ਨਵੀਂ ਦਿੱਲੀ :- ਉੱਤਰੀ ਭਾਰਤ ਵਿੱਚ ਸਰਦੀਆਂ ਨੇ ਹੌਲੀ-ਹੌਲੀ ਆਪਣੀ ਆਮਦ ਦਰਜ ਕਰਵਾ ਦਿੱਤੀ ਹੈ। ਦਿੱਲੀ-ਐਨਸੀਆਰ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਤਾਪਮਾਨ ਵਿੱਚ ਕਮੀ ਆਉਣ ਲੱਗੀ ਹੈ। ਭਾਰਤੀ ਮੌਸਮ ਵਿਭਾਗ ਮੁਤਾਬਕ, ਦੀਵਾਲੀ ਤੋਂ ਤੁਰੰਤ ਬਾਅਦ ਠੰਡ ਹੋਰ ਤੇਜ਼ੀ ਨਾਲ ਵਧ ਸਕਦੀ ਹੈ, ਜਿਸ ਨਾਲ ਲੋਕਾਂ ਨੂੰ ਇਸ ਵਾਰ ਰਜਾਈਆਂ ਜਲਦੀ ਕੱਢਣੀਆਂ ਪੈ ਸਕਦੀਆਂ ਹਨ।
ਤਾਪਮਾਨ ਹੌਲੀ-ਹੌਲੀ ਡਿੱਗ ਰਿਹਾ ਹੈ
ਦਿੱਲੀ, ਨੋਇਡਾ, ਗਾਜ਼ੀਆਬਾਦ ਤੇ ਗੁਰੂਗ੍ਰਾਮ ਵਿੱਚ ਦਿਨ ਦਾ ਤਾਪਮਾਨ ਇਸ ਸਮੇਂ 30 ਤੋਂ 31 ਡਿਗਰੀ ਸੈਲਸੀਅਸ ਦੇ ਵਿਚਕਾਰ ਹੈ, ਜਦਕਿ ਰਾਤ ਦਾ ਤਾਪਮਾਨ 18 ਤੋਂ 19 ਡਿਗਰੀ ਸੈਲਸੀਅਸ ਤੱਕ ਘੱਟ ਗਿਆ ਹੈ। ਇਹ ਮੌਸਮੀ ਔਸਤ ਨਾਲੋਂ ਹੇਠਾਂ ਹੈ। ਸੋਮਵਾਰ ਨੂੰ ਦਿੱਲੀ ਵਿੱਚ ਘੱਟੋ-ਘੱਟ ਤਾਪਮਾਨ 19 ਡਿਗਰੀ ਦਰਜ ਕੀਤਾ ਗਿਆ, ਜੋ ਆਮ ਨਾਲੋਂ 0.6 ਡਿਗਰੀ ਘੱਟ ਹੈ। ਲਗਾਤਾਰ ਚੌਥੇ ਦਿਨ ਪਾਰਾ 20 ਡਿਗਰੀ ਤੋਂ ਹੇਠਾਂ ਰਿਹਾ — ਜਿਸ ਨਾਲ ਇਹ ਸਪਸ਼ਟ ਹੈ ਕਿ ਸਰਦੀ ਨੇ ਸ਼ਹਿਰ ਵਿੱਚ ਚੁੱਪ-ਚਾਪ ਦਸਤਕ ਦੇ ਦਿੱਤੀ ਹੈ।
ਸਰਦੀਆਂ ਨਾਲ ਪ੍ਰਦੂਸ਼ਣ ਵਧਣ ਲੱਗਾ
ਜਿਵੇਂ-ਜਿਵੇਂ ਤਾਪਮਾਨ ਘਟ ਰਿਹਾ ਹੈ, ਦਿੱਲੀ ਦੀ ਹਵਾ ਫਿਰ ਤੋਂ ਜ਼ਹਿਰੀਲੀ ਹੋਣੀ ਸ਼ੁਰੂ ਹੋ ਗਈ ਹੈ। ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਅੰਕੜਿਆਂ
ਮੁਤਾਬਕ, ਸੋਮਵਾਰ ਸ਼ਾਮ ਤੱਕ ਦਿੱਲੀ ਦਾ ਏਅਰ ਕੁਆਲਿਟੀ ਇੰਡੈਕਸ (AQI) 189 ਦਰਜ ਕੀਤਾ ਗਿਆ, ਜੋ “ਦਰਮਿਆਨੀ” ਸ਼੍ਰੇਣੀ ਵਿੱਚ ਆਉਂਦਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਜਿਵੇਂ ਸਰਦੀਆਂ ਵਧਣਗੀਆਂ, ਪ੍ਰਦੂਸ਼ਣ ਦਾ ਪੱਧਰ ਵੀ ਹੋਰ ਉੱਪਰ ਜਾ ਸਕਦਾ ਹੈ।
ਦੱਖਣੀ ਭਾਰਤ ਵਿੱਚ ਭਾਰੀ ਮੀਂਹ ਦੀ ਚੇਤਾਵਨੀ
