ਜਲੰਧਰ :- ਲਗਭਗ ਦੋ ਮਹੀਨੇ ਦੇ ਖਿੱਚੋ-ਤਾਣ ਤੇ ਕਾਗਜ਼ੀ ਕਾਰਵਾਈ ਦੇ ਅੜਿੱਕਿਆਂ ਤੋਂ ਬਾਅਦ, ਜਲੰਧਰ ਦੀ ਪਟਾਕਾ ਮਾਰਕੀਟ ਆਖ਼ਿਰਕਾਰ ਵੀਰਵਾਰ ਰਾਤ ਲਗਾ ਦਿੱਤੀ ਗਈ ਹੈ। ਸ਼ਨੀਵਾਰ ਤੋਂ ਹੋਲਸੇਲ ਤੇ ਰਿਟੇਲ ਵਿਕਰੀ ਵਾਸਤੇ ਸਾਰਾ ਪ੍ਰਬੰਧ ਪੂਰਾ ਕਰ ਦਿੱਤਾ ਗਿਆ ਹੈ। ਮਾਰਕੀਟ ਇਸ ਵਾਰ ਪਠਾਨਕੋਟ ਚੌਕ ਦੇ ਕਾਰਨਰ ’ਤੇ ਪਈ ਖਾਲੀ ਜ਼ਮੀਨ ’ਚ ਵਸਾਈ ਗਈ ਹੈ, ਜਿਸ ਕਰਕੇ ਇਲਾਕੇ ਵਿੱਚ ਤਿਉਹਾਰਾਂ ਵਾਲੀ ਰੌਣਕ ਦਿਖਣੀ ਸ਼ੁਰੂ ਹੋ ਗਈ ਹੈ।
ਕਲੀਅਰੈਂਸ ਮਿਲਦੇ ਹੀ ਰਾਤੋਂ-ਰਾਤ ਤਿਆਰੀਆਂ ਪੂਰੀਆਂ
ਸ਼ੁੱਕਰਵਾਰ ਨੂੰ ਪਟਾਕਾ ਵਪਾਰੀਆਂ ਨੂੰ ਪੁਲਸ ਅਤੇ ਪ੍ਰਸ਼ਾਸਨ ਵਲੋਂ ਜ਼ਰੂਰੀ ਲਾਇਸੰਸ ਜਿਵੇਂ ਹੀ ਜਾਰੀ ਕੀਤੇ ਗਏ, ਤੁਰੰਤ ਰੈਕਾਂ ਅਤੇ ਸਾਮਾਨ ਦੀ ਸੈਟਿੰਗ ਸ਼ੁਰੂ ਕਰ ਦਿੱਤੀ ਗਈ। ਰਾਤ ਦੇ ਸਮੇਂ ਕਾਰੋਬਾਰੀ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਮਾਲ ਟਰਾਂਸਪੋਰਟ ਕਰਨ ਅਤੇ ਕਾਊਂਟਰ ਲਗਾਉਣ ਵਿਚ ਰੁੱਝੇ ਰਹੇ। ਸਵੇਰੇ ਤਕ ਪੂਰਾ ਇਲਾਕਾ ਤਿਆਰ ਹੋ ਗਿਆ ਅਤੇ ਮਾਰਕੀਟ ਖੁੱਲ੍ਹਣ ਦੀ ਉਡੀਕ ਵਿਚ ਖੜੀ ਦਿਖਾਈ ਦਿੱਤੀ।
ਸਿਆਸੀ ਦਖਲਅੰਦਰਾਜ਼ੀ ਇਸ ਵਾਰ ਹੋਈ ਹੋਰ ਵੱਧ
ਪਟਾਕਾ ਮਾਰਕੀਟ ਹਰ ਸਾਲ ਕਿਸੇ ਨਾ ਕਿਸੇ ਸਿਆਸੀ ਖਿੱਚੋਤਾਣ ਦੀ ਭੇਂਟ ਚੜ੍ਹਦੀ ਆਉਂਦੀ ਹੈ, ਪਰ ਇਸ ਵਾਰ ਇਹ ਦਖਲਅੰਦਾਜ਼ੀ ਹੋਰ ਵੱਧ ਤੀਖੇ ਤਰੀਕੇ ਨਾਲ ਸਾਹਮਣੇ ਆਈ। ਪਟਾਕਾ ਵੇਪਾਰੀਆਂ ਦੇ 5 ਗਰੁੱਪਾਂ ਵਿਚੋਂ ਕੁਝ ’ਤੇ ਕਾਂਗਰਸ ਅਤੇ ਭਾਜਪਾ ਆਗੂਆਂ ਦੀ ਛਾਪ ਸਾਫ਼ ਦਿਖੀ, ਜਦਕਿ ਹੋਰਨਾਂ ਨੇ ਆਮ ਆਦਮੀ ਪਾਰਟੀ ਦੇ ਨੇਤਾਵਾਂ ਦਾ ਸਹਿਯੋਗ ਲਿਆ। ਬਰਲਟਨ ਪਾਰਕ ਦੀ ਖੁੱਲ੍ਹੀ ਜਗ੍ਹਾ ਹੱਥੋਂ ਨਿਕਲਣ ਤੋਂ ਬਾਅਦ ਨਵਾਂ ਥਾਂ ਲੱਭਣ ਵੇਲੇ ਹਰੇਕ ਪੈੜ ’ਤੇ ਕਿਸੇ ਨਾ ਕਿਸੇ ਪੱਖੋਂ ਅੜਿੱਕਾ ਆਇਆ।
ਮਾਮਲਾ ਪਹੁੰਚਿਆ ਹਾਈ ਕੋਰਟ ਤਕ
ਇਸ ਵਾਰ ਤਕਰਾਰ ਇਥੇ ਤਕ ਵਧੀ ਕਿ ਮਾਮਲਾ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਤਕ ਜਾ ਪੁੱਜਾ। ਕਾਰੋਬਾਰੀ ਸੰਘਾਂ ਵਲੋਂ ਪਟੀਸ਼ਨ ਦਾਇਰ ਕਰਕੇ ਡ੍ਰਾ ਦੀ ਗਿਣਤੀ ਵਧਾਉਣ ਅਤੇ ਨਵੀਂ ਜਗ੍ਹਾ ਦੀ ਨਿਰਪੱਖ ਵੰਡ ਦੀ ਮੰਗ ਕੀਤੀ ਗਈ। ਦੂਜੇ ਪਾਸੇ ਪ੍ਰਸ਼ਾਸਨਿਕ ਲਾਪਰਵਾਹੀ ਵੀ ਪੂਰੇ ਮਾਮਲੇ ਦੌਰਾਨ ਸਾਫ਼ ਝਲਕੀ। ਦੀਵਾਲੀ ਤੋਂ ਸਿਰਫ 2-3 ਦਿਨ ਪਹਿਲਾਂ ਮਾਰਕੀਟ ਲੱਗ ਸਕਣਾ ਇਸ ਬੇਧਿਆਨੀ ਦੀ ਵੱਡੀ ਨਿਸ਼ਾਨੀ ਮੰਨੀ ਜਾ ਰਹੀ ਹੈ।
