ਚੰਡੀਗੜ੍ਹ :- ਨਗਰ ਨਿਗਮ ਦੀ ਮੀਟਿੰਗ ਅੱਜ ਤਖ਼ਤੀ ’ਤੇ ਲਿਖੇ ਜਾਣ ਵਾਲੇ ਨਾਮਾਂ ਨੂੰ ਲੈ ਕੇ ਐਸੀ ਬਹਿਸ ਵਿੱਚ ਬਦਲ ਗਈ ਜੋ ਤੂੰ-ਤੂੰ ਮੈਂ-ਮੈਂ ਤੋਂ ਹੁੰਦੀ ਹੋਈ ਹੱਥੋਪਾਈ ਤੱਕ ਪਹੁੰਚ ਗਈ। ਭਾਜਪਾ ਕੌਂਸਲਰ ਸੌਰਭ ਜੋਸ਼ੀ ਅਤੇ ਕਾਂਗਰਸ ਕੌਂਸਲਰ ਸਚਿਨ ਗਾਲਿਬ ਵਿਚਕਾਰ ਤਕਰਾਰ ਇਸ ਹੱਦ ਤੱਕ ਵਧ ਗਈ ਕਿ ਦੋਵੇਂ ਆਪਣੀਆਂ ਕੁਰਸੀਆਂ ਛੱਡ ਕੇ ਇੱਕ-ਦੂਜੇ ਨਾਲ ਝੜਪ ਵਿੱਚ ਉਤਰ ਆਏ। ਮਾਮਲਾ ਗੰਭੀਰ ਹੁੰਦਾ ਦੇਖ ਹੋਰ ਕੌਂਸਲਰਾਂ ਨੇ ਵਿਚਕਾਰ ਆ ਕੇ ਹਾਲਾਤ ਕਾਬੂ ਕੀਤੇ।
ਨੀਂਹ ਪੱਥਰ ’ਤੇ ਨਾਮ ਨਾ ਲਿਖਣ ਦਾ ਮੁੱਦਾ ਬਣਿਆ ਵਿਵਾਦ ਦਾ ਕਾਰਨ
ਵਿਵਾਦ ਦੀ ਸ਼ੁਰੂਆਤ ਭਾਜਪਾ ਕੌਂਸਲਰ ਗੁਰਬਖਸ਼ ਰਾਵਤ ਨੇ ਕੀਤੀ। ਉਨ੍ਹਾਂ ਕਿਹਾ ਕਿ ਨੀਂਹ ਪੱਥਰ ਦੀ ਤਖ਼ਤੀ ’ਤੇ ਕੌਂਸਲਰਾਂ, ਮੇਅਰ ਅਤੇ ਡਿਪਟੀ ਮੇਅਰ ਦੇ ਨਾਮ ਨਹੀਂ ਲਿਖੇ ਜਾ ਰਹੇ। ਇਸਦੇ ਨਾਲ ਉਨ੍ਹਾਂ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੇ ਵਾਰਡ ਵਿੱਚ ਲਗੇ ਖੰਭੇ ’ਤੇ ਵੀ ਉਨ੍ਹਾਂ ਦਾ ਨਾਮ ਸ਼ਾਮਲ ਨਹੀਂ ਸੀ ਤੇ ਅਜਿਹੇ ਸਮਾਗਮਾਂ ਵਿੱਚ ਕੌਂਸਲਰਾਂ ਨੂੰ ਸੱਦਾ ਤੱਕ ਨਹੀਂ ਦਿੱਤਾ ਜਾ ਰਿਹਾ।
ਮੁੱਦਾ 1984 ਦੇ ਦੰਗਿਆਂ ਤੱਕ ਖਿੱਚਿਆ ਗਿਆ — ਜੋਸ਼ੀ ਨੇ ਚੁੱਕੀ ਤਿਵਾੜੀ ਦੀ ਨਾਮਪਲੇਟ
