ਨਵੀਂ ਦਿੱਲੀ :- ਭਾਰਤ ਦੀ ਸ਼ੀਤਲ ਦੇਵੀ ਅਤੇ ਸਰਿਤਾ ਨੇ ਵਿਸ਼ਵ ਪੈਰਾ ਤੀਰਅੰਦਾਜ਼ੀ ਚੈਂਪੀਅਨਸ਼ਿਪ ਦੇ ਕੰਪਾਊਂਡ ਮਹਿਲਾ ਓਪਨ ਟੀਮ ਮੁਕਾਬਲੇ ਦੇ ਫਾਈਨਲ ਵਿੱਚ ਤੁਰਕੀ ਦਾ ਮੁਕਾਬਲਾ ਕੀਤਾ। ਭਾਰਤੀ ਜੋੜੀ ਨੇ ਸ਼ੁਰੂਆਤੀ ਦੌਰ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਤੁਰਕੀ ਦੀ ਜੋੜੀ ਓਜ਼ਨੂਰ ਕਿਊਰ ਗਿਰਦੀ ਅਤੇ ਬਰਸਾ ਫਾਤਮਾ ਉਨ ’ਤੇ 38-37 ਦੀ ਬੜ੍ਹਤ ਬਣਾਈ। ਸ਼ੀਤਲ ਅਤੇ ਸਰਿਤਾ ਨੇ ਆਪਣੇ ਪਹਿਲੇ ਚਾਰ ਤੀਰਾਂ ਵਿੱਚ ਤਿੰਨ ਵਾਰ 10 ਅੰਕ ਹਾਸਲ ਕਰਕੇ ਪ੍ਰਭਾਵਸ਼ਾਲੀ ਸ਼ੁਰੂਆਤ ਕੀਤੀ।
ਤੁਰਕੀ ਦੀ ਵਾਪਸੀ, ਭਾਰਤੀ ਜੋੜੀ ਦਬਾਅ ਵਿੱਚ
ਦੂਜੇ ਦੌਰ ਵਿੱਚ ਤੁਰਕੀ ਦੀ ਜੋੜੀ ਨੇ ਤਿੰਨ ਵਾਰ 10 ਅੰਕ ਪ੍ਰਾਪਤ ਕਰਕੇ ਸਕੋਰ 76-76 ’ਤੇ ਬਰਾਬਰ ਕਰ ਲਿਆ। ਤੀਜੇ ਦੌਰ ਵਿੱਚ ਭਾਰਤੀ ਜੋੜੀ ਦਬਾਅ ਵਿੱਚ ਆ ਗਈ ਅਤੇ ਕੇਵਲ ਇੱਕ ਵਾਰ 10 ਅੰਕ, ਦੋ ਵਾਰ 9 ਅੰਕ ਅਤੇ ਇੱਕ ਵਾਰ 8 ਅੰਕ ਹੀ ਹਾਸਲ ਕਰ ਸਕੀ, ਜਿਸ ਨਾਲ ਉਹਨਾਂ ਦਾ ਸਕੋਰ 36 ਰਿਹਾ। ਇਸ ਦੇ ਬਰਅਕਸ, ਤੁਰਕੀ ਨੇ ਇਕਸਾਰ ਪ੍ਰਦਰਸ਼ਨ ਕਰਦਿਆਂ ਇੱਕ 10 ਅਤੇ ਤਿੰਨ 9 ਅੰਕ ਹਾਸਲ ਕਰਕੇ ਇੱਕ ਅੰਕ ਦੀ ਬੜ੍ਹਤ ਲੈ ਲਈ।
ਫਾਈਨਲ ਵਿੱਚ ਤੁਰਕੀ ਦਾ ਪਲੜਾ ਭਾਰੀ
ਆਖ਼ਰੀ ਦੌਰ ਵਿੱਚ ਗਿਰਦੀ ਅਤੇ ਉਨ ਨੇ ਸੰਭਾਵਿਤ 40 ਵਿੱਚੋਂ 39 ਅੰਕ ਹਾਸਲ ਕਰਕੇ ਜਿੱਤ ਪੱਕੀ ਕੀਤੀ। ਭਾਰਤੀ ਟੀਮ ਇਸ ਦੌਰ ਵਿੱਚ ਕੇਵਲ 36 ਅੰਕ ਹੀ ਹਾਸਲ ਕਰ ਸਕੀ, ਜਿਸ ਵਿੱਚ ਇੱਕ ਤੀਰ ਸੱਤ ਅੰਕਾਂ ’ਤੇ ਲੱਗਿਆ। ਤੁਰਕੀ ਨੇ 152-148 ਨਾਲ ਭਾਰਤ ਨੂੰ ਹਰਾ ਕੇ ਸੋਨੇ ਦਾ ਤਗਮਾ ਜਿੱਤਿਆ, ਜਦੋਂ ਕਿ ਭਾਰਤ ਨੂੰ ਚਾਂਦੀ ਦੇ ਤਗਮੇ ਨਾਲ ਸੰਤੋਸ਼ ਕਰਨਾ ਪਿਆ।
