ਨਵੀਂ ਦਿੱਲੀ :- ਦੀਵਾਲੀ ਵਾਲੀ ਰਾਤ ਤੋਂ ਬਾਅਦ ਦਿੱਲੀ ਦੀ ਹਵਾ ਇਕ ਵਾਰ ਫਿਰ ਜ਼ਹਿਰੀਲੀ ਹੋ ਗਈ ਹੈ। ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ (CPCB) ਦੇ ਅੰਕੜਿਆਂ ਅਨੁਸਾਰ, ਇਸ ਸਾਲ ਦਿੱਲੀ ਵਿੱਚ PM2.5 ਦੀ ਮਾਤਰਾ ਪਿਛਲੇ ਪੰਜ ਸਾਲਾਂ ਦੇ ਤੁਲਨਾਤਮਕ ਆਂਕੜਿਆਂ ਨਾਲੋਂ ਸਭ ਤੋਂ ਵੱਧ ਦਰਜ ਕੀਤੀ ਗਈ ਹੈ। ਤਿਉਹਾਰ ਤੋਂ ਪਹਿਲਾਂ 156.6 ਮਾਈਕ੍ਰੋਗ੍ਰਾਮ ਰਹਿ ਰਹੀ ਮਾਤਰਾ ਸੋਮਵਾਰ-ਰਾਤ ਤੋਂ ਮੰਗਲਵਾਰ ਸਵੇਰੇ 488 ਮਾਈਕ੍ਰੋਗ੍ਰਾਮ ਪ੍ਰਤੀ ਘਣ ਮੀਟਰ ਤੱਕ ਪਹੁੰਚ ਗਈ।
ਪਿਛਲਿਆਂ ਸਾਲਾਂ ਨਾਲੋਂ ਰਿਕਾਰਡ ਵੱਧ ਪ੍ਰਦੂਸ਼ਣ
CPCB ਦੇ ਪੁਰਾਣੇ ਡਾਟੇ ਮੁਤਾਬਕ ਦਿੱਲੀ ਵਿੱਚ ਦੀਵਾਲੀ ਤੋਂ ਬਾਅਦ PM2.5 ਦੀ ਗਿਣਤੀ 2021 ਵਿੱਚ 454.5 ਦਰਜ ਕੀਤੀ ਗਈ ਸੀ। 2022 ਵਿੱਚ ਇਹ ਘਟ ਕੇ 168 ਰਹਿ ਗਈ ਸੀ, ਜਦਕਿ 2023 ਵਿੱਚ 319.7 ਅਤੇ 2024 ਵਿੱਚ 220 ਮਾਈਕ੍ਰੋਗ੍ਰਾਮ ਦਰਜ ਕੀਤੀ ਗਈ। ਇਸ ਸਾਲ ਦਾ ਅੰਕੜਾ ਸਭ ਤੋਂ ਗੰਭੀਰ ਹੈ।
ਅੰਨ੍ਹੇਮੁੰਨੇ ਢੰਗ ਨਾਲ ਪਟਾਕੇ ਚੱਲੇ, ਨਿਯਮਾਂ ਦੀ ਉਲੰਘਣਾ
ਸੁਪਰੀਮ ਕੋਰਟ ਵੱਲੋਂ ਨਿਸ਼ਚਤ ਕੀਤੇ ਸਮੇਂ ਅਤੇ ਸੀਮਾਵਾਂ ਦੇ ਬਾਵਜੂਦ ਦਿੱਲੀ-NCR ਵਿੱਚ ਰਾਤ ਭਰ ਆਤਿਸ਼ਬਾਜ਼ੀ ਚਲਦੀ ਰਹੀ। ਹਰੇ ਪਟਾਕਿਆਂ ਲਈ ਸਿਰਫ਼ 18 ਤੋਂ 21 ਅਕਤੂਬਰ ਤੱਕ ਤਿੰਨ ਘੰਟਿਆਂ ਦੀ ਛੂਟ ਸੀ, ਪਰ ਬੇਰੋਕ-ਟੋਕ ਪਟਾਕੇ ਫੋੜਨ ਨਾਲ ਸਵੇਰੇ ਤੱਕ ਹਵਾ ਭਾਰੀ ਧੂੰਏ ਨਾਲ ਢੱਕੀ ਰਹੀ। ਇਸ ਦੌਰਾਨ ਦਵਾਰਕਾ ਵਿੱਚ AQI 417, ਵਜ਼ੀਰਪੁਰ 423, ਅਸ਼ੋਕ ਵਿਹਾਰ ਅਤੇ ਆਨੰਦ ਵਿਹਾਰ 404 ਰਿਕਾਰਡ ਕੀਤਾ ਗਿਆ।
ਪ੍ਰਦੂਸ਼ਣ ਦੇ ਮਸਲੇ ‘ਤੇ ਰਾਜਨੀਤਿਕ ਸ਼ਿਕੇਬਾਜ਼ੀ
ਦਿੱਲੀ ਦੀ ਭਾਜਪਾ ਸਰਕਾਰ ਵਿੱਚ ਵਾਤਾਵਰਣ ਮੰਤਰੀ ਮਨਜਿੰਦਰ ਸਿੰਘ ਸਿਰਸਾ ਨੇ ਹੋਏ ਹਾਲਾਤਾਂ ਲਈ ਪੰਜਾਬ ਸਰਕਾਰ ਨੂੰ ਜ਼ਿੰਮੇਵਾਰ ਠਹਿਰਾਇਆ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਪੰਜਾਬ ਵਿੱਚ ਵੱਡੇ ਪੱਧਰ ‘ਤੇ ਪਰਾਲੀ ਸਾੜੀ ਜਾ ਰਹੀ ਹੈ, ਜਿਸ ਕਰਕੇ ਦਿੱਲੀ ਦੀ ਹਵਾ ਵਿਗੜ ਰਹੀ ਹੈ। ਉਨ੍ਹਾਂ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਇਸ ਸਬੰਧੀ ਵੀਡੀਓ ਵੀ ਦਿਖਾਈ।
ਸੁਪਰੀਮ ਕੋਰਟ ਦੇ ਹੁਕਮਾਂ ਤੋਂ ਉਲਟ ਨਜਾਰਾ
ਗ੍ਰੀਨ ਪਟਾਕਿਆਂ ਲਈ ਸਵੇਰੇ 6 ਤੋਂ 7 ਵਜੇ ਅਤੇ ਰਾਤ 8 ਤੋਂ 10 ਵਜੇ ਤੱਕ ਹੀ ਮਨਜ਼ੂਰੀ ਹੋਣ ਦੇ ਬਾਵਜੂਦ, ਸ਼ਹਿਰ ਵਿੱਚ ਲੋਕਾਂ ਨੇ ਸਵੇਰੇ ਤੱਕ ਪਟਾਕੇ ਚਲਾਏ। ਇਸ ਕਾਰਨ ਰਾਤ ਤੱਕ ਇਕੱਠਾ ਹੋਇਆ ਧੂੰਆ ਮੰਗਲਵਾਰ ਸਵੇਰੇ ਤੱਕ ਵਾਤਾਵਰਣ ਵਿੱਚ ਘੁੱਲਿਆ ਰਿਹਾ ਅਤੇ ਹਵਾ ਦੀ ਗੁਣਵੱਤਾ ‘ਰੈੱਡ ਜ਼ੋਨ’ ਵਿੱਚ ਪਹੁੰਚ ਗਈ।