ਚਰਚਾ ਦੌਰਾਨ ਮਾਮਲਾ ਸਿਰਫ਼ ਤਖ਼ਤੀ ਤੱਕ ਹੀ ਸੀਮਤ ਨਹੀਂ ਰਿਹਾ, ਬਲਕਿ ਨਿੱਜੀ ਦੋਸ਼ਾਂ ਤੋਂ ਹੁੰਦਾ ਹੋਇਆ 1984 ਦੇ ਸਿੱਖ ਦੰਗਿਆਂ ਤੱਕ ਪਹੁੰਚ ਗਿਆ। ਭਾਜਪਾ ਕੌਂਸਲਰ ਸੌਰਭ ਜੋਸ਼ੀ ਨੇ ਇਸ ਦੌਰਾਨ ਕਾਂਗਰਸ ਸੰਸਦ ਮੈਂਬਰ ਮਨੀਸ਼ ਤਿਵਾੜੀ ਦੀ ਨਾਮਪਲੇਟ ਚੁੱਕ ਕੇ ਪੁੱਛਿਆ, “ਇਹ ਕਿੱਥੇ ਰਹਿੰਦੇ ਹਨ? ਇਹ ਤਾਂ ਸ਼ਨੀਵਾਰ-ਐਤਵਾਰ ਵਾਲੇ ਸੰਸਦ ਮੈਂਬਰ ਹਨ।” ਇਹ ਟਿੱਪਣੀ ਸੁਣਦੇ ਹੀ ਕਾਂਗਰਸ ਕੌਂਸਲਰ ਸਚਿਨ ਗਾਲਿਬ ਗੁੱਸੇ ਵਿੱਚ ਆ ਗਏ ਅਤੇ ਮਾਮਲਾ ਸਰੀਰਕ ਝਗੜੇ ਤੱਕ ਪਹੁੰਚ ਗਿਆ।
ਸੀਨੀਅਰ ਡਿਪਟੀ ਮੇਅਰ ਅਤੇ ਹੋਰ ਕੌਂਸਲਰਾਂ ਨੇ ਵੀ ਉਠਾਏ ਸਵਾਲ
ਮੀਟਿੰਗ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਸੀਨੀਅਰ ਡਿਪਟੀ ਮੇਅਰ ਜਸਬੀਰ ਬੰਟੀ ਨੇ ਟੇਬਲ ਏਜੰਡੇ ’ਤੇ ਅਸਪਸ਼ਟਤਾ ਬਾਰੇ ਚਿੰਤਾ ਜ਼ਾਹਿਰ ਕੀਤੀ। ਕੌਂਸਲਰ ਪ੍ਰੇਮ ਲਤਾ ਨੇ ਕਮਿਊਨਿਟੀ ਸੈਂਟਰ ਬੁਕਿੰਗ ਬਾਰੇ ਸਪੱਸ਼ਟ ਜਾਣਕਾਰੀ ਨਾ ਹੋਣ ਤੇ ਮੇਅਰ ਨਾਲ ਬਹਿਸ ਕੀਤੀ।
ਸੜਕ ਮੁਰੰਮਤ ਅਤੇ ਨਵੀਨੀਕਰਨ ਦਾ ਵਿਸ਼ਾ ਬਣਿਆ ਨਵਾਂ ਹੰਗਾਮਾ
ਜਦੋਂ ਮੀਟਿੰਗ ਦੌਰਾਨ ਸੜਕਾਂ ਦੀ ਮੁਰੰਮਤ ਅਤੇ ਨਵੀਨੀਕਰਨ ਬਾਰੇ ਚਰਚਾ ਸ਼ੁਰੂ ਹੋਈ, ਤਾਂ ਯੂਟੀ ਪ੍ਰਸ਼ਾਸਨ ਵੱਲੋਂ ਨਗਰ ਨਿਗਮ ਵਿੱਚ ਨਿਯੁਕਤ ਅਧਿਕਾਰੀ ਸੀਬੀ ਓਝਾ ਨੂੰ ਘੇਰਨ ਦੀ ਕੋਸ਼ਿਸ਼ਾਂ ਹੋਣ ਲੱਗੀਆਂ। ਆਪ ਕੌਂਸਲਰ ਜਸਵਿੰਦਰ ਕੌਰ ਨੇ ਆਪਣੇ ਵਾਰਡ ਵਿੱਚ ਸੜਕ ਨਿਰਮਾਣ ਦੀ ਘਾਟ ਬਾਰੇ ਕਿਹਾ ਅਤੇ ਮੇਅਰ ਦੀ ਕੁਰਸੀ ਤੱਕ ਪਹੁੰਚ ਗਈ।