ਉੱਥੇ ਹੀ ਜਦੋਂ ਉੱਤਰ ਵਿੱਚ ਠੰਢ ਵਧ ਰਹੀ ਹੈ, ਤਦ ਦੱਖਣੀ ਭਾਰਤ ਵਿੱਚ ਮੀਂਹ ਦਾ ਦੌਰ ਜਾਰੀ ਹੈ। ਮੌਸਮ ਵਿਭਾਗ ਨੇ ਤਾਮਿਲਨਾਡੂ, ਦੱਖਣੀ ਕਰਨਾਟਕ, ਤੱਟਵਰਤੀ ਆਂਧਰਾ ਪ੍ਰਦੇਸ਼ ਅਤੇ ਲਕਸ਼ਦੀਪ ਲਈ 14 ਤੋਂ 18 ਅਕਤੂਬਰ ਤੱਕ ਭਾਰੀ ਮੀਂਹ ਦੀ ਚੇਤਾਵਨੀ ਦਿੱਤੀ ਹੈ। ਇਨ੍ਹਾਂ ਖੇਤਰਾਂ ਵਿੱਚ 30-40 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਤੇਜ਼ ਹਵਾਵਾਂ ਅਤੇ ਬਿਜਲੀ ਡਿੱਗਣ ਦੀ ਸੰਭਾਵਨਾ ਜਤਾਈ ਗਈ ਹੈ। ਇਸ ਤੋਂ ਇਲਾਵਾ, ਛੱਤੀਸਗੜ੍ਹ, ਓਡੀਸ਼ਾ, ਵਿਦਰਭ, ਮੱਧ ਮਹਾਰਾਸ਼ਟਰ ਅਤੇ ਗੋਆ ਵਿੱਚ ਵੀ 14-15 ਅਕਤੂਬਰ ਨੂੰ ਗਰਜ-ਤੂਫ਼ਾਨ ਦੇ ਆਸਾਰ ਹਨ।
ਅਗਲੇ ਦਿਨਾਂ ਲਈ ਮੌਸਮ ਦੀ ਤਸਵੀਰ
ਮਾਨਸੂਨ ਹੁਣ ਬੰਗਾਲ ਤੋਂ ਅਧਿਕਾਰਕ ਤੌਰ ‘ਤੇ ਰੁਖ਼ਸਤ ਹੋ ਗਿਆ ਹੈ। ਪੂਰਬੀ ਭਾਰਤ ਵਿੱਚ ਮੌਸਮ ਖੁਸ਼ਕ ਰਹਿਣ ਦੀ ਸੰਭਾਵਨਾ ਹੈ। ਕੋਲਕਾਤਾ ਵਿੱਚ ਸੋਮਵਾਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 31°C ਅਤੇ ਘੱਟੋ-ਘੱਟ 24°C ਰਿਹਾ, ਜੋ ਇਸ ਸਮੇਂ ਲਈ ਆਮ ਹੈ। ਆਈਐਮਡੀ ਮੁਤਾਬਕ, ਅਗਲੇ ਕੁਝ ਦਿਨ ਅੰਸ਼ਕ ਤੌਰ ‘ਤੇ ਬੱਦਲਵਾਈ ਰਹੇਗੇ ਪਰ ਮੀਂਹ ਦੀ ਸੰਭਾਵਨਾ ਨਹੀਂ ਹੈ।
ਉੱਤਰ ਵਿੱਚ ਠੰਡ, ਦੱਖਣ ਵਿੱਚ ਮੀਂਹ — ਤਿਉਹਾਰਾਂ ਦੇ ਵਿਚਕਾਰ ਬਦਲਦਾ ਮੌਸਮ
ਦੀਵਾਲੀ ਦੇ ਮੌਕੇ ‘ਤੇ ਜਿੱਥੇ ਉੱਤਰੀ ਭਾਰਤ ਵਿੱਚ ਠੰਢ ਦਾ ਅਹਿਸਾਸ ਵਧ ਰਿਹਾ ਹੈ, ਉੱਥੇ ਦੱਖਣੀ ਭਾਰਤ ਮੀਂਹ ਨਾਲ ਜੂਝ ਰਿਹਾ ਹੈ। ਦਿੱਲੀ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚ ਸਵੇਰ ਤੇ ਸ਼ਾਮ ਦੀ ਹਲਕੀ ਠੰਢ ਲੋਕਾਂ ਨੂੰ ਜਲਦੀ ਹੀ ਕੰਬਲ ਤੇ ਸਵੈਟਰ ਕੱਢਣ ‘ਤੇ ਮਜਬੂਰ ਕਰੇਗੀ, ਜਦਕਿ ਦੱਖਣ ਵਿੱਚ ਮੀਂਹ ਦੀਆਂ ਬੂੰਦਾਂ ਹਾਲੇ ਵੀ ਮੌਸਮ ਨੂੰ ਗਿੱਲਾ ਰੱਖਣਗੀਆਂ।
