ਨਵੀਂ ਦਿੱਲੀ :- ਦੇਸ਼ ਦੀ ਰਾਜਧਾਨੀ ਦਿੱਲੀ ਇੱਕ ਵਾਰ ਫਿਰ ਭਿਆਨਕ ਸਮੌਗ ਦੀ ਲਪੇਟ ਵਿੱਚ ਆ ਗਈ ਹੈ। ਸੋਮਵਾਰ ਸਵੇਰ ਤੋਂ ਹੀ ਸ਼ਹਿਰ ਭਰ ਵਿੱਚ ਸੰਘਣੀ ਧੂੰਦ ਅਤੇ ਪ੍ਰਦੂਸ਼ਣ ਕਾਰਨ ਆਮ ਜੀਵਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ। ਹਵਾ ਦੀ ਗੁਣਵੱਤਾ ‘ਸੀਵਿਅਰ’ ਸ਼੍ਰੇਣੀ ‘ਚ ਪਹੁੰਚਣ ਨਾਲ ਲੋਕਾਂ ਦੀ ਸਿਹਤ ਨੂੰ ਲੈ ਕੇ ਚਿੰਤਾ ਹੋਰ ਵਧ ਗਈ ਹੈ।
AQI 400 ਤੋਂ ਪਾਰ, ਕਈ ਇਲਾਕੇ ਸਭ ਤੋਂ ਪ੍ਰਭਾਵਿਤ
ਸਵੇਰੇ 7 ਵਜੇ ਦਿੱਲੀ ਦਾ ਔਸਤ ਏਅਰ ਕੁਆਲਟੀ ਇੰਡੈਕਸ 402 ਦਰਜ ਕੀਤਾ ਗਿਆ। ਪ੍ਰਦੂਸ਼ਣ ਮਾਪਣ ਵਾਲੇ 40 ਸਟੇਸ਼ਨਾਂ ਵਿੱਚੋਂ 25 ਥਾਵਾਂ ‘ਤੇ ਹਵਾ ‘ਸੀਵਿਅਰ’ ਦਰਜੇ ‘ਚ ਰਹੀ। ਵਿਵੇਕ ਵਿਹਾਰ ‘ਚ AQI 458 ਅਤੇ ਵਜ਼ੀਰਪੁਰ ‘ਚ 443 ਦਰਜ ਹੋਇਆ, ਜਿੱਥੇ PM2.5 ਕਣ ਮੁੱਖ ਕਾਰਨ ਬਣੇ।
ਸੜਕਾਂ ‘ਤੇ ਹਨੇਰਾ, ਵਾਹਨਾਂ ਦੀ ਰਫ਼ਤਾਰ ਥਮੀ
ਸੰਘਣੀ ਸਮੌਗ ਕਾਰਨ ਦ੍ਰਿਸ਼ਟੀ ਬਹੁਤ ਘੱਟ ਰਹੀ। ਸੂਰਜ ਚੜ੍ਹਨ ਤੋਂ ਬਾਅਦ ਵੀ ਵਾਹਨ ਚਾਲਕਾਂ ਨੂੰ ਹੈੱਡਲਾਈਟਾਂ ਜਲਾਉਣੀਆਂ ਪਈਆਂ। ਕਰਤਵਿਆ ਪਥ ਅਤੇ ਦੁਆਰਕਾ ਸਮੇਤ ਕਈ ਇਲਾਕਿਆਂ ਵਿੱਚ ਟ੍ਰੈਫਿਕ ਰੇੰਗਦਾ ਦਿੱਸਿਆ।
ਮੌਸਮ ਵਿਭਾਗ ਵੱਲੋਂ ‘ਰੇਡ ਅਲਰਟ’ ਜਾਰੀ
ਮੌਸਮ ਵਿਭਾਗ ਨੇ ਦਿੱਲੀ ਦੇ ਜ਼ਿਆਦਾਤਰ ਹਿੱਸਿਆਂ ਲਈ ਬਹੁਤ ਸੰਘਣੀ ਧੂੰਦ ਨੂੰ ਲੈ ਕੇ ਲਾਲ ਚੇਤਾਵਨੀ ਜਾਰੀ ਕੀਤੀ ਹੈ। ਲੋਕਾਂ ਨੂੰ ਬਿਨਾਂ ਲੋੜ ਯਾਤਰਾ ਤੋਂ ਬਚਣ, ਡਰਾਈਵਿੰਗ ਦੌਰਾਨ ਫੌਗ ਲਾਈਟ ਵਰਤਣ ਅਤੇ ਮੂੰਹ ਢੱਕ ਕੇ ਰੱਖਣ ਦੀ ਸਲਾਹ ਦਿੱਤੀ ਗਈ ਹੈ।
