ਚੰਡੀਗੜ੍ਹ :- ਪੰਜਾਬ ’ਚ ਨਸ਼ੇ ਅਤੇ ਹਥਿਆਰਾਂ ਦੀ ਤਸਕਰੀ ਲਈ ਡ੍ਰੋਨ ਦੀ ਵਰਤੋਂ ਲਗਾਤਾਰ ਵੱਧ ਰਹੀ ਹੈ। ਨਾਰਕੋਟਿਕਸ ਕੰਟਰੋਲ ਬਿਊਰੋ (ਐੱਨਸੀਬੀ) ਦੇ ਅੰਕੜਿਆਂ ਮੁਤਾਬਕ ਸਿੰਥੈਟਿਕ ਡਰੱਗਜ਼ ਦੀ ਜ਼ਬਤੀ 2019 ਤੋਂ 2024 ਤੱਕ ਛੇ ਗੁਣਾ ਵੱਧ ਗਈ ਹੈ। 2024 ’ਚ 11,994 ਕਿੱਲੋ ਸਿੰਥੈਟਿਕ ਡਰੱਗਜ਼ ਜ਼ਬਤ ਕੀਤੇ ਗਏ, ਜਿਨ੍ਹਾਂ ਵਿੱਚ ਮੈਫੇਡਰੋਨ, ਐੱਮਡੀਐੱਮਏ ਅਤੇ ਐਮਫੇਟਾਮਾਈਨ ਸ਼ਾਮਲ ਹਨ। ਇਹ ਨਸ਼ੇ ਮੁੱਖ ਤੌਰ ’ਤੇ ਨੌਜਵਾਨਾਂ ਵਿਚ ਪ੍ਰਚਲਿਤ ਹਨ।
ਡ੍ਰੋਨ ਬਣੇ ਤਸਕਰਾਂ ਦਾ ਨਵਾਂ ਰੂਟ
ਪਹਿਲਾਂ ਤਸਕਰੀ ਜ਼ਿਆਦਾਤਰ ਸਰਹੱਦ ਨੇੜੇ ਹੁੰਦੀ ਸੀ, ਪਰ ਹੁਣ ਛੋਟੇ ਅਤੇ ਹਾਈ-ਟੈਕ ਡ੍ਰੋਨ ਲੰਬੀ ਦੂਰੀ ’ਤੇ ਮਾਲ ਪਹੁੰਚਾ ਰਹੇ ਹਨ। ਖੇਪ ਹੁਣ ਸਿਰਫ਼ ਸਰਹੱਦ ਨੇੜੇ ਹੀ ਨਹੀਂ, ਸਗੋਂ ਕਈ ਕਿੱਲੋਮੀਟਰ ਦੂਰ ਪਿੰਡਾਂ ਅਤੇ ਖੇਤਾਂ ’ਚ ਸੁੱਟੀਆਂ ਜਾ ਰਹੀਆਂ ਹਨ। ਇਸ ਕਾਰਨ ਸੁਰੱਖਿਆ ਬਲਾਂ ਦੀ ਚਿੰਤਾ ਵੱਧ ਗਈ ਹੈ।
ਪ੍ਰਭਾਵਤ ਜ਼ਿਲ੍ਹੇ
ਅੰਮ੍ਰਿਤਸਰ, ਤਰਨਤਾਰਨ, ਫਿਰੋਜ਼ਪੁਰ ਅਤੇ ਗੁਰਦਾਸਪੁਰ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਹਨ। ਇੱਥੇ ਨਸ਼ੇ ਦੀ ਤਸਕਰੀ ਅਤੇ ਗ੍ਰਿਫ਼ਤਾਰੀ ਦੋਵੇਂ ਵੱਧ ਰਹੀਆਂ ਹਨ।
ਕਾਰਨ ਤੇ ਚਿੰਤਾ
ਪੁਲਿਸ ਮੁਤਾਬਕ, ਬੇਰੋਜ਼ਗਾਰੀ, ਖੇਤੀਬਾੜੀ ’ਤੇ ਆਰਥਿਕ ਦਬਾਅ, ਖੇਡਾਂ ਅਤੇ ਸਕਾਰਾਤਮਕ ਗਤੀਵਿਧੀਆਂ ਦੀ ਘਾਟ, ਸਮਾਜਿਕ ਦਬਾਅ ਅਤੇ ਸਾਥੀਆਂ ਦਾ ਪ੍ਰਭਾਵ ਨੌਜਵਾਨਾਂ ਨੂੰ ਨਸ਼ੇ ਵੱਲ ਖਿੱਚ ਰਿਹਾ ਹੈ। ਕਾਨੂੰਨੀ ਢਿੱਲਾਪਣ ਅਤੇ ਭ੍ਰਿਸ਼ਟਾਚਾਰ ਵੀ ਇਸ ਮਾਮਲੇ ਨੂੰ ਤੇਜ਼ ਕਰ ਰਹੇ ਹਨ।
ਡ੍ਰੋਨ ਤਸਕਰੀ ਦੇ ਅੰਕੜੇ
2024 ਵਿੱਚ ਭਾਰਤ ’ਚ ਡ੍ਰੋਨ ਰਾਹੀਂ 179 ਮਾਮਲੇ ਦਰਜ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ ਪੰਜਾਬ ’ਚ 163 ਮਾਮਲੇ ਸਨ। ਇਨ੍ਹਾਂ ’ਚੋਂ ਲਗਭਗ 187 ਕਿੱਲੋ ਹੈਰੋਇਨ ਬਰਾਮਦ ਹੋਈ। ਬੀਐੱਸਐੱਫ ਨੇ ਦਸ ਮਹੀਨਿਆਂ ’ਚ ਪੰਜਾਬ ਸਰਹੱਦ ’ਤੇ 181 ਡ੍ਰੋਨ ਫੜੇ। ਹਾਲ ਹੀ ’ਚ ਅੰਮ੍ਰਿਤਸਰ ਤੇ ਤਰਨਤਾਰਨ ਦੇ ਪਿੰਡਾਂ ’ਚ 6 ਡ੍ਰੋਨ ਜ਼ਬਤ ਕੀਤੇ ਗਏ, ਜਿਨ੍ਹਾਂ ਵਿੱਚੋਂ 5 ਡੀਜੇਆਈ ਮੇਵਿਕ 3 ਕਲਾਸਿਕ ਅਤੇ 1 ਡੀਜੇਆਈ ਏਅਰ 3ਐੱਸ ਸੀ। ਇਸ ਕਾਰਵਾਈ ’ਚ ਲਗਭਗ 1.73 ਕਿੱਲੋ ਹੈਰੋਇਨ ਵੀ ਬਰਾਮਦ ਹੋਈ।
ਡ੍ਰੋਨ ਰਾਹੀਂ ਤਸਕਰੀ ਨਸ਼ਿਆਂ ਦੀ ਉਪਲਬਧਤਾ ਨੂੰ ਤੇਜ਼ ਕਰ ਰਹੀ ਹੈ ਅਤੇ ਨੌਜਵਾਨਾਂ ’ਤੇ ਖ਼ਤਰਾ ਵੱਧਾ ਰਹੀ ਹੈ। ਸਰਹੱਦ ਅਤੇ ਅੰਦਰੂਨੀ ਖੇਤਰਾਂ ’ਚ ਨਿਗਰਾਨੀ ਨੂੰ ਸਖ਼ਤ ਕਰਨਾ ਹੁਣ ਪਹਿਲਾ ਕੰਮ ਬਣ ਗਿਆ ਹੈ।
