁੱਖ ਮੰਤਰੀ ਮਾਨ ਜਾਪਾਨ ਸਰਕਾਰ ਦੇ ਉਪ ਉਦਯੋਗ ਮੰਤਰੀ ਕੋਮੋਰੀ ਤਾਕੂਓ ਨਾਲ ਵੀ ਮੀਟਿੰਗ ਕਰਨਗੇ। ਇਸ ਤੋਂ ਇਲਾਵਾ, ਫੁਜਿਤਸੂ ਲਿਮਟਿਡ ਦੇ ਪ੍ਰਧਾਨ ਅਧਿਕਾਰੀਆਂ ਨਾਲ ਡਿਜ਼ਿਟਲ ਪੰਜਾਬ ਅਤੇ ਨਵੀਂ ਤਕਨਾਲੋਜੀ ਲਾਗੂ ਕਰਨ ਲਈ ਚਰਚਾ ਕੀਤੀ ਜਾਵੇਗੀ।
ਮਾਰਚ ‘ਚ ਮੋਹਾਲੀ ਵਿੱਚ ਵੱਡਾ ਨਿਵੇਸ਼ ਸੰਮੇਲਨ
ਸਰਕਾਰ ਨੇ ਘੋਸ਼ਣਾ ਕੀਤੀ ਹੈ ਕਿ ਦੌਰੇ ਦੇ ਨਤੀਜਿਆਂ ਨੂੰ ਅੱਗੇ ਵਧਾਉਂਦੇ ਹੋਏ ਮਾਰਚ ਵਿੱਚ ਮੋਹਾਲੀ ਵਿੱਚ ਇੱਕ ਵੱਡਾ ਪ੍ਰਗਤੀਸ਼ੀਲ ਨਿਵੇਸ਼ ਸੰਮੇਲਨ ਕਰਵਾਇਆ ਜਾਵੇਗਾ, ਜਿਸ ਵਿੱਚ ਜਾਪਾਨ ਸਮੇਤ ਦੁਨੀਆ ਭਰ ਤੋਂ ਉਦਯੋਗਾਂ ਨੂੰ ਸੱਦਾ ਦਿੱਤਾ ਜਾਵੇਗਾ।
