ਨਵੀਂ ਦਿੱਲੀ :- 20 ਅਗਸਤ ਦੀ ਸਵੇਰੇ ਲਗਭਗ 8:15 ਵਜੇ ਜਨ ਸੁਣਵਾਈ ਦੌਰਾਨ ਰੇਖਾ ਗੁਪਤਾ ‘ਤੇ ਇਕ ਸ਼ਖਸ ਵੱਲੋਂ ਹਮਲਾ ਕੀਤਾ ਗਿਆ। ਹਮਲਾਵਰ ਦੀ ਪਛਾਣ ਰਾਜੇਸ਼ਭਾਈ ਖੀਮਜੀ ਵਜੋਂ ਹੋਈ ਹੈ, ਜੋ ਗੁਜਰਾਤ ਦੇ ਰਾਜਕੋਟ ਦਾ ਰਹਿਣ ਵਾਲਾ ਹੈ। ਹਮਲੇ ਦੌਰਾਨ ਉਹ ਸ਼ਿਕਾਇਤਕਰਤਾ ਬਣ ਕੇ ਪਹੁੰਚਿਆ ਅਤੇ ਕਾਗਜ਼ ਦਿੰਦੇ ਸਮੇਂ ਉਸ ਨੇ ਸੀਐੱਮ ‘ਤੇ ਹਮਲਾ ਕਰ ਦਿੱਤਾ।
ਹਮਲੇ ਵਿਚ ਲੱਗੀਆਂ ਸੱਟਾਂ, ਮੁਲਜ਼ਮ ਰਿਮਾਂਡ ‘ਤੇ
ਹਮਲੇ ਵਿੱਚ ਮੁੱਖ ਮੰਤਰੀ ਰੇਖਾ ਗੁਪਤਾ ਦੇ ਹੱਥ, ਮੋਢੇ ਅਤੇ ਸਿਰ ‘ਤੇ ਸੱਟਾਂ ਆਈਆਂ। ਹਾਲਾਂਕਿ ਉਹ ਹੁਣ ਘਰੋਂ ਹੀ ਸਰਕਾਰੀ ਕੰਮ ਸੰਭਾਲ ਰਹੀ ਹੈ। ਹਮਲੇ ਤੋਂ ਤੁਰੰਤ ਬਾਅਦ ਮੁਲਜ਼ਮ ਨੂੰ ਗ੍ਰਿਫਤਾਰ ਕਰਕੇ ਦੱਖਣ-ਪੱਛਮੀ ਦਿੱਲੀ ਦੇ ਦਵਾਰਕਾ ਵਿਚ ਮੈਜਿਸਟ੍ਰੇਟ ਦੇ ਸਾਹਮਣੇ ਪੇਸ਼ ਕੀਤਾ ਗਿਆ, ਜਿਸ ਤੋਂ ਬਾਅਦ ਉਸ ਨੂੰ ਪੰਜ ਦਿਨ ਦੀ ਪੁਲਿਸ ਰਿਮਾਂਡ ‘ਤੇ ਭੇਜ ਦਿੱਤਾ ਗਿਆ। ਰਾਜੇਸ਼ ‘ਤੇ ਕਤਲ ਦੇ ਯਤਨ ਦਾ ਮਾਮਲਾ ਦਰਜ ਹੈ।
ਮੁਲਜ਼ਮ ‘ਤੇ ਪਹਿਲਾਂ ਤੋਂ ਪੰਜ ਕੇਸ ਦਰਜ
ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਰਾਜੇਸ਼ਭਾਈ ਖੀਮਜੀ ‘ਤੇ ਗੁਜਰਾਤ ਵਿੱਚ ਵੀ ਚਾਕੂਬਾਜ਼ੀ ਸਮੇਤ ਪੰਜ ਫੌਜਦਾਰੀ ਕੇਸ ਦਰਜ ਹਨ। ਹਾਲਾਂਕਿ ਗ੍ਰਿਫਤਾਰੀ ਦੌਰਾਨ ਉਸ ਕੋਲੋਂ ਕੋਈ ਹਥਿਆਰ ਨਹੀਂ ਮਿਲਿਆ। ਇੰਟੈਲੀਜੈਂਸ ਬਿਊਰੋ ਅਤੇ ਦਿੱਲੀ ਪੁਲਿਸ ਸਪੈਸ਼ਲ ਸੈਲ ਉਸ ਤੋਂ ਪੁੱਛਗਿਛ ਕਰ ਰਹੀ ਹੈ।