ਕੌਂਸਲਰਾਂ ਨੇ ਸਮਾਗਮਾਂ ’ਚ ਨਾ ਬੁਲਾਉਣ ਤੇ ਵੀ ਪ੍ਰਸ਼ਾਸਨ ’ਤੇ ਜਤਾਈ ਨਾਰਾਜ਼ਗੀ
ਕੌਂਸਲਰ ਪ੍ਰੇਮ ਲਤਾ ਨੇ ਦੱਸਿਆ ਕਿ ਉਨ੍ਹਾਂ ਦੇ ਵਾਰਡ ਵਿੱਚ ਇੱਕ ਲਾਈਟ ਪੋਲ ਲਈ ਨੀਂਹ ਪੱਥਰ ਰੱਖਿਆ ਗਿਆ ਪਰ ਉਨ੍ਹਾਂ ਨੂੰ ਸੱਦਾ ਨਹੀਂ ਦਿੱਤਾ ਗਿਆ। ਇਸ ’ਤੇ ਮੇਅਰ ਹਰਪ੍ਰੀਤ ਕੌਰ ਬਬਲਾ ਨੇ ਵੀ ਕਿਹਾ ਕਿ ਵਾਰਡ 29 ਵਿੱਚ ਕੈਮਰੇ ਲਗਾਏ ਗਏ ਸਨ ਅਤੇ ਮਨੀਸ਼ ਤਿਵਾੜੀ ਨੇ ਦੌਰਾ ਕੀਤਾ ਸੀ, ਪਰ ਉਨ੍ਹਾਂ ਨੂੰ ਵੀ ਸੱਦਾ ਨਹੀਂ ਮਿਲਿਆ।
ਸਚਿਨ ਗਾਲਿਬ ਨੇ ਪਾਰਕ ਪ੍ਰੋਜੈਕਟ ਵਿੱਚ ਨਾਮ ਨਾ ਸ਼ਾਮਲ ਹੋਣ ਤੇ ਵੀ ਜਤਾਇਆ ਰੋਸ
ਕਾਂਗਰਸ ਕੌਂਸਲਰ ਸਚਿਨ ਗਾਲਿਬ ਨੇ ਕਿਹਾ ਕਿ ਉਨ੍ਹਾਂ ਦੇ ਇਲਾਕੇ ਵਿੱਚ ਸੰਸਦ ਮੈਂਬਰ ਫੰਡ ਨਾਲ ਪਾਰਕ ਬਣਾਇਆ ਗਿਆ, ਪਰ ਉਨ੍ਹਾਂ ਦਾ ਨਾਮ ਤਖ਼ਤੀ ’ਤੇ ਸ਼ਾਮਲ ਨਹੀਂ ਕੀਤਾ ਗਿਆ। ਇਹ ਸਾਰਾ ਮਾਮਲਾ ਮੇਅਰ ਤੇ ਪ੍ਰਸ਼ਾਸਨ ਦੀ ਪਾਰਦਰਸ਼ਤਾ ’ਤੇ ਵੱਡਾ ਸਵਾਲ ਖੜਾ ਕਰਦਾ ਹੈ।
ਚੰਡੀਗੜ੍ਹ ਨਗਰ ਨਿਗਮ ਦੀ ਇਹ ਮੀਟਿੰਗ ਇੱਕ ਵਾਰ ਫਿਰ ਸਿਆਸੀ ਟਕਰਾਅ ਅਤੇ ਅਹੰਕਾਰ ਦੀ ਲੜਾਈ ਦਾ ਮੰਜ਼ਰ ਪੇਸ਼ ਕਰ ਗਈ, ਜਿੱਥੇ ਸ਼ਹਿਰੀ ਮੁੱਦਿਆਂ ਤੋਂ ਵੱਧ ਨਿੱਜੀ ਦੋਸ਼ ਤੇ ਸਿਆਸੀ ਦਾਅਵਾਂ ਨੇ ਮਾਹੌਲ ਗਰਮਾਇਆ।