ਹਵਾਈ ਸੇਵਾਵਾਂ ਸਭ ਤੋਂ ਵੱਧ ਪ੍ਰਭਾਵਿਤ
ਇੰਦਿਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਦ੍ਰਿਸ਼ਟੀ ਲਗਭਗ 125 ਮੀਟਰ ਤੱਕ ਸਿਮਟ ਗਈ, ਜਿਸ ਕਾਰਨ CAT-III ਪ੍ਰਕਿਰਿਆ ਅਧੀਨ ਉਡਾਣਾਂ ਚਲਾਈਆਂ ਗਈਆਂ। ਸਵੇਰ ਤੱਕ 128 ਦੇ ਕਰੀਬ ਉਡਾਣਾਂ ਰੱਦ ਹੋਣ ਦੀ ਪੁਸ਼ਟੀ ਹੋਈ। ਕਈ ਏਅਰਲਾਈਨਾਂ ਨੇ ਯਾਤਰੀਆਂ ਲਈ ਚੇਤਾਵਨੀਆਂ ਜਾਰੀ ਕੀਤੀਆਂ।
ਰੇਲ ਗੱਡੀਆਂ ਵੀ ਲੇਟ, ਯਾਤਰੀ ਪਰੇਸ਼ਾਨ
ਧੂੰਦ ਦਾ ਅਸਰ ਰੇਲ ਆਵਾਜਾਈ ‘ਤੇ ਵੀ ਪਿਆ। ਦਿੱਲੀ ਨਾਲ ਜੁੜੀਆਂ ਕਈ ਲਾਈਨਾਂ ‘ਤੇ ਦ੍ਰਿਸ਼ਟੀ ਘੱਟ ਹੋਣ ਕਾਰਨ 100 ਤੋਂ ਵੱਧ ਟ੍ਰੇਨਾਂ ਦੇਰੀ ਨਾਲ ਚੱਲਦੀਆਂ ਰਹੀਆਂ।
ਦਿੱਲੀ ਤੋਂ ਬਾਹਰ ਵੀ ਪ੍ਰਦੂਸ਼ਣ ਦਾ ਅਸਰ
ਸਮੌਗ ਦਾ ਦ੍ਰਿਸ਼ ਸਿਰਫ਼ ਦਿੱਲੀ ਤੱਕ ਸੀਮਿਤ ਨਹੀਂ ਰਿਹਾ। ਆਗਰਾ ‘ਚ ਤਾਜ ਮਹਲ ਧੂੰਏਂ ਵਿੱਚ ਓਹਲੇ ਹੋਇਆ ਦਿੱਸਿਆ, ਜਦਕਿ ਮੁੰਬਈ ਦੇ ਈਸਟਰਨ ਫ੍ਰੀਵੇ ਅਤੇ ਅਸਾਮ ਦੇ ਕਈ ਇਲਾਕਿਆਂ ‘ਚ ਵੀ ਪ੍ਰਦੂਸ਼ਣ ਦੇ ਦ੍ਰਿਸ਼ ਸਾਹਮਣੇ ਆਏ।
ਸਿਹਤ ਮਾਹਿਰਾਂ ਦੀ ਸਖ਼ਤ ਚੇਤਾਵਨੀ
ਮਾਹਿਰਾਂ ਨੇ ਬੱਚਿਆਂ, ਬੁਜ਼ੁਰਗਾਂ ਅਤੇ ਸਾਸ ਸੰਬੰਧੀ ਬਿਮਾਰੀਆਂ ਵਾਲੇ ਲੋਕਾਂ ਨੂੰ ਘਰਾਂ ‘ਚ ਰਹਿਣ ਦੀ ਸਲਾਹ ਦਿੱਤੀ ਹੈ। ਮੌਸਮ ਸਾਫ਼ ਹੋਣ ਤੱਕ ਬਾਹਰਲੀ ਗਤੀਵਿਧੀਆਂ ਘੱਟ ਰੱਖਣ ਦੀ ਅਪੀਲ ਕੀਤੀ ਗਈ ਹੈ।
