ਨਵੀਂ ਦਿੱਲੀ :- ਦਿੱਲੀ ਵਿੱਚ ਐਤਵਾਰ ਇੱਕ ਭਿਆਨਕ ਸੜਕ ਹਾਦਸਾ ਵਾਪਰਿਆ। ਧੌਲਾ ਕੁਆਂ ਇਲਾਕੇ ‘ਚ ਦਿੱਲੀ ਕੈਂਟ ਮੈਟਰੋ ਸਟੇਸ਼ਨ ਦੇ ਨੇੜੇ ਇੱਕ ਤੇਜ਼ ਰਫ਼ਤਾਰ ਬੀਐਮਡਬਲਯੂ ਕਾਰ ਨੇ ਬਾਈਕ ਸਵਾਰ ਜੋੜੇ ਨੂੰ ਪਿੱਛੋਂ ਟੱਕਰ ਮਾਰੀ। ਟੱਕਰ ਇੰਨੀ ਜ਼ੋਰਦਾਰ ਸੀ ਕਿ ਬਾਈਕ ਪਹਿਲਾਂ ਸੈਂਟਰਲ ਵਰਜ ਨਾਲ ਟਕਰਾਈ ਅਤੇ ਫਿਰ ਖੱਬੇ ਪਾਸੇ ਚੱਲ ਰਹੀ ਬੱਸ ਨਾਲ ਜਾ ਟਕਰਾਈ।
ਮ੍ਰਿਤਕ ਦੀ ਪਛਾਣ ਨਵਜੋਤ ਸਿੰਘ ਵਜੋਂ
ਇਸ ਹਾਦਸੇ ਵਿੱਚ ਬਾਈਕ ਸਵਾਰ ਨਵਜੋਤ ਸਿੰਘ ਦੀ ਮੌਤ ਹੋ ਗਈ, ਜਦਕਿ ਉਸ ਦੀ ਪਤਨੀ ਗੰਭੀਰ ਜ਼ਖ਼ਮੀ ਹੋ ਗਈ। ਮ੍ਰਿਤਕ ਨਵਜੋਤ ਸਿੰਘ ਹਰੀ ਨਗਰ ਦੇ ਨਿਵਾਸੀ ਸਨ ਅਤੇ ਭਾਰਤ ਸਰਕਾਰ ਦੇ ਵਿੱਤ ਮੰਤਰਾਲੇ ਵਿੱਚ ਡਿਪਟੀ ਸੈਕਟਰੀ ਵਜੋਂ ਸੇਵਾ ਨਿਭਾ ਰਹੇ ਸਨ। ਹਾਦਸੇ ਦੇ ਸਮੇਂ ਨਵਜੋਤ ਸਿੰਘ ਆਪਣੀ ਪਤਨੀ ਨਾਲ ਬੰਗਲਾ ਸਾਹਿਬ ਗੁਰਦੁਆਰੇ ਤੋਂ ਘਰ ਵਾਪਸ ਆ ਰਹੇ ਸਨ।
ਹਸਪਤਾਲ ਪਹੁੰਚਣ ‘ਤੇ ਮ੍ਰਿਤ ਘੋਸ਼ਿਤ
ਹਾਦਸੇ ਤੋਂ ਬਾਅਦ ਜ਼ਖ਼ਮੀ ਜੋੜੇ ਨੂੰ ਸਿੱਧੇ 17 ਕਿਲੋਮੀਟਰ ਦੂਰ ਜੀ.ਟੀ.ਬੀ. ਨਗਰ ਸਥਿਤ ਨਿਊ ਲਾਈਫ ਹਸਪਤਾਲ ਲੈ ਜਾਇਆ ਗਿਆ। ਉੱਥੇ ਡਾਕਟਰਾਂ ਨੇ ਨਵਜੋਤ ਸਿੰਘ ਨੂੰ ਮ੍ਰਿਤ ਘੋਸ਼ਿਤ ਕਰ ਦਿੱਤਾ, ਜਦਕਿ ਉਸ ਦੀ ਪਤਨੀ ਦੀ ਹਾਲਤ ਬਹੁਤ ਗੰਭੀਰ ਹੈ ਅਤੇ ਇਲਾਜ ਜਾਰੀ ਹੈ।
ਬੀਐਮਡਬਲਯੂ ਚਲਾਉਣ ਵਾਲੀ ਮਹਿਲਾ ਵੀ ਜ਼ਖ਼ਮੀ
ਚਸ਼ਮਦੀਦਾਂ ਮੁਤਾਬਕ, ਬੀਐਮਡਬਲਯੂ ਚਲਾਉਣ ਵਾਲੀ ਗੁਰਗਾਮ ਨਿਵਾਸੀ ਇੱਕ ਔਰਤ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਉਸਦਾ ਪਤੀ ਵਪਾਰੀ ਹੈ। ਹਾਦਸੇ ਦੌਰਾਨ ਦੋਸ਼ੀ ਮਹਿਲਾ ਅਤੇ ਉਸਦਾ ਪਤੀ ਵੀ ਜ਼ਖ਼ਮੀ ਹੋਏ ਹਨ ਅਤੇ ਇਸ ਸਮੇਂ ਹਸਪਤਾਲ ਵਿੱਚ ਦਾਖ਼ਲ ਹਨ।
ਪੁਲਿਸ ਵਲੋਂ ਕੇਸ ਦਰਜ, ਜਾਂਚ ਜਾਰੀ
ਇਸ ਗੰਭੀਰ ਹਾਦਸੇ ਤੋਂ ਬਾਅਦ ਪੁਲਿਸ ਨੇ ਕੇਸ ਦਰਜ ਕਰ ਲਿਆ ਹੈ। FSL ਟੀਮ ਨੇ ਵੀ ਘਟਨਾ ਸਥਲ ‘ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਹਾਦਸੇ ਤੋਂ ਬਾਅਦ ਸੜਕ ‘ਤੇ ਉਲਟੀ ਹੋਈ BMW ਕਾਰ ਅਤੇ ਡਿਵਾਈਡਰ ਕੋਲ ਪਈ ਬਾਈਕ ਨੂੰ ਪੁਲਿਸ ਨੇ ਕਬਜ਼ੇ ਵਿੱਚ ਲੈ ਲਿਆ ਹੈ।
